ယၢမ်းလဵဝ် လၢႆပိုၼ်ႉတီႈ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း ပၢင်တိုၵ်းယဵၼ်ဝႆႉယဝ်ႉလႄႈ ၵူၼ်းပၢႆႈၽေးသိုၵ်း ဢၼ်ပၢႆႈသွၼ်ႈဝႆႉတၢင်ႇတီႈတၢင်ႇဝၢၼ်ႈၼၼ်ႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းသေ ၽွင်းပွၵ်ႈၶိုၼ်းၼၼ်ႉ ႁိူၼ်းယေးၵမ်ႈၼမ် ၺႃးသိုၵ်းမၢၼ်ႈ ဢဝ်ၾႆးၽဝ်ပႅတ်ႈဢမ်ႇယွမ်း 30 လင်။

ၵူၼ်းပၢႆႈၽေးသိုၵ်း တီႈဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈၸၢင်ႈၸွႆႉၼႆႉ ႁိူၼ်းယေး ၵူၼ်းဝၢၼ်ႈၺႃးၾႆးၽဝ်ပႅတ်ႈ ဢမ်ႇယွမ်း 30 လင်။ ၸဵမ်ႁိူၼ်းၵဝ်ႇႁိူၼ်းမႂ်ႇၶဝ်ၽဝ်မူတ်း။ ႁိူၼ်းယေး ဢၼ်ၺႃးၸၢၵ်ႇမၢၵ်ႇသေ လူႉၵွႆၵေႃႈမီးၼမ်။ ဢမ်ႇၸၢင်ႈႁဵတ်းႁိုဝ်ၶႃႈ ၵႃႈလႆႈဢဝ်ၽႃႈယၢင် (မူဝ်းၵႃႇ) ၵၢင်ႈသေ ယူႇၵႂႃႇၸိူင်ႉၼၼ်ၵူၺ်းၶႃႈ ပႆႇၸၢင်ႈႁဵတ်းၵမ်းလဵဝ် ယွၼ်ႉဢမ်ႇမီးငိုၼ်းဢေႃႈ။ ႁဝ်းၶႃႈ ၵူၼ်းမိူင်းတႄႉ ယၢပ်ႇၽိုတ်ႇဢေႃႈ တႃႇယူႇၵိၼ်ၸိူဝ်းၼႆႉ”- ဝႃႈၼႆ။

ၽွင်းၵူၼ်းဝၢၼ်ႈၵူၼ်းသူၼ် ဢွၼ်ၵၼ်ပၢႆႈၽေးသိုၵ်းယူႇၼၼ်ႉ ႁိူၼ်းယေးဢၼ်ၵိုတ်းဝႆႉၸိူဝ်းၼၼ်ႉ ၺႃးလၵ်ႉသွၵ်ႈတဝ် ဢဝ်ၶူဝ်းၶွင်ၵႂႃႇတင်းၼမ်။ ယၢမ်းလဵဝ် ၽွင်းပွၵ်ႈၶိုၼ်း ႁိူၼ်းယေးၼႆႉ ၶူဝ်းၶွင်ၼႂ်းႁိူၼ်းယေးၼၼ်ႉ ဢမ်ႇၵိုတ်းသင်ယဝ်ႉ။ မိူၼ်ၼင်ႇ ၸၢၵ်ႈထႆၼႃး ၸိူဝ်းၼႆႉၵေႃႈ ၺႃးလၵ်ႉ။ ယွၼ်ႉၼၼ် တႃႇတေသိုပ်ႇႁဵတ်းသူၼ်ႁႆႈၼႃးၵႂႃႇမိူဝ်းၼႃႈတႄႉ တေပဵၼ်ဢၼ်ထူပ်းတၢင်းယၢပ်ႇၽိုတ်ႇဝႆႉ ဝႃႈၼႆ။

“ၶူဝ်းႁိူၼ်းယေးတႄႉ ႁၢႆၼမ်ၼႃႇၶႃႈ။ ၶိူင်ႈၸၢၵ်ႈ ၸိူဝ်းၼႆႉၵေႃႈ လၵ်ႉဢဝ်ၵႂႃႇမူတ်း။ ၵမ်ႈၽွင်ႈ ပွၵ်ႈႁိူၼ်းမႃးၵေႃႈ ဢမ်ႇမီးသင်ယဝ်ႉ ၶူဝ်းႁိူၼ်းယေးတႄႉ။ ပဵၼ်သိုၵ်းမၢၼ်ႈတင်း PNO ႁူမ်ႈၵၼ်သေ ဢဝ်ၵႂႃႇဢေႃႈ။ လွင်ႈသွၵ်ႈတဝ်လၵ်ႉၶူဝ်းၶွင်တႄႉ ၺႃးၵူႈႁိူၼ်းၶႃႈယဝ်ႉ။ ၼမ်လႄႈဢေႇ။ မၢင်ၸိူဝ်း ၽုၵ်ႇၶဝ်ႈၵၢပ်ႇဝႆႉ ပေႃးလႆႈၶိုၼ်းၵေႃႈ တေၶႅၼ်းၶိုၼ်းယူႇ။ ၵမ်ႈၽွင်ႈ ဢမ်ႇလႆႈၽုၵ်ႇဝႆႉ တီႈမုင်ႈမွင်းတႄႉ ဢမ်ႇမီးၶႃႈ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်းတႄႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉသေတႃႉ ၸွမ်းဝၢၼ်ႈၸွမ်းသူၼ်တႄႉ တိုၵ်ႉမီးသိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ၶဝ် ပၵ်းယူႇဝႆႉၸွမ်းဝၢၼ်ႈသေ ၵူတ်ႇထတ်းၵူၼ်းဝၢၼ်ႈ ၸိူဝ်းၶဝ်ႈဢွၵ်ႇၵႂႃႇမႃးထႅင်ႈ။ လွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈ မႆႈၸႂ်တႃႇၵႂႃႇမႃး။

“ယၢမ်းလဵဝ် တီႈဝၢၼ်ႈၼႆႉ တေမီးသိုၵ်းမၢၼ်ႈ တင်း PNO ။ ၶဝ်သမ်ႉမႃးယူႇၸွမ်းၼႂ်းဝၢၼ်ႈသေ ၶဝ်ႈဢွၵ်ႇၵေႃႈလႆႈသႂ်ႇသဵၼ်ႈမၢႆတီႈၶဝ်။ သဵၼ်ႈမၢႆၼၼ်ႉ တေလႆႈသႂ်ႇဝႆႉဝႃႈ ဢွၵ်ႇၵႂႃႇမိူဝ်ႈလႂ် တေမႃးၶိုၼ်းမိူဝ်ႈလႂ် ၸိူဝ်းၼႆႉ တေလႆႈသႂ်ႇဝႆႉၵမ်းလဵဝ်ဢေႃႈ။ ဢွင်ႈတီႈပၼ်သဵၼ်ႈမၢႆၼၼ်ႉ ပဵၼ်တီႈတၢင်းၶဝ်ႈဢွၵ်ႇဝၢၼ်ႈ ၼၼ်ႉၵမ်းလဵဝ်ယဝ်ႉ။ မၼ်းဢမ်ႇလွတ်ႈလႅဝ်း ၶႃႈ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆထႅင်ႈ။

ပူၼ်ႉမႃး မိူဝ်ႈလိူၼ်ၵျုၼ်ႊ ပီ 2025 ၼႆႉ သိုၵ်းမၢၼ်ႈတင်း ၸုမ်း IPDF လႆႈပဵၼ်ပၢင်တိုၵ်းၵၼ် ၼႂ်းၸႄႈဝဵင်းယွင်ႁူၺ်ႈသေ ႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင် လႆႈဢွၼ်ၵၼ်ပၢႆႈၽေးသိုၵ်း ၼႆယဝ်ႉ။

လွင်ႈသိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ႁူမ်ႈၵၼ်ၽဝ်ႁိူၼ်းယေးၵူၼ်းဝၢၼ်ႈၼႆႉ ဢမ်ႇၸႂ်ႈဝႃႈ တီႈၼႂ်းၸႄႈဝဵင်းယွင်ႁူၺ်ႈၼႆႉၵူၺ်း မိူၼ်ၼင်ႇ တီႈဝၢၼ်ႈၼႃးၵူင်း ၸႄႈဝဵင်း ၾၢႆၶုၼ်ၼၼ်ႉၵေႃႈ ႁိူၼ်းယေး ၵူၼ်းဝၢၼ်ႈၺႃးၾႆးၽဝ်ၵႂႃႇမွၵ်ႈ 27 လင် ယဝ်ႉၵေႃႈ ယွင်ၶဝ်ႈ ၸိူဝ်းၼၼ်ႉၵေႃႈ ၺႃးၾႆးၽဝ်ၵႂႃႇထႅင်ႈ တင်းၼမ် ၼႆယဝ်ႉ။