ပၢင်ၶႅင်ႇတွႆႇမူၺ်း UFC ၾလၢႆႊဝိတ်ႊ ဢၼ်ၸတ်းႁဵတ်းၵႂႃႇ ၼႂ်းဝၼ်းဢႃးတိတ်ႉ (ဝၼ်းတီႈ 7 လိူၼ်တီႊသႅမ်ႊပိူဝ်ႊ) ၵၢင်ၼႂ် တီႈဝဵင်းလူင် Las Vegas မိူင်းဢမေႊရိၵၼ်ႊၼၼ်ႉ ၵျေႃႉသျူႊဝႃႊ ဝၼ်ႊ (Joshua Van) ၸၢဝ်းၶိူဝ်းၶျၢင်း လႄႈ ပၼ်ႊတူဝ်ႊၵျႃႊ ၵူၼ်းမိူင်း ပရႃႊသီး ထုပ်ႉၶႅင်ႇၵၼ်။

တီႈပၢင်ၼၼ်ႉ ၶၢဝ်းယၢမ်းထုပ်ႉၶႅင်ႇၵၼ် ယင်းပႆႇတဵမ်ၼိုင်ႈမိၼိတ်ႉ ပၼ်ႊတူဝ်ႊၵျႃႊ ပိၼ်ႈလူမ်ႉ၊ ဢဝ်လုပ်ႇၼွၵ်းသွၵ်ႇပိူင်ႈၵႂႃႇလႄႈ လႆႈသုမ်းၵၢၼ်ႉၵႂႃႇ။ ယွၼ်ႉၼၼ် ၸွမ်းၼင်ႇပိူင် TKO သေ ၵျေႃႉသျူႊဝႃႊ ဝၼ်ႊ ပေႉ ပၼ်ႊတူဝ်ႊၵျႃႊယဝ်ႉ လႆႈႁပ်ႉသူး သၢႆႁတ်ႉၶျႅၼ်ႊပီႊယၼ်ႊ။

ပၢင်ၶႅင်ႇတွႆႇမူၺ်း UFC (Ultimate Fighting Championship) ၼႆႉ ပဵၼ်ပၢင် ၸိုဝ်ႈလိုဝ်းလင်ဝႆႉသႅၼ်းၼိုင်ႈ ၼႂ်းလုမ်ႈၾႃႉ ၵူၼ်းပၼ်ႁႅင်းၵေႃႈ မီးၼမ်။
ၼႂ်းၼၼ်ႉ ၽူႈတွႆႇမူၺ်း ၵိူတ်ႇၼႂ်းမိူင်းႁူမ်ႈတုမ်မၢၼ်ႈသေ လႆႈသၢႆႁတ်ႉ ပဵၼ်ၶျႅၼ်ႊပီႊယႅၼ်ႊၼႆႉ ၵျေႃႉသျူႊဝႃႊ ဝၼ်ႊ ၸၢဝ်းၶိူဝ်းၶျၢင်း ပဵၼ်မႃး ၵေႃႉဢွၼ်တၢင်းသုတ်းၼႂ်းပိုၼ်း UFC။ လိူဝ်ၼၼ်ႉ ၼႂ်းသဵၼ်ႈမၢႆ ၽူႈတွႆႇမူၺ်း လႆႈသၢႆႁတ်ႉၶျႅၼ်ႊပီႊယႅၼ်ႊၼႆႉ ပဵၼ်ၵေႃႉ ဢႃယုလဵၵ်ႉသုတ်း ထီႉသွင်၊ ၼိူဝ်ၵုၼ်ဢေႊသျႃႊၵေႃႈ ပဵၼ်ၵူၼ်းၼုမ်ႇ ဢၼ်ယၢမ်ႈလႆႈသူးၶျႅၼ်ႊပီႊယႅၼ်ႊ ၵေႃႉဢွၼ်တၢင်းသုတ်းၼႂ်းပိုၼ်း။

ၵျေႃႉသျူႊဝႃႊ ဝၼ်ႊ ဢႃယု 24 ၼႆႉ ၵိူတ်ႇတီႈမိူင်းၶျၢင်း ၼႂ်းမိူင်းႁူမ်ႈတုမ်မၢၼ်ႈ၊ ယွၼ်ႉငဝ်းလၢႆးၼႂ်းပိုၼ်ႉတီႈဢမ်ႇၵတ်းယဵၼ်သေ လႆႈၶၢႆႉၵႂႃႇယူႇတီႈမိူင်းဢမေႊရိၵၼ်ႊ။ ဝၢႆးၼၼ်ႉ ႁဵၼ်းလိၵ်ႈသေ ၶဝ်ႈၼႂ်းတူင်ႇဝူင်းလဵၼ်ႈႁႅင်း ၾၢႆႇတွႆႇမူၺ်း တီႈ UFC တိုၵ်ႉမီး ၶၢဝ်းတၢင်း 5 ပီ။ တီႈပၢင်ၶႅင်ႇတွႆႇမူၺ်း UFC လၢႆလၢႆသႅၼ်းၼႆႉ မၼ်းၸၢႆး လႆႈၶဝ်ႈပႃးထုပ်ႉတွႆႇၶႅင်ႇ ၵၼ် 9ပၢင်သေ ပေႉ 8ပၢင် သုမ်း 1ပၢင်။ ယၢမ်းလဵဝ် ပဵၼ်မႃးၽူႈတွႆႇမူၺ်းလႆႈသၢႆႁတ်ႉၶျႅၼ်ႊပီႊယႅၼ်ႊသေ ပဵၼ်ၵူၼ်းၼုမ်ႇၸိုဝ်ႈလိုဝ်းလင်ဝႆႉၼိူဝ်လုမ်ႈၾႃႉ။