ၵူၼ်းၵူႈၵေႃႉၼႆႉ ဢိင်ၼိူဝ်တူဝ်ထူပ်းၽႂ်မၼ်းသေ ၸၢင်ႈလႆႈပဵၼ်ၽူႈၼမ်းသေၸုမ်းၸုမ်း သေတီႈတီႈ ဢမ်ႇတွၼ်ႈၼိုင်ႈၵေႃႈ တွၼ်ႈၼိုင်ႈ ။ မၢင်ၵေႃႉဢၢင်ၸိုဝ်ႈဝႃႈ ပဵၼ်ၽူႈၼမ်း (ၽူႈဢွၼ်ႁူဝ်) ၼႆသေ ယူႇၼိူဝ်ပိူၼ်ႈ ၊ ၶႂ်ႈပေႉပုၼ်ႈပိူၼ်ႈ ၶႂ်ႈႁဵတ်းသြႃႇပိူၼ်ႈ ၊ ၵိၼ်ၸိၵ်းတွၵ်ႇၸွၵ်းၼိူဝ်ၵူၼ်းဢၼ်ယူႇတႂ်ႈၸဝ်ႈၵဝ်ႇ ပေႉၵိၼ်လူလၢႆ ၵူၼ်းၸွမ်းလင်ၸိူဝ်းၼႆႉ ၵေႃႈမီး။ ၼၼ်ႉ ဢမ်ႇၵိုင်ႇထိူၵ်ႈႁွင်ႉဝႃႈ ၽူႈၼမ်း ။ ပဵၼ်ၵူၼ်း ဢၼ်မီး ၼမ်ႉၵတ်ႉၽူႈၼမ်း Leadership ဢေႇမၢင် ၼႆၵေႃႈ ဝႃႈလႆႈ ။ ၸင်ႇၼၼ်လႄႈ ၵူႈၵေႃႉ ၵိုင်ႇလီႁူႉဝႆႉဝႃႈ ၼမ်ႉၵတ်ႉၽူႈၼမ်းလႄႈ ၵူၼ်းၶႂ်ႈႁဵတ်းသြႃႇပိူၼ်ႈ ၶႂ်ႈပေႉပုၼ်ႈပိူၼ်ႈ ၶႂ်ႈပဵၼ် Boss ပိူၼ်ႈၸိူဝ်းၼႆႉ မၼ်းဢမ်ႇမိူၼ်ၵၼ် ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ ။

ၼႂ်းတူင်ႇဝူင်း ဢၼ်ႁၼ်ယူႇၵူႈဝၼ်းၼႆႉ ၸွင်ႇၽႂ်ယၢမ်ႈႁၼ် ၽူႈၼမ်းၶႃႈႁိုဝ် ၊ ၸွင်ႇယၢမ်ႈႁၼ် ၵူၼ်းဢၼ်ဝႃႈ တူဝ်ၵဝ်ႇ ပဵၼ်ၽူႈၼမ်းသေ ၶႂ်ႈယူႇၼိူဝ် ၶႂ်ႈပေႉပုၼ်ႈတၢင်ႇၵေႃႉယူႇသေႇသေႇ ႁိုဝ်။
ပဵၼ်ၽူႈၼမ်းၼႆသေ တေၶႂ်ႈယဵပ်ႇယမ်ႈႁူဝ်ပိူၼ်ႈလူင်ၵႂႃႇတႄႉ ပႆႇတူၵ်းထုၵ်ႇ ။ လွင်ႈႁဵတ်းသၢင်ႈဢၼ်ၼႆႉ ဢမ်ႇၸႂ်ႈၽူႈၼမ်း ပဵၼ်ၵၢၼ်လူလၢႆၵၼ်ၵူၺ်း ။ ၼႂ်းပၢႆးဝူၼ်ႉ ၵူၼ်းၸိူဝ်းဢၼ်ၶႂ်ႈယူႇၼိူဝ်ပိူၼ်ႈၼၼ်ႉ ၵမ်ႈၼမ် တေမီးဝႃႈ ၶဝ်ဢွၼ်ၼမ်း ၶဝ်ပဵၼ်ၽူႈၼမ်းၼႆ လွၼ်ႉလွၼ်ႉ ၊ ၶႂ်ႈၸႂ်ႉဢႃႇၼႃႇ ၊ ၿႃႇဝႃႇ သေ ႁေႃႈ လိုပ်ႈ ႁိုတ်း ထႃႉ လႃႇ သေ ၸႂ်ႉၵူၼ်းႁဵတ်းၸွမ်းၼင်ႇၶဝ်ၶႂ်ႈပဵၼ်ၼၼ်ႉ ။ ၸိူင်ႉၼႆ ဢမ်ႇၸႂ်ႈ ၼမ်ႉၵတ်ႉၽူႈၼမ်း ဢၼ်ႁွင်ႉဝႃႈ Leadership ၊ ပဵၼ်ၵူၼ်းဢၼ်ၶႂ်ႈယူႇၼိူဝ်ပိူၼ်ႈ ၶႂ်ႈပဵၼ် Boss ပိူၼ်ႈၵူၺ်း _ ၼႆ ၽူႈလဵပ်ႈႁဵၼ်းပၢႆးၸႂ်ၵေႃႉၼိုင်ႈလၢတ်ႈၼင်ႇၼႆ။

1)ၽူႈၼမ်းဢၼ်ဝႃႈၼႆႉ ပဵၼ်ၵူၼ်းဢၼ် မေႃပၼ်ႁႅင်း ၊ မေႃယုၵ်ႉမုၼ်းၼမ်ႉၵတ်ႉပၼ်ၵူၼ်းၸွမ်းလင် ၊ မေႃၸီႉၼႄသဵၼ်ႈတၢင်းၵူၼ်းၸွမ်းလင် ႁႂ်ႈထိုင်တီႈဢွင်ႇမၢၼ် ။ ၽူႈၼမ်းၼႆႉ တေသႂ်ႇၸႂ် ဢွၼ်ႁဵတ်း ဢွၼ်ၼမ်း ၊ Boss ႁိုဝ် ၵူၼ်းဢၼ်ၶႂ်ႈႁဵတ်းသြႃႇပိူၼ်ႈသမ်ႉ တေဢဝ်ႁႅင်းႁိပ်ႇ ႁေႃႈ လိုပ်ႈ သေ ပၼ်ႇၵၢၼ် ။

ၵူၼ်းဢၼ်ႁဵတ်းၵၢၼ်ၸွမ်းၸဝ်ႈၵဝ်ႇ ဢၼ်ယူႇတႂ်ႈၸဝ်ႈၵဝ်ႇၼၼ်ႉ ၵိုင်ႇလီဝူၼ်ႉဝႃႈ ပဵၼ်ၽူႈႁူမ်ႈၽၢၵ်ႈၼႃႈၵၢၼ် ၊ပဵၼ် partner တူဝ်ၵဝ်ႇ ။ ၵူၺ်းၵႃႈ ၵူၼ်းဢၼ်ၶႂ်ႈႁဵတ်းသြႃႇပိူၼ်ႈ ၶႂ်ႈပေႉပုၼ်ႈပိူၼ်ႈတႄႉ တေဢမ်ႇဝူၼ်ႉဝႃႈၼၼ် ၼႂ်းပၢႆးဝူၼ်ႉၶဝ် တေဝႃႈ ၵူၼ်းဢၼ်ႁူမ်ႈႁဵတ်းၵၢၼ်ၸွမ်းၼၼ်ႉ ပဵၼ်ၵူၼ်းတႃႇၸႂ်ႉသွႆ တႂ်ႈတႂ်ႈၼိူဝ်ၼိူဝ်ၼႆၼၼ်ႉၵူၺ်း ။

ၸိူဝ်းမီးငိုၼ်းၶမ်းလူၼ်ႉလိူဝ် ၊ ၸိူဝ်းမီးဢႃႇၼႃႇႁႅင်းပွင် ၊ Boss ၸိူဝ်းၼႆႉ မၢင်ၸိူဝ်း တေမၵ်းမၼ်ႈဝႃႈ ၵူၼ်းဢၼ်ၶဝ်ဢဝ်ငိုၼ်းၸၢင်ႈမႃးၼၼ်ႉ တႃႇၸႂ်ႉတႃႇသွႆ ၊ တႃႇထွမ်ႇဢဝ်ၵႂၢမ်းၵူႈၶေႃႈၵူႈၶူတ်း ။ ၵူၼ်းဢၼ်မီးၼမ်ႉၸႂ်ၽူႈၼမ်းတႄႉ မၵ်းမၼ်ႈဝႃႈ ၵူၼ်းဢၼ်မႃးႁဵတ်းၵၢၼ်ၸွမ်းၼၼ်ႉ ပဵၼ်ၵူၼ်းဢၼ်ႁူမ်ႈသၢင်ႈပၼ်ႇၵၢၼ်ၸွမ်းၵၼ် တႃႇထိုင်ယိူင်းမၢႆ ၊ တေမၵ်းမၼ်ႈဝႃႈ ၵူၼ်းၼႂ်းၸုမ်းလမ်ႇလွင်ႈၵူႈၵေႃႉ ။ ၸင်ႇၼၼ်လႄႈ ၵူၼ်းမီးတၢင်းႁူႉၶဝ်လၢတ်ႈဝႃႈ ၵူၼ်းမီးၼမ်ႉၵတ်ႉၽူႈၼမ်းၼႆႉ တေၸႂ်ႉၶေႃႈၵႂၢမ်းဢၼ်ဝႃႈ Lead (ဢၼ်ဢွၼ်ႁဵတ်းဢွၼ်သၢင်ႈ ) ၊ ၵူၼ်းၶႂ်ႈႁဵတ်းသြႃႇပိူၼ်ႈ ႁိုဝ် Boss ၸိူဝ်းၼႆႉသမ်ႉ တေၸႂ်ႉၶေႃႈၵႂၢမ်းဝႃႈ Drive ( ၵွပ်ႈဝႃႈ ႁေႃႈႁေႃႈ လိုပ်ႈလိုပ်ႈသေပၼ်ႇၵၢၼ်) ၼႆယူႇ။

2)ၽူႈၼမ်းၼႆႉ တေမေႃပိုတ်ႇတၢင်းပၼ် ၵူၼ်းၸွမ်းလင် ၊ ၵူၼ်းၶႂ်ႈယူႇၼိူဝ်ပိူၼ်ႈသမ်ႉ တေဢိုတ်းပႅတ်ႈသဵၼ်ႈတၢင်းၶိုၼ်ႈယႂ်ႇ ၵူၼ်းၾၢႆႇလင် ဢမ်ႇၶႂ်ႈႁႂ်ႈၵူၼ်းယူႇလင်ႁုၼ်ႈမုၼ်းၶိုၼ်ႈယႂ်ႇ ။
ၽူႈၼမ်းၸႅတ်ႈၸၢင်ႇၼႆႉ ၶႂ်ႈႁႂ်ႈၵူၼ်းယူႇလင် ၶိုၼ်ႈယႂ်ႇမႂ်ႇသုင် ၊ ပၼ်ႁႅင်းဢီးႁႂ်ႈႁွတ်ႈယိူင်းမၢႆယူႇသေႇသေႇ ။

ၸႂ်ဢၼ်ႁႄႉတၢင်းၶိုၼ်ႈယႂ်ႇ ၵူၼ်းၸွမ်းလင် ၊ ဢၼ်ၵူဝ်ၵူၼ်းယူႇၾၢႆႇလင် လီတွၼ်းလိူဝ်တူဝ်ၵဝ်ႇၼၼ်ႉ ပဵၼ်ၵူၼ်းၶႂ်ႈႁဵတ်းသြႃႇပိူၼ်ႈ ၶႂ်ႈပေႉပုၼ်ႈပိူၼ်ႈ ၶႂ်ႈပဵၼ် Boss ပိူၼ်ႈၵူၺ်း ။
ၽူႈၼမ်းလီၼႆႉ သင်ပဵၼ်ၼူၵ်ႉၵေႃႈ ၼင်ႇႁိုဝ် တေမိၼ်လႆႈသုင်ၼၼ်ႉ တေၾိုၵ်းၽွၼ်ႉပၼ် တေသွၼ်ပၼ်ႁႂ်ႈထိုင်တီႈ ၊ သင်ပဵၼ်ၵူၼ်းဢၼ်ၶႂ်ႈယူႇၼိူဝ်ပိူၼ်ႈၵူၺ်းတႄႉ ၼင်ႇႁိုဝ် တေဢမ်ႇမိၼ်သုင်လႆႈၼၼ်ႉ တေႁၵ်းပႅတ်ႈပိၵ်ႇပိူၼ်ႈ ၊ တေဢမ်ႇႁဵတ်း/ၾိုၵ်းပၼ်ႁႂ်ႈပိၵ်ႇၶႅင်လႆႈသေပွၵ်ႈ ။ မႆႈၸႂ် ၵူဝ်ပိူၼ်ႈမိၼ်သုင်လိူဝ်ပႅတ်ႈလူးၵွၼ်ႇ။

ၽူႈၼမ်းၸႅတ်ႈၸၢင်ႇၼႆႉ ယိင်ႈၵူၼ်းလုၼ်ႈလင် မိၼ်ၶိုၼ်ႈသုင် ယိင်ႈႁူမ်ၸူမ်းလႄႈပဵၼ်ၸႂ်ပီႇတိ ၸွမ်း ။ မီးၸႂ် ၶႂ်ႈထႅမ်ၼမ်ႉၵတ်ႉပၼ်ၵူၼ်းပႃႈလင် ။ ၶႂ်ႈႁႂ်ႈၵူၼ်းပႃႈလင် ၵတ်ႉၶႅၼ်ႇလူင်ႉလႅၼ်ႇ ၶႂ်ႈႁႂ်ႈ ၵူၼ်းၸွမ်းလင် ပဵၼ်ၵူၼ်းပုတ်ႈတိၼ်တၢင်မိုဝ်းလႆႈ။
3)ၵူၼ်းဢၼ်ၶႂ်ႈယူႇၼိူဝ်ပိူၼ်ႈ Boss ပိူၼ်ႈၼႆႉ ၵမ်ႈၼမ် တေၶႂ်ႈဢဝ် တၼ်းႁဵင်း ၸၼ်ႉထၢၼ် လႄႈ ဢၢမ်းၼၢတ်ႈ သေ ယိပ်းၵမ်ၵူၼ်းၸွမ်းလင်ဝႆႉ ။ ဢဝ်ဢၢမ်းၼၢတ်ႈ ၼႂ်းတၼ်းႁဵင်း ၼႂ်းၸၼ်ႉထၢၼ်သေ ယိပ်းၵမ်ၵူၼ်းၸွမ်းလင်ၸဝ်ႈၵဝ်ႇဝႆႉ ။
ၵူၼ်းၸိူဝ်းယူႇလင်ၵေႃႈ ၵႃႈၼင်ႇဢၼ် Boss သင်ႇၼၼ်ႉ တေႁဵတ်းၸွမ်းၵူႈၶေႃႈ ။ ဝႃႈၼၼ်သေတႃႉ ဢမ်ႇၸႂ်ႈဝႃႈ တဵမ်ၸႂ်သေႁဵတ်း ဢမ်ႇၸႂ်ႈဝႃႈ ၼပ်ႉယမ်သေႁဵတ်း ၊ ပဵၼ်ယွၼ်ႉဢမ်ႇၽွင်းလိူဝ်လႆႈဢႃႇၼႃႇ ၿႃႇဝႃႇ လႄႈ လႆႈႁဵတ်းၵူၺ်း။
4)Boss ၼႆႉ ဢဝ်လွင်ႈၵူဝ်လွင်ႈႁႄၸိူဝ်းၼႆႉ သႂ်ႇပၼ်ၼႂ်းပၢႆးဝူၼ်ႉ ၼႂ်းဢွၵ်းဢေႃၵူၼ်းၸွမ်းလင် ၊ Leader တႄႉ တေဢဝ်လွင်ႈႁတ်းႁၢၼ် ၊ ပၢႆးဝူၼ်ႉလီ သႂ်ႇပၼ်ဢွၵ်းဢေႃ ၵူၼ်းၸွမ်းလင် ။

ၸင်ႇၼၼ်လႄႈ ဢၼ်ႁူႉလႆႈငၢႆႈငၢႆႈၵေႃႈ ၽူႈၼမ်း Leader ဢၼ်ဝႃႈၼႆႉ ပဵၼ်ၵေႃႉဢၼ် သၢင်ႈပၼ်လွင်ႈယုမ်ႇယမ်တူဝ်ၵဝ်ႇ ၊ သၢင်ႈပၼ်လွင်ႈႁတ်းႁၢၼ် ၊ သၢင်ႈပၼ်ႁႅင်းၸႂ် ၊ သၢင်ႈပၼ်ႁႂ်ႈမေႃပိုင်ႈတူဝ်ၵဝ်ႇ ၊ သၢင်ႈႁႂ်ႈၵူၼ်းၸွမ်းလင်မီးၵႃႈၶၼ် ၸိူဝ်းၼႆႉ။ ၵေႃႉဢၼ် ဢဝ်လွင်ႈၵူဝ်ႁႄ ၊ လွင်ႈမႆႈၸႂ်ၸိူဝ်းၼႆႉ သႂ်ႇပၼ်တႄႉၸိုင် ဢမ်ႇၸႂ်ႈၽူႈၼမ်းလီ။

5)Boss ၼႆႉ တေၵႆႉဢဝ် ၶေႃႈၵႂၢမ်းဢၼ်ဝႃႈ ၵဝ် ၵဝ် ၼႆ ၼမ်းၼႃႈ တႃႇသေႇ ၊ ႁဵတ်းသင်ၵေႃႈ ႁႂ်ႈပဵၼ်တႃႇ တူဝ်ၵဝ်ႇ ယူႇသေႇသေႇ ။ Leader တႄႉ တေၸႂ်ႉၶေႃႈၵႂၢမ်းဝႃႈ ႁဝ်း ႁဝ်း ၼႆၼမ်းၼႃႈ ။ ႁဵတ်းသင်ၵေႃႈ တေယိူင်းၸူးၵူၼ်းၼႂ်းၸုမ်း ႁိုဝ် တႃႇၵူၼ်းၼမ် ။

Boss ႁိုဝ် ၵူၼ်းၶႂ်ႈယူႇၼိူဝ်ပိူၼ်ႈ ၵူၼ်းၶႂ်ႈပေႉပုၼ်ႈပိူၼ်ႈၼႆႉ တေၵႆႉႁႃတၢင်းၽိတ်းသႂ်ႇ ၵူၼ်းၸွမ်းလင် ။ ပေႃးလႆႈလွင်ႈဢွင်ႇမၢၼ်တႄႉ တေပူၵ်းႁူဝ်မႄႈမိုဝ်းပၼ်ယူႇသေတႃႉ ပေႃးမိူဝ်ႈလႂ်လႄႈ မီးလွင်ႈလူႉသုမ်းမႃးတႄႉ တေဢဝ်မိုဝ်းၸီႉၼႃႈတမ်တႃသေ လႃႇဝႃႈသႄႉသွမ်း သမ်ႉပေႃး ဢမ်ႇငွၵ်ႈႁူဝ်လႆႈ ၊ မေႃဢဝ်တၢင်းၽိတ်းၵွင်ပၼ်ၵူၼ်းၸွမ်းလင် ။

ၽူႈၼမ်း ႁိုဝ် Leader တႄႉ ၵွပ်ႈႁပ်ႉႁၼ်ဝႃႈ ႁဵတ်းၵၢၼ်ပဵၼ်ၸုမ်းလႄႈ ထိုင်တီႈဢွင်ႇမၢၼ်မႃးၵေႃႈယဝ်ႉ တူၵ်းသုမ်းၵေႃႈယႃႇ တေႁူမ်ႈၵၼ်တုၵ်ႉႁူမ်ႈၵၼ်သိူဝ်း ။ သင်ထိုင်ၶၵ်ႉဢၼ်ဢွင်ႇမၢၼ်ၵေႃႈ တေၵႆႉယွင်ႈယေႃး ဢဝ်ၵုင်ႇမုၼ်ၽူႈႁူမ်ႈၽၢၵ်ႈၼႃႈၵၢၼ်သေ သင်မီးလွင်ႈတူၵ်းသုမ်းမႃးၵေႃႈ တေဢမ်ႇၼႅတ်ႈတၢမ်ႇတၢင်းၽိတ်းၵေႃႉလႂ် တေႁပ်ႉပုၼ်ႈၽွၼ်းၵႄႈလိတ်ႈၵႂႃႇလႆႈၵူႈၶၢဝ်း ။

တႅၼ်းတီႈ တေၵႂႃႇၼႄးၵေႃႉၼၼ်ႉၵေႃႉၼႃႈ ၽူႈၼမ်းၼႆႉ တေဢဝ်ၶၢဝ်းယၢမ်း ပၵ်းၸႂ် ႁႃလွၵ်းႁႃလၢႆးတႃႇၵႄႈလိတ်ႈပၼ်ႁႃၵူၺ်း ။ တေၵုမ်ႇၼႄးၵူၼ်းၵူၺ်းတႄႉ တေဢမ်ႇဢွၵ်ႇၶေႃႈတွပ်ႇလီသင်မႃးငၢႆႈငၢႆႈ ၼႆ ၵိုင်ႇလီၾၢင်ႉၵၼ်ၵူႈၵေႃႉယူႇ။
သင်ၶႂ်ႈပဵၼ်ၽူႈၼမ်းလီၸိုင် ယႃႇၵုမ်ႇမိုင်ႉပွင်ႉထႃႉလႃႇ ႁႃတၢင်းၽိတ်းသႂ်ႇပၼ်ၵူၼ်းၸွမ်းလင်ၵူၺ်း ၊ ၵိုင်ႇလီႁႃၶေႃႈၵႄႈလိတ်ႈပၼ်ႁႃသေ ယွမ်းႁပ်ႉႁူမ်ႈသၢင်ႈၵၼ်ၵႂႃႇ ။

သင်ဝႃႈ တူဝ်ၵဝ်ႇ ႁဵတ်းၵၢၼ်ယူႇသေတီႈတီႈ သေၸုမ်းၸုမ်းၸိုင် ၸဝ်ႈၵဝ်ႇတေၶႂ်ႈပဵၼ် Boss ႁႃႉ Leader ၼႆၼၼ်ႉ လွင်ႈႁဵတ်းသၢင်ႈတူဝ်ၵဝ်ႇၼၼ်ႉ တေတႅပ်းတတ်းပၼ်ၵူၺ်း ဢမ်ႇလူဝ်ႇထၢမ်ၽႂ်လႄႈ ဢမ်ႇလူဝ်ႇလၢတ်ႈၽႂ်ဝႃႈ ၸဝ်ႈၵဝ်ႇ ပဵၼ်ၽူႈၼမ်းလီ ။ ၸင်ႇၼၼ်လႄႈ ၼင်ႇႁိုဝ် တေတူၵ်းထုၵ်ႇၼၼ်ႉ လူဝ်ႇမေႃ ထတ်းတူၺ်း လွင်ႈႁဵတ်းသၢင်ႈၸဝ်ႈၵဝ်ႇလီငၢမ်းသေ မူၼ်ႉမႄးၸင်ႇတေပဵၼ်ၽူႈၼမ်းလီလႆႈ ။

ယႃႇပေ ၶႂ်ႈယဵပ်ႇယမ်ႈၵူၼ်းၸွမ်းလင်သေ တိုင်ႈၶိုၼ်ႈတၢင်းၼႃႈ ၊ ယႃႇပွႆႇၽႃႈ ၵူၼ်းလုၼ်ႈလင်သေ ဢဝ်ၸိုဝ်ႈဢဝ်သဵင်ယူႇႁင်းၵူၺ်း ။ သင်ပဵၼ်ၽူႈၼမ်းလီ ၸၢင်ႈပိၼ်ႇဝၢႆႇလႅၵ်ႈလၢႆႈ ႁႂ်ႈ ၵူၼ်းၼႂ်းၸုမ်း ၵူၼ်းၸွမ်းလင် လီသေဢွၼ်တွၼ်းသေၵဝ်ႇ လႄႈ ၸၢင်ႈႁဵတ်းႁႂ်ႈၵၢၼ်ငၢၼ်းၶိုၼ်ႈသင်ႉၶိုၼ်ႈသုင်လႆႈထႅင်ႈတင်းၼမ် ။

ၶေႃႈမုလ်း – https://m.me/FutureWaveTrainingMyanmar