ႁွင်ႈၵၢၼ်ၾၢႆႇလၢမ်းၶၢတ်ႈၾူၼ်လူမ်း MoSLHA လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ (NUG) ပၼ်ၾၢင်ႉဝႃႈ တေႃႇထိုင်ဝၼ်းတီႈ 14 လိူၼ်ၵျုၼ်ႊၼႆႉ ၾူၼ်တေတူၵ်းႁႅင်းပဵၼ်တီႈပဵၼ်တီႈ ၼႂ်းမိူင်းတႆး ဢိၵ်ႇပႃး ႁူမ်ႈတုမ်မၢၼ်ႈလၢႆတီႈ၊ ႁႂ်ႈဢွၼ်ၵၼ်ၾၢင်ႉ ၽေးၼမ်ႉထူမ်ႈၼမ်ႉၼွင်း ၼႆယဝ်ႉ။

ယၢမ်းလဵဝ် တီႈႁိမ်းပၢင်ႇလၢႆႇ ၵပ်ႉပလီႇၼၼ်ႉ မီးဝႆႉလူမ်းလႅင်ႉႁႅင်းယႂ်ႇဢၼ်ၼိုင်ႈ၊ ယွၼ်ႉၼၼ် တႄႇဢဝ်ဝၼ်းတီႈ 8 တေႃႇထိုင်ဝၼ်းတီႈ 14 လိူၼ်ၵျုၼ်ႊၼႆႉ ၾူၼ်တေသိုပ်ႇတူၵ်း ၼမ်ဝႆႉထႅင်ႈ ဝႃႈၼႆ။

ၼႂ်း မိူင်းတႆး၊ မိူင်းၶၢင်၊ မိူင်းၶျၢင်း၊ မိူင်းရၶႅင်ႇ၊ တိူင်းတၼၢဝ်းသီ၊ တိူင်းဢေႇရႃႇဝတီႇ၊ တိူင်းတႃႈၵုင်ႈ၊ တိူင်းမၢၼ်းတလေး၊ တိူင်းပႃႇၵိူဝ်၊ ၊ မိူင်းယၢင်းလႅင်၊ မိူင်းယၢင်းၽိူၵ်ႇ လႄႈ မိူင်းမွၼ်း ၸိူဝ်းၼႆႉ ၾူၼ်တေတူၵ်းႁႅင်းပဵၼ်တီႈ၊ တိူင်းၸႄႈၵႅင်း တင်း တိူင်းမၵူၺ်းသမ်ႉ ၼႂ်းပိုၼ်ႉတီႈၵမ်ႈၼမ်ၼႆႉ ၾူၼ်တေတူၵ်းၼမ်ႁႅင်းဝႆႉ။

မိူဝ်ႈၽွင်းၾူၼ်တူၵ်းၼၼ်ႉ တေမီးပႃး ၾႃႉတႅၵ်ႇၾႃႉလင်၊ လူမ်းၽတ်ႉထွင်းႁႅင်း၊ ၼမ်ႉၵိုင်ႉၵၢင်ႉ ၼွင်းထူမ်ႈ၊ လိၼ်လွႆ ၾင်ႇႁိုၵ်း ၵူၼ်ႇပင်း ၸိူဝ်းၼႆႉလႄႈ ႁႂ်ႈဢွၼ်ၵၼ်ဝႆႉၾၢင်ႉသတိသေ ယူႇသဝ်းၵႂႃႇမႃး ဝႃႈၼႆ။

တႄႇဢဝ်ၼႂ်းလိူၼ်မေႊမႃး ယွၼ်ႉၾူၼ်တူၵ်းႁႅင်းသေ ၼႂ်းၸိုင်ႈတႆးပွတ်းၸၢၼ်း လၢႆလၢႆၸႄႈဝဵင်း လႆႈႁူပ်ႉၽေးၼမ်ႉၼွင်းထူမ်ႈ သူၼ်ၽုၵ်ႇသွမ်ႈလူႉၵွႆၼမ်၊ တူဝ်သတ်းလဵင်ႉလူဝႆႉ ၵေႃႈ ၺႃးၽေးၾႃႉၽႃႇ လႄႈ လိၼ်ၵူၼ်ႇပင်း ၸဵမ်ၸိူဝ်းၼႆႉ။

မိူၼ်ၼႆ တီႈမိူင်းၶၢင်ၵေႃႈ ယွၼ်ႉၾူၼ်တူၵ်းႁႅင်းသေ သဵၼ်ႈတၢင်းၵႂႃႇမႃးၼႂ်းပိုၼ်ႉတီႈ လူႉၵွႆၼမ်၊ ၵူၼ်းမိူင်း ႁူပ်ႉလွင်ႈယၢပ်ႇၽိုတ်ႇဝႆႉ တႃႇၵႂႃႇမႃး ၼႆယဝ်ႉ။