ပေႃးထိုင်ၼႂ်းမိူင်းထႆးသေ ႁွတ်ႈၽႅဝ်ဝဵင်းၵဵင်ႈမႂ်ႇ – ၵဵင်းႁၢႆးမိူဝ်ႈလႂ်ဢမ်ႇဝႃႈ-ပေႃးလႆႈလတ်းလဵပ်ႈၵႂႃႇႁိမ်းႁုၼ်ႇႁၢင်ႈတွင်း လူင်ပေႃႈၶုၼ်မင်းရၢႆး (ၵဵင်းႁၢႆး) လႄႈသင်၊ ႁိမ်း ႁုၼ်ႇႁၢင်ႈႁေႃၶမ်းသၢမ်ၸဝ်ႈ-ပေႃႈၶုၼ်ၽႃမိူင်း၊ ပေႃႈၶုၼ်ငမ်းမိူင်းလႄႈပေႃႈၶုၼ်မင်းရၢႆး (ၵဵင်းမႂ်ႇ) လႄႈသင်-ယုၵ်ႉမိုဝ်းၼပ်ႉယမ်တၵ်ႉဝႆႈတႃႇသေႇ။

ၵွပ်ႈသင်?။ မိူင်းပိူၼ်ႈဢမ်ႇလႆႈပဵၼ်ၶီႈၶႃႈၵူၼ်းတၢင်ႇၸၢတ်ႈလႂ် ၸိူင်ႉၼင်ႇ ၵူၼ်း မိူင်းတႆး ႁဝ်းသေပိူၼ်ႈမီးဝၢၼ်ႈမီးမိူင်း ပူတ်းပွႆႇလွတ်ႈလႅဝ်းသဝ်းၶေႃ ထၢင်ႇႁၢင်ႈၵတ်းယဵၼ်ၶိုၼ်ႈယႂ်ႇမႃးၼႆႉ ၵွပ်ႈပိူဝ်ႈပိူၼ်ႈမီးၽူႈဢွၼ်ႁူဝ်လီ၊ၽူႈဢွၼ်ႁူဝ်ၵတ်ႉၶႅၼ်ႇ၊ ၽူႈဢွၼ်ႁူဝ်ၸႅတ်ႈၸၢင်ႇ၊ ၽူႈ ဢွၼ်ႁူဝ်ႁၵ်ႉၸိူဝ်ႉၸၢတ်ႈတႄႉတႄႉ- ဢၼ်ၸုၼ်ႉ ပုၼ်ႈလီ သုၼ်ႇတူဝ်၊ ဢၼ်ဝူၼ်ႉလိုၵ်ႉတူၺ်း ယၢဝ်းႁၼ်ၵႆၸႂ်ၵႂၢင်ႈ၊ ဢၼ်မေႃဢီးလူ တူၺ်းထိုင် ၶႃႈဝၢၼ်ႈ ၵူၼ်းမိူင်း( ဢၼ်ဢမ်ႇယွင်ႇမဝ်းဢႃႇ ၼႃႇႁူမဝ် ထွမ်ႇၵႂၢမ်းယုမ်ႇငၢႆႈ မႅင်းမူၼ်း-မတ်းမဵၼ်း-ႁႆး-ႁိမ်းႁွမ်း၊ ဢၼ်ဢမ်ႇတွၼ်ႉတဵၵ်း တဵင် ၸႅၵ်ႇၽႄ ထၢင်ႇလဵၵ်ႉ၊ ၼဵပ်းၸွၵ်ႉယၢင်ႈၶႃႇ ၽူႈၼမ်း ၵၢၼ်ၽူႈမီးၸၼ်ႉ) ၼၼ်ႉယဝ်ႉ။

မိူၼ်ၼင်ႇၽူႈၶဵၼ်ၸိူဝ်ႉၸၢတ်ႈႁဝ်းဢၼ်ပဵၼ်မၢၼ်ႈၽူႈၶႂၢၵ်ႈမိူင်းၶဝ်ၼႆၵေႃႈၶဝ်မီးၽူႈဢွၼ်ႁူဝ်လီၸိူင်ႉၼင်ႇ ပယိၼ်ႉၼွင်ႇ၊ ဢလွင်းၽယႃး၊ ပၼ်ႇတုလ၊ ဢွင်ႇသၢၼ်းၸိူဝ်းၼႆႉ လႄႈၶဝ် ၸင်ႇ လႆႈလွတ်ႈလႅဝ်းၵွၼ်းၶေႃထၢင်ႇႁၢင်ႈၶႂၢၵ်ႈလိၼ် ပေႉၵိၼ်ႁဵတ်းၶုၼ်ၼိူဝ်ႁဝ်းႁႃးမႃးႁၢၼ်ႉ တေႃႇယၢမ်းလဵဝ်။ ၵွပ်ႈၼၼ် ႁုၼ်ႇႁၢင်ႈၶုၼ်ႁေႃၶမ်း – ၽူႈဢွၼ်ႁူဝ်ဢၼ်ၶႅၵ်းတွင်ႈ သွၼ်း လေႃႇ ၶဝ်ၵေႃႈ မၢၼ်ႈၶဝ်ႁဵတ်းဝႆႉၸွမ်းဝဵင်းယႂ်ႇဝဵင်းလူင်တီႈမိူင်းမၢၼ်ႈၶဝ်ၵူႈတီႈတီႈဢမ်ႇၵႃး  ပေႃးလၢမ်း မႃးယဵပ်ႇယမ်ႈ တမ်းပၵ်းဝႆႉတီႈၼိူဝ်ၽႅၼ်ႇလိၼ်မႄႈမိူင်းတႆးႁဝ်းလၢႆလၢႆတီႈယဝ်ႉ။

လၢႆးလုၵ်ႉၽိုၼ်ႉႁဵတ်းၵၢၼ်ၸိူဝ်ႉၸၢတ်ႈႁဝ်းၶၢဝ်းတၢင်း 30-40 သမ်ႉဝႃႈႁဝ်း ယၢမ်ႈ မီးၽူႈဢွၼ်ႁူဝ်လီလၢႆသိုပ်ႇလၢႆပၢၼ်မႃးၸိူင်ႉၼင်ႇ-ၸဝ်ႈငႃးၶမ်း၊ ၸဝ်ႈၸၢမ်ႇမိူင်း၊ ၸဝ်ႈ ပိုၼ်းတႆး၊ ၸဝ်ႈၸၢမ်ႇလဵၵ်း၊ၸဝ်းၵွၼ်းၸိူင်းၶဝ်ၸဝ်ႈၸိူဝ်းၼႆႉမႃးသေတႃႉၵေႃႈ ဢႃႇယုသၢႆၸႂ်ၸီႇ ဝိတ်ႉတၶဝ်ၸဝ်ႈသမ်ႉဢမ်ႇလႆႈယိုၼ်းယၢဝ်း၊ လႆႈတူၵ်းသုမ်းတၢႆၼမ်ႉတိုၼ်ႈၵႂႃႇလႄႈဢဝ် ၵၢၼ်ၸိူဝ်ႉၸၢတ်ႈႁဝ်းတိူဝ်ႉသၢင်ႈ ပုတ်းပင်းၵႂႃႇၼမ်တႄႉတႄႉ။

ၼႂ်းၵၢပ်ႈပၢၼ်ယၢမ်းလဵဝ်ၼႆႉ သင်ဝႃႈႁဝ်းမီးမႃးၽူႈဢွၼ်ႁူဝ်လီၸိူင်ႉၼင်ႇ ၸဝ်ႈ သိူဝ် ၶၢၼ်ႇၾႃႉ၊သိူဝ်ႁၢၼ်ၾႃႉ၊ ၸဝ်ႈထုၼ်းယဵၼ်ႇၼွင်ဝွၼ်ၶဝ်၊ သင်ဝႃႈႁဝ်း မီးမိူၼ် ၼင်ႇၸဝ်ႈၼရေးသူၼ်၊ ၸဝ်ႈတၢၵ်ႇသိၼ် (ၶွင်ၸိူဝ်ႉၸၢတ်ႈထႆး) ၶဝ်ၼႆၸိုင် ႁဝ်းၵေႃႈတေလႆႈ ယုၵ်ႉ မိုဝ်းၼပ်ႉ ယမ်တၵ်ႉဝႆႈယွင်ႈၵုင်ႇဢဝ်မုၼ်သေၵႃႈႁိုဝ်?။

ၵွပ်ႈပိူဝ်ႈႁဝ်းတိုၵ်ႉလႆႈၶွႆလႆႈဢၢမ်းပိူၼ်ႈ တိုၵ်ႉလႆႈဝူၼ်ႉၾၼ်ၸႂ်ယႂ်ႇ ၶႂ်ႈမီးၶႂ်ႈႁၼ်ၶႂ်ႈလႆႈၽူႈဢွၼ်ႁူဝ်လီ ၸိူင်ႉၼင်ႇပိူၼ်ႈလႄႈ-ၸင်ႇလႆႈၼပ်ႉ ယမ်တၵ်ႉဝႆႈႁုၼ်ႇႁၢင်ႈၶုၼ်ဢွၼ်ႁူဝ်မိူင်းပိူၼ်ႈၼၼ်ႉယဝ်ႉ။

ၽူႈဢွၼ်ႁူဝ်လီၼႆႉႁဝ်းတေၵႂႃႇႁႃတီႈလႂ် မိူဝ်ႈလႂ် ၸိူင်ႉႁိုဝ်?။ ထၢမ်တူၺ်းတူဝ်ၸႂ်ၸဝ်ႈ ၵဝ်ႇသေ ဝူၼ်ႉႁႃတွပ်ႇၵႄႈပွင်ႇၸႂ်ဢဝ်ႁင်းၸဝ်ႈၵဝ်ႇ ၵူၺ်းၼၼ်ႉ ထုၵ်ႇမႅၼ်ႈလိူဝ်ပိူၼ်ႈသုတ်း ယဝ်ႉ။

ဝၼ်း႞ၸဝ်ႉၸဝ်ႉ- ၼိူဝ်ၽႅၼ်ႇလိၼ်ၸိုင်ႈတႆးႁဝ်းၵေႃႈတၵ်းတေလႆႈမီးႁုၼ်ႇႁၢင်ႈ တွင်းလေႃႇၽူႈဢွၼ်ႁူဝ်လီ မိူၼ်ပိူၼ်ႈႁႂ်ႈၵူၼ်းမိူင်းႁဝ်းၵူႈၸၢဝ်းၶိူဝ်းလႆႈ ယုၵ်ႉမိုဝ်းၼပ်ႉ ယမ် တၵ်ႉဝႆႈၼၼ်ႉယူႇဢမ်ႇႁၢင်ႉ။

ယုမ်ႇယမ်ၾင်ၸႂ်ဝႆႉႁင်းၽႂ်မၼ်းၼင်ႇၼႆသေ ၸွမ်းၼင်ႇၼမ်ႉၵတ်ႉတူဝ်ၵဝ်ႇမီး ဝႆႉဝႃႈ လႆႈပွင်ပဵၼ်ဝႆႉၼၼ်ႉဢွၼ်ၵၼ်ဝူၼ်ႉ-လၢတ်ႈ-ႁဵတ်းတႃႇပုၼ်ႈၸိူဝ်ႉ ၸၢတ်ႈၵၼ်ၵူႈၵေႃႉ ၶိင်း ၵူၼ်းတႃႉ။

သွႆႈၶမ်းႁိူင်း (11.7.96)

ပပ်ႉၵွၼ်းၶေႃမၢႆ 144