“ပၢင်လိူၵ်ႈတင်ႈၼႆႁႃႉ ႁဝ်းတႄႉတိုၼ်းဢမ်ႇဝူၼ်ႉတႃႇၵႂႃႇပၼ်မႄးႁႄဢိတ်းလႃႈ။ သူၼ်ၵေႃႈ ဢမ်ႇသူၼ်ၸႂ်၊ ဢမ်ႇတိုၼ်ႇတဵၼ်ႈၸွမ်းသင်။ ၵၢင်ၸႂ်ဢၼ်ၶႂ်ႈသႂ်ႇၶႅပ်းၵၢင်ၸႂ်ပၼ်တေႉတေႉၼၼ်ႉၵေႃႈ ဢမ်ႇမီးသေဢိတ်း” ၼႆ ၼၢင်းမၢတ်ႈ ၵူၼ်းၼုမ်ႇၵေႃႉတူင်ႉၼိုင်ႁဵတ်းၵၢၼ်တူင်ႇဝူင်းၵူၼ်း ၼႂ်းမိူင်းတႆးပွတ်းႁွင်ႇၵေႃႉၼိုင်ႈ ပိုတ်ႇဢူၵ်းပိုတ်ႇၸႂ် ပၢႆးၼႄတၢင်းႁၼ်ထိုင်မၼ်းဝႆႉၼင်ႇၼႆ။

သိုၵ်းမၢၼ်ႈယိုတ်းမိူင်း ဢၼ်မိၼ်းဢွင်ႇလၢႆႇဢွၼ်ႁူဝ်ဝႆႉၼႆႉ ဢဝ်ၶေႃႈဢၢင်ႈလွင်ႈဝၢၼ်ႈမိူင်းသုၵ်ႉဢူၼ် ပဵၼ်ပၢင်တိုၵ်းသိုၵ်းသိူဝ် ဢၼ်ၵိူတ်ႇပဵၼ်ပတ်းပိုၼ်ႉတူဝ်ႈၸိုင်ႈမိူင်းၼၼ်ႉ ႁဵတ်းၼႃႈတိူဝ်ႈသေ ၶိုင်ပွင်ၸတ်းႁဵတ်း ပၢင်လိူၵ်ႈတင်ႈ ပီ 2025 ၼႆႉ ႁႂ်ႈပေႃးလႆႈ။

ပိူဝ်ႈတႃႇသိုၵ်းမၢၼ်ႈတေသိုပ်ႇၵုမ်းၵမ်ယိပ်းဢႃႇၼႃႇၸိုင်ႈမိူင်းပဵၼ်တၢင်းၵၢၼ်ၵႂႃႇလႆႈၶၢဝ်းႁိုင်ၼၼ်ႉ မၼ်းၶိုင်ပွင်ၵူႈလၢႆးတၢင်းသေတႃႉ ၵူၼ်းမိူင်းၵမ်ႈၼမ်ဢမ်ႇသူၼ်ၸႂ်၊ ဢမ်ႇယွင်ႇ ၸွမ်းလွၵ်းလိင်ႉၵၢၼ်မိူင်းမၼ်းၼၼ်ႉလႃးလႃး။

ယွၼ်ႉၼၼ် ၼင်ႇႁိုဝ်ၵူၼ်းမိူင်းပေႃးတေသူၼ်ၸႂ် လႄႈ ၵႂႃႇပၼ်သဵင်ၵၢင်ၸႂ် ၼႂ်းဝၼ်းဢၼ်ၸတ်းႁဵတ်း ပၢင်လိူၵ်ႈတင်ႈ။ ၵွၼ်ႇၼႃႈပႆႇထိုင်ဝၼ်းပၼ်သဵင်ၵၢင်ၸႂ်တေႉၼၼ်ႉ သိုၵ်းမၢၼ်ႈၼႅတ်ႈၶပ်းၶိုင်ပိၼ်ႇလႅၵ်ႈ လၵ်းမိူင်းလၢႆလၢႆဢၼ်ၸွမ်းၼင်ႇၵၢင်ၸႂ်မၼ်းၶႂ်ႈပဵၼ်ၶႂ်ႈႁဵတ်းၼၼ်ႉသေ တီႉၺွပ်းလွၵ်ႇငိုတ်ႈမိပ်ႇငႅၼ်း ၵူၼ်းမိူင်း၊ ၼၢင်းၸိူင်း၊ ၸၢႆးၸိူင်းၸိုဝ်ႈလိုဝ်းလင် ႁႂ်ႈၵမ်ႉယၼ်ပၼ်ပၢင်လိူၵ်ႈတင်ႈ ၼႆယူႇ။

ၵၢၼ်တီႈၵူၼ်းမိူင်းဢမ်ႇသူၼ်ၸႂ်၊ ဢမ်ႇၶဝ်ႈၸႂ်၊ ဢမ်ႇတူင်ႉၼိုင်ၸွမ်းသင်၊ တဵတ်ႇယဵၼ်ဝႆႉ ၼႂ်းၶၵ်ႉၵၢၼ်ပၢင် လိူၵ်ႈတင်ႈ ဢၼ်သိုၵ်းမၢၼ်ႈတေၸတ်းႁဵတ်းၼႆႉၵေႃႈ ပဵၼ်လၢႆးတၢင်း ၼႄၵၢင်ၸႂ်တေႃႇသိုၵ်းမၢၼ်ႈ မဵဝ်းၼိုင်ႈယဝ်ႉ။

ပၢင်လိူၵ်ႈတင်ႈ ဢၼ်ထုၵ်ႇမႅၼ်ႈၸွမ်းတြႃး ဢၼ်ပႃးၵူႈမူႇၵူႈၸုမ်းၶဝ်ႈႁူမ်ႈလႆႈသေ ဢၼ်ၵူၼ်းမိူင်းၵမ်ႉထႅမ် ႁၼ်လီၸွမ်းၶႂ်ႈႁႂ်ႈႁဵတ်းၼႆႉ ယႃႇဝႃႈၶၢဝ်းၸမ်ထိုင် ဝၼ်းၸတ်းပၢင်လိူၵ်ႈတင်ႈၸိူင်ႉၼႆလႃႈ ၸဵမ်မိူဝ်ႈဝၼ်းပိုၼ်ၽၢဝ်ႇဢွၵ်ႇဝႃႈ တေပဵၼ်ၸတ်းႁဵတ်းပၢင်လိူၵ်ႈတင်ႈပတ်းပိုၼ်ႉမိူင်းယဝ်ႉၼႆၵူၺ်းၵေႃႈ ၵူၼ်းမိူင်းၵူႈသႅၼ်း၊ ၵူႈၸၢဝ်းၶိူဝ်းသမ်ႉပေႃးဢွၼ်ၵၼ် တိုၼ်ႇတဵၼ်ႈ မွင်းပႂ်ႉႁႂ်ႈထိုင်ဝၼ်းလိူၵ်ႈတင်ႈၼၼ်ႉဝႆးဝႆးယူႇယဝ်ႉ။

ၵူၺ်းၵႃႈ ပၢင်လိူၵ်ႈတင်ႈ ပီ 2025 ပွၵ်ႈၼႆႉတႄႉ ဢမ်ႇမီးလွင်ႈတိုၼ်ႇတဵၼ်ႈဢၼ်လီမူၼ်ႈတႃႇၵူၼ်းမိူင်း၊ တႃႇၵူႈၸၢဝ်းၶိူဝ်းသေ ဢဝ်လွင်ႈငမ်းငဝ်း လႄႈ လွင်ႈၵူဝ်ႁႄ မႃးတွၼ်ႈပၼ်တင်းပိုၵ်းၵူၺ်း။

ပၢင်လိူၵ်ႈတင်ႈပွၵ်ႈၼႆႉတႄႉ လႆႈဝႃႈပဵၼ်ပၢင်ပွႆး ဢၼ်ႁႅင်ႈႁဵဝ်ႇ လႄႈႁၢမ်းလွင်ႈယုမ်ႇယမ်ၼပ်ႉထိုဝ်တေႉတေႉ ၼၼ်ႉယဝ်ႉ။

တေႃႈၼင်ႇတီႈဝဵင်းလူင်ၼေႇပျီႇတေႃႇ ဢွင်ႈတီႈမီးၸဝ်ႈသိုၵ်းလူင်ၼႂ်းတပ်ႉသိုၵ်းၶဝ်ပၵ်းသဝ်းယူႇၼၼ်ႉ ၼေႃႇၽွင်းတႅၼ်းပႃႇတီႇၵၢၼ်မိူင်းၶဝ် ယင်းဢမ်ႇႁတ်းဢွၵ်ႇသူၼ်းတုမ် ၵူၼ်းမိူင်းတေႉတေႉဝႃႈဝႃႈလႄႈ တၢင်ႇတီႈမိူၼ်ၼင်ႇဢွင်ႈတီႈမီးၸုမ်းသိုၵ်းၸၢဝ်းၶိူဝ်း လႄႈ ၸုမ်းသိုၵ်းၵူၼ်းၼုမ်ႇမၢၼ်ႈ လုၵ်ႉၽိုၼ်ႉမၢၼ်ႈ ၶိုၼ်းၼၼ်ႉ ယိုင်ႈၶႅၼ်းၼႃႇယဝ်ႉဢေႃႈ။

ၸွမ်းၼင်ႇၸုမ်းတူင်ႉၼိုင်ႁဵတ်းသၢင်ႈၵၢၼ်တႃႇၵူၼ်းမိူင်း (Platform for People Movement) ၶဝ် ႁဵတ်း ၵၢၼ်တွင်ႈထၢမ်ၵူၼ်းမိူင်းပိုၼ်ႉတီႈ ၵဵဝ်ႇလူၺ်ႈပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၼမ်းၸတ်းႁဵတ်းၼႆႉ တွင်ႈထၢမ်တီႈၵူၼ်းမိူင်းႁူမ်ႈတုမ် တႃႇ 14 ၸႄႈမိူင်း လႄႈ တိူင်း၊ ၵူၼ်းမိူင်းႁူမ်ႈတုမ် ၸိူဝ်းႁွတ်ႈၵႂႃႇမီးဝႆႉ မိူင်းၼွၵ်ႈတႃႇ 3700 ၵေႃႉပၢႆၼၼ်ႉသေ တႃႇ 99 % ၼႆႉ ဢွၼ်ၵၼ်ပၼ်ၶေႃႈတွပ်ႇၽဵင်ႇၵၼ်ဝႃႈ “ပၢင်လိူၵ်ႈတင်ႈၼႆႉ ဢမ်ႇမီးလွင်ႈၽဵင်ႇပဵင်း” ၼႆယဝ်ႉ။

ၽိုၼ်ႁၢႆးငၢၼ်း သဵင်ၵၢင်ၸႂ်ၵူၼ်းမိူင်းပိုၼ်ႉတီႈ ဢၼ်ၸုမ်းတူင်ႉၼိုင်ႁဵတ်းသၢင်ႈၵၢၼ်တႃႇၵူၼ်းမိူင်း ပိုၼ်ဢွၵ်ႇၵႂႃႇမိူဝ်ႈဝၼ်းတီႈ 8 လိူၼ်ၼူဝ်ႊဝႅမ်ႊပိူဝ်ႊၼၼ်ႉ ယင်းၸႅင်ႈဝႆႉပႃးထႅင်ႈဝႃႈ “ပၢင်လိူၵ်ႈတင်ႈ ဢၼ်သိုၵ်းမၢၼ်ႈတေၶိုင်ၸတ်းႁဵတ်းယူႇယၢမ်းလဵဝ်ၼႆႉ ဢမ်ႇၸၢင်ႈၵႄႈလိတ်ႈလႆႈပၼ်ႁႃတၢင်းယၢပ်ႇၽိုတ်ႇ မိူင်းႁူမ်ႈတုမ်” ၼႆယဝ်ႉ။

ၼႂ်းမိူင်းတႆးပွတ်းႁွင်ႇ ၸွမ်းဝဵင်းလႃႈသဵဝ်ႈ လႄႈ ဝဵင်းမူႇၸေႊ ဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၵမ်းဢွၼ်တၢင်းသုတ်း ၸုပ်ႈၼိုင်ႈၼၼ်ႉ ဢမ်ႇႁၼ်ၼေႃႇၽွင်းတႅၼ်း ပႃႇတီႇၵၢၼ်မိူင်းၶဝ် လူင်းပိုၼ်ႉတီႈ ႁူၺ်းသူၼ်းသင်တေႉတေႉ။

ၵူၺ်းၵႃႈ ၸွမ်းမိူင်းမၢၼ်ႈထုင်ႉပဵင်း မိူၼ်ၼင်ႇ တီႈဝဵင်းလူင်ၼေႇပျီႇတေႃႇၶဝ်ၸိူဝ်းၼႆႉတႄႉ လုၵ်ႉတီႈၽူႈ ၵွၼ်းပွၵ်ႉ/ၵွၼ်းဢိူင်ႇၶဝ်သေ ပၢဝ်ႇသေႃႇႁွင်ႉဢဝ်ၵူၼ်းမိူင်း တဵၵ်းႁႂ်ႈၵႂႃႇ ထွမ်ႇၵႂႃႇၶဝ်ႈႁူမ်ႈၸွမ်း ၼႂ်းပၢင်သူၼ်းတုမ်ဢၼ်ၼေႃႇၽွင်းတႅၼ်းၶဝ်လူင်းပိုၼ်ႉတီႈႁဵတ်းၼၼ်ႉ ဝႃႈၼႆ။

ၼင်ႇႁိုဝ်ၵူၼ်းမိူင်းပေႃးတေမီးလွင်ႈသူၼ်ၸႂ်ၼိူဝ်ပၢင်လိူၵ်ႈတင်ႈသေ ၵႂႃႇၵူတ်ႇထတ်းတူၺ်း သဵၼ်ႈၸိုဝ်ႈ ၸဝ်ႈၵဝ်ႇၽႂ်မၼ်း ဢၼ်သိုၵ်းမၢၼ်ႈပိုၼ်ၽၢဝ်ႇဢွၵ်ႇဝႆႉၼၼ်ႉ သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၸွမ်း သိုဝ်ႇၵူႈၾၢႆႇ ဢၼ်ယူႇတႂ်ႈၵုမ်းၵမ်ၶဝ်ၼၼ်ႉ။

ၾၢႆႇၼိုင်ႈၵေႃႈ သိုၵ်းမၢၼ်ႈလွၵ်ႇငိုတ်ႈၵူၼ်းမိူင်းၵႂႃႇၼႂ်းလိၵ်ႈပိုၼ်ၽၢဝ်ႇၸိူဝ်းယူႇတႂ်ႈဢၢမ်းၼၢတ်ႈသိုၵ်းမၢၼ်ႈ ၼၼ်ႉၵူႈၽိုၼ်ၵူၺ်းဢမ်ႇၵႃး ၸီႉသင်ႇႁႂ်ႈၽူႈၵွၼ်းပွၵ်ႉ ၽူႈၵွၼ်းဢိူင်ႇ ၶဝ် ပၢဝ်ႇသေႃႇလၢတ်ႈႁႂ်ႈၵူၼ်းမိူင်း ပိုၼ်ႉတီႈ ၸိူဝ်းပႆႇမီးသဵၼ်ႈမၢႆမုင်ႉႁေႃႁိူၼ်းၼၼ်ႉ ႁႂ်ႈၵႂႃႇႁဵတ်း၊ ၵူၼ်းၸိူဝ်းမီးယဝ်ႉၼၼ်ႉသမ်ႉ ပေႃးၼႂ်းသဵၼ်ႈၸိုဝ်ႈတႃႇပၼ်သဵင်ၼႂ်းဝၼ်းပၢင်လိူၵ်ႈတင်ႈၼၼ်ႉ ပႆႇပႃးၸဝ်ႈၵဝ်ႇၸိုင် ႁႂ်ႈၵႂႃႇၸႅင်ႈ ၵႂႃႇလၢတ်ႈတီႈၸဝ်ႈၼႃႈတီႈၶဝ် ၼႆယဝ်ႉ။

ၼႂ်းၶၢဝ်းယၢမ်းလဵဝ်ၵၼ် ယၢမ်းသိုၵ်းမၢၼ်ႈ ၸႂ်ႉတိုဝ်းလွၵ်းၽႅၼ်ၵူႈလၢႆးတၢင်းသေ လွၵ်ႇငိုတ်ႈ၊ မိပ်ႇငႅၼ်း၊ ဢီးသူၼ်း၊ ၸီႉသင်ႇႁႂ်ႈၵူၼ်းမိူင်း တူင်ႉၼိုင်ၶဝ်ႈပႃးၸွမ်း ၼႂ်းၶၵ်ႉၵၢၼ်ပၢင်လိူၵ်ႈတင်ႈယူႇၼႆႉ ၽူႈလူင်ႉလႅၼ်ႇ ၾၢႆႇၵၢၼ်မိူင်း၊ ၵၢၼ်သိုၵ်းၸိူဝ်းၶတ်းၶၢၼ်ႉ ၸုမ်းသိုၵ်းမၢၼ်ႈ တင်း လူင်ပွင်ၸိုင်ႈမိူင်းၼွၵ်ႈလၢႆၸိုင်ႈမိူင်းၵေႃႈ ပိုၼ်ၽၢဝ်ႇဢွၵ်ႇလွင်ႈဝႃႈဢမ်ႇႁၼ်လီ သၢၼ်ၶတ်းၼိူဝ် ပၢင်လိူၵ်ႈတင်ႈၼႆႉ ၼႆယူႇ။

ၵူၼ်းမိူင်းႁူမ်ႈတုမ် ၸိူဝ်းသၢၼ်ၶတ်း လႄႈ သေႉသွမ်းၼိူဝ် လူင်ပွင်ၸိုင်ႈသိုၵ်းမၢၼ်ႈ၊ သေႃႇသူၼ်း ယႃႉၵဝ်း ႁႂ်ႈပၢင်လိူၵ်ႈတင်ႈဢၼ်သိုၵ်းမၢၼ်ႈ တေၼမ်းၸတ်းၼႆႉလူႉၵွႆၵႂႃႇၼၼ်ႉ သိုၵ်းမၢၼ်ႈယိုတ်းမိူင်း မၵ်းမၼ်ႈဝႃႈ ပဵၼ်ၵူၼ်းသၢၼ်ၶတ်းၼိူဝ်ပၢင်လိူၵ်ႈတင်ႈ၊ ပဵၼ်ၵူၼ်းမီးပၢႆးဝူၼ်ႉၵေႃႇၵၢၼ်ႁၢႆႉတေႃႇဝၢၼ်ႈမိူင်းၼႆသေ တီႉၺွပ်းယဵတ်ႈၶွၵ်ႈၶင် ဢဝ်ၶိုၼ်ႈလုမ်းတြႃး တႅပ်းတတ်း ႁႂ်ႈတူၵ်းတၢမ်ႇၶွၵ်ႈၶင် တႃႇ 50 ပီ ၵိုင်ႇငၢမ်ႇ ၵၼ်တင်း ၼိုင်ႈၶိုင်ႈၸူဝ်ႈပၢၼ်ၵူၼ်းသေ ႁဵတ်းႁၢႆႉယႃႉသုၼ်ႇလႆႈပေႉၵိၼ်ၵူၼ်းမိူင်းယူႇႁၢဝ်ႈႁႅင်း ၼၼ်ႉယဝ်ႉ။

သိုၵ်းမၢၼ်ႈ မိပ်ႇငႅၼ်းႁႂ်ႈလုၵ်ႈႁဵၼ်းၸၼ်ႉၸွမ်ၶဝ် ပၼ်သဵင်ၵၢင်ၸႂ်လူင်ႈၼႃႈ လုၵ်ႈႁဵၼ်းၸၼ်ႉၸွမ် ၸိူဝ်းဢႃႇယုတဵမ် 18 ပီယဝ်ႉၼၼ်ႉ သိုၵ်းမၢၼ်ႈတဵၵ်းတဵင်ႁႂ်ႈၵႂႃႇပၼ်သဵင်ၵၢင် ၸႂ်လူင်ႈၼႃႈ တင်းသဵင်ႈ ၸဵမ်ယိင်း ၸဵမ်ၸၢႆး ၼႆယဝ်ႉ။

ဢၼ်လမ်ႇလွင်ႈလႄႈလၢၵ်ႇလၢႆးသုတ်းတႄႉ လုၵ်ႈႁဵၼ်းၸၼ်ႉၸွမ်ၸိူဝ်းတေလႆႈပၼ်သဵင်လူင်ႈၼႃႈၵမ်ႈၼမ်ၼႆႉ ပဵၼ်ၵူၼ်းၸိူဝ်းဢမ်ႇပႆႇမီးတူဝ်ထူပ်းလွင်ႈပၢင်လိူၵ်ႈတင်ႈသေ ဢိတ်းၵူၺ်းဢမ်ႇၵႃး လွင်ႈပိူင်ပၼ်သဵင်၊ လွင်ႈပႃႇတီႇ လႄႈ ၼေႃႇၽွင်းတႅၼ်း ဢၼ်ၶဝ်တေလႆႈပၼ်သဵင်ၼၼ်ႉၵေႃႈ ဢမ်ႇႁူႉၸၵ်းသေဢိတ်းၼႆယဝ်ႉ။

လုၵ်ႈႁဵၼ်းၸၼ်ႉၸွမ် ၼၢင်းယိင်း ဢႃႇယု 18 ပီ ၵေႃႉႁဵၼ်းယူႇ ၼႂ်းမိူင်းတႆးပွတ်းၸၢၼ်း လၢတ်ႈၼႄဝႃႈ-“တေလႆႈပၼ်သဵင်ၸိူင်ႉႁိုဝ်ၵေႃႈဢမ်ႇႁူႉ။ လွင်ႈပႃႇတီႇ လႄႈ ၵူၼ်းၸိူဝ်းတေလူင်းလိူၵ်ႈတင်ႈ (ၼေႃႇၽွင်း တႅၼ်း) ၸိူဝ်းၼႆႉၵေႃႈ ႁဝ်းဢမ်ႇႁူႉၸၵ်း။ တေလႆႈပၼ်ၶႅပ်းၵၢင်ၸႂ်ဢိူဝ်ႈၼႆသေ ၶဝ်မႃးႁွင်ႉႁဝ်းၵႂႃႇတီႈ လုမ်းၵမ်းသိုဝ်ႈ။ တီႈၸၼ်ႉၸွမ်ၵေႃႈဝႃႈ ပေႃးဢမ်ႇပႆႇၵႂႃႇပၼ်သဵင်ယဝ်ႉၼႆႉ တေဢမ်ႇႁပ်ႉၼႆဝႃႇ။ ၵွပ်ႈၼၼ်လႄႈ ႁဝ်းၸင်ႇလႆႈၵႂႃႇပၼ်သဵင်မႃး။”

တႃႇလုၵ်ႈႁဵၼ်းၸၼ်ႉၸွမ်ပေႃးတေၵႂႃႇပၼ်သဵင်ၵူႈၵေႃႉၼႆႉ မီးၶၢဝ်ႇႁူင်လိုဝ်းဢွၵ်ႇမႃးဝႃႈ ၾၢႆႇၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် တႂ်ႈဢႃႇၼႃႇဢၢမ်းၼၢတ်ႈသိုၵ်းမၢၼ်ႈယိုတ်းမိူင်းၶဝ်ၵုမ်းၵမ်ဝႆႉၼၼ်ႉ မၵ်းမၼ်ႈ ပိုၼ်ၽၢဝ်ႇဢွၵ်ႇဝႆႉဝႃႈ ၽွင်းလုၵ်ႈႁဵၼ်းၸၼ်ႉၸွမ် ၵႂႃႇယိုၼ်ႈၸိုဝ်ႈသႂ်ႇသဵၼ်ႈမၢႆ တႃႇၶိုၼ်ႈႁဵၼ်းၸၼ်ႉၸွမ် (ၽွင်းၵႂႃႇဢၢပ်ႈၵျွင်း) ၼၼ်ႉ တေလႆႈမီးပႃး ဝႂ်ယိုၼ်ယၼ် ဢၼ်ပၼ်သဵင်ၵၢင်ၸႂ်ယဝ်ႉၼၼ်ႉၸင်ႇႁပ်ႉၶဝ်ႈ ႁဵၼ်းသွၼ်လႆႈ ၼႂ်းၸၼ်ႉၸွမ် ၼႆယဝ်ႉ။

ၵူၺ်းၵႃႈ လွင်ႈၼႆႉ ၾၢႆႇၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈတႄႉ ယိုၼ်ယၼ်လၢတ်ႈတီႈသိုဝ်ႇၶၢဝ်ႇမိူင်းၼွၵ်ႈ ၸုမ်းၼိုင်ႈဝႆႉဝႃႈ ဢမ်ႇထုၵ်ႇမႅၼ်ႈ ၼႆယူႇ။

မိူဝ်ႈပူၼ်ႉမႃးပၢင်လိူၵ်ႈတင်ႈ ပီ 2020 ၼႆႉ ၸွမ်းသဵၼ်ႈတၢင်းၼႂ်းဝၢၼ်ႈ၊ ၼႂ်းဢိူင်ႇ၊ ၼႂ်းဝဵင်းၸိူဝ်းတေၸတ်း ႁဵတ်းပၢင်လိူၵ်ႈတင်ႈ ဢွၼ်ၵၼ်ပူၵ်းပၢႆႉဢၼ်ပႃးၸိုဝ်ႈပႃႇတီႇ လႄႈ ႁၢင်ႈ ၾၢင်ၼေႃႇၽွင်းတႅၼ်း ဝဵင်းလႂ် ဝဵင်း ၼၼ်ႉ ႁင်းၽႂ်မၼ်း သမ်ႉပေႃးလၢႆးၸၢင်ႉလၢႆးၸေ။ တင်းပၢင်လိူၵ်ႈတင်ႈ ပီ 2025 ဢၼ်သိုၵ်းမၢၼ်ႈ ယိုတ်းမိူင်း တေၼမ်းၸတ်းႁဵတ်းပွၵ်ႈၼႆႉသေ ၾၢင်ႁၢင်ႈမၼ်း ဢွၵ်ႇမႃးပိူင်ႈၵၼ်  ၾႃႉ လႄႈ လိၼ်။