သိုၵ်း RCSS တင်း SSPP ဢၼ်ဢမ်ႇတွၵ်ႉတႅၵ်ႉၵၼ်မႃး ၶၢဝ်း 7 – 8 လိူၼ် ၼႆႉ ၼႂ်းၶၢဝ်းတၢင်း ဝၼ်း႞သွင်ဝၼ်းၼႆႉ ႁူပ်ႉၸုၼ် လေႃႇတိုၵ်းပိုတ်းယိုဝ်းၵၼ်ၵၼ်ၶိုၼ်းလႄႈ ၵူၼ်းမိူင်း ထုင်ႉၵေးသီး-မိူင်းၼွင်- မိူင်းၼၢင်း မႆႈၸႂ် ၵူဝ်သိုၵ်းသွင်မူႇၼႆႉ ႁဵတ်းၶဵၼ်တေႃႇၵၼ်ထႅင်ႈ။
ဝၼ်းတီႈ 21/9/2022 ယၢမ်းၵၢင်ၼႂ် သိုၵ်း RCSS တင်း SSPP ယိုဝ်းၵၼ် ႁိမ်းဝၢၼ်ႈပၢင်ႇႁႆႈ/ၶူဝ်ၼမ်ႉတွင်း ၼႂ်းဢိူင်ႇမိူင်းယၢႆး ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း၊ သွင်ၾၢႆႇလေႃႇတိုၵ်းၵၼ် ႁိမ်း ၶိုင်ႈ ၸူဝ်ႈမူင်း လႄႈ ၵူၼ်းမိူင်း ဢၼ်ယူႇၼႂ်းမူႇဝၢၼ်ႈ ထုင်ႉမိူင်းၼွင်၊ မိူင်းၼၢင်း ၼႂ်းၸႄႈဝဵင်းၵေးသီး ဢွၼ်ၵၼ်မႆႈ ၸႂ် ၵူဝ်သိုၵ်းသွင်ၾၢႆႇ တေႃးၵၼ် တိုၵ်းၵၼ်ထႅင်ႈ။
ၵူၼ်းမိူင်းၵေးသီး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ ၶဝ်ယိုဝ်းၵၼ် တီႈဢိူင်ႇမိူင်းယၢႆး ႁိမ်းဝၢၼ်ႈပၢင်ႇႁႆႈ ဢေႃႈ။ တီႈၼၼ်ႈ တႄႉ ဢမ်ႇပေႃးၵႆၵၼ်တၢင်းသဵၼ်ႈတၢင်းလူင် လၢႆးၶႃႈ မိူင်းၼွင်။ ၶဝ်ယိုဝ်းၵၼ်တႄႉ ႁိုင်မွၵ်ႈ 20- 30 မိၼဵတ်ႉ ၼႆႉၵူၺ်းၼင်ႇၵဝ်ႇ ”- ဝႃႈၼႆ။
ၵူၼ်းမိူင်း ၼႂ်းထုင်ႉ မိူင်းၼွင် ၊ မိူင်းၼၢင်း၊ သလၢႆးၶုမ်ႇ၊ ပၢင်ႇၽူၼ်း ၸိူဝ်းၼႆႉ တႄႉ ဢမ်ႇၶႂ်ႈႁႂ်ႈသိုၵ်းတႆး သွင်ၸုမ်း တိုၵ်းၵၼ်၊ ၶႂ်ႈႁႂ်ႈၶဝ်ႈႁႃၵၼ်၊ ႁူမ်ႈႁႃတၢင်းၵႄႈလိတ်ႈပၼ်ႁႃၸိူဝ်ႉၸၢတ်ႈ။
ၵဵဝ်ႇၵပ်းလွင်ႈၼႆႉသေ ၵူၼ်းၵေးသီး ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈတၢင်းႁၼ်ထိုင်မၼ်းၼၢင်းၼင်ႇၼႆ။
“ၸူးၸႂ်ၶႃႈတႄႉ ဢမ်ႇၶႂ်ႈႁႂ်ႈၶဝ်တိုၵ်းၵၼ် သင်မီးၵူၼ်းပၢႆႈၽေးမႃးၼႆ တႃႇတေၸွႆႈထႅမ် ၵူၼ်းပၢႆႈၽေးၼႆႉ မၼ်းတေ ယၢပ်ႇ။ ယၢမ်းလဵဝ် ပိူၼ်ႈၵေႃႈ ဢမ်ႇမီးငိုၼ်း ၵိၼ်းၸႂ်ၵၼ်ဝႆႉလႄႈ တႃႇတေၸွႆႈထႅမ် ၵူၼ်းပၢႆႈၽေး မိူၼ်မိူဝ်ႈၵူႈ ပွၵ်ႈတႄႉ တေယၢပ်ႇ၊ ႁႃၵိၼ်ၵဵင်ႉတွင်ႉၵူၺ်း ပေႃးယၢပ်ႇၵႅၼ်းၸႂ်ၼႃႇယဝ်ႉ”- ဝႃႈၼႆ။
မိူဝ်ႈ ႁူဝ်ပီ 2021 ၽွင်းသိုၵ်းမၢၼ်ႈ ယိုတ်းဢႃႇၼႃႇ ဝၢၼ်ႈမိူင်း ၶႃႈႁႅမ်ၵူၼ်းမိူင်း ၸိူဝ်းလုၵ်ႉႁိုၼ်ႇၼႄၵၢင်ၸႂ်ၼၼ်ႉ သိုၵ်း SSPP လႄႈ သိုၵ်း RCSS သမ်ႉႁိမ်ပိုၼ်ႉတီႈၵၼ်၊ လေႃႇတိုၵ်းပိုတ်းယိုဝ်းၵၼ် ၵူၼ်းမိူင်း ၼႂ်းၸႄႈဝဵင်းၵေးသီး၊ မိူင်းၼွင်၊ မိူင်းၼၢင်း၊ မိူင်းၵိုင်၊ လၢႆၶႃႈ၊ ပၢင်လူင်၊ သီႇပေႃႉ၊ ၵျွၵ်ႉမႄး၊ ၼမ်ႉတူႈ ၸိူဝ်းၼႆႉ ပဵၼ်ၼမ်ႉႁူၼမ်ႉတႃ လႆႈပၢႆႈယၢၼ်ႁိူၼ်းယေးတီႈယူႇ၊ ႁၢၼ်ႉတေႃႇထိုင်ယၢမ်းလဵဝ် ၸိူဝ်းပႆႇၸၢင်ႈပွၵ်ႈၶိုၼ်းဝၢၼ်ႈၵဝ်ႇမိူင်းၼွၼ်းၵေႃႈတိုၵ်ႉမီးႁူဝ်ၵူၼ်း ၼပ်ႉပၢၵ်ႇ။
