ၵူၼ်းပၢႆႈၽေးသိုၵ်း တီႈဝတ်ႉၵၢင်ႉမေႃႇ ၸႄႈဝဵင်းသီႇပေႃႉ ႁူဝ်ၵူၼ်း 450 ပၢႆ ဢွၼ်ၵၼ်တုၵ်းယွၼ်း ႁႂ်ႈၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းတင်းသွင် ၾၢႆႇ ႁႂ်ႈၸဵဝ်းၵိုတ်းတိုၵ်းၵၼ်ၽႂ်းၽႂ်း။

ဝၼ်းတီႈ 24-25/1/2022 ၶၢဝ်းတၢင်းသွင်ဝၼ်းမႃးၼႆႉ ၵူၼ်းဝၢၼ်ႈၼမ်ႉသိမ်ႇတင်း ဝၢၼ်ႈပုင်ႇၽၢၼ်း ၼႂ်းဢိူင်ႇၼမ်ႉသိမ်ႇ ဢွၼ်ၵၼ်ပၢႆႈဢွၵ်ႇ မႃးထႅင်ႈ တီႈဝတ်ႉၵၢင်ႉမေႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း 100 ယွၼ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်း မိူင်းတႆးၼင်ႇၵၼ် ပိုတ်းယိုဝ်းၵၼ်ႁၢဝ်ႈႁႅင်းထႅင်ႈ ၼႆယဝ်ႉ။

ၵူၼ်းပၢႆႈၽေးသိုၵ်း တီႈၵျွင်းၽြႃးၵၢင်ႉမေႃႇ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈမႃးယူႇတီႈဝတ်ႉၼႆႉ တေမီးၶၢဝ်းတၢင်းၼိုင်ႈလိူၼ်ၼႆႉယဝ်ႉ။ တုၵ်ႉၶ တႄႉၶႃႈဢေႃႈ။ ၶႂ်ႈမိူဝ်းၼႃႇယဝ်ႉၶႃႈ။ မႆႈၸႂ်ႁိူၼ်းယေး သူၼ်ႁႆႈၼႃးႁဝ်းၶႃႈဢေႃႈ။ ဢၼ်လူဝ်ႇၽုၵ်ႇလူဝ်ႇသွမ်ႈၵေႃႈမီးတင်းၼမ် ဢၼ်လူဝ်ႇဢဝ် ၶူဝ်းၼႂ်းသူၼ်ၸိူဝ်းၼႆႉၵေႃႈ မီးထႅင်ႈတင်းၼမ် မုင်ႈမွင်းႁႂ်ႈၶဝ်ၵိုတ်းတိုၵ်းၵၼ် ၽႂ်းၽႂ်းသေ ႁႂ်ႈၶဝ်ထွႆထွၼ်တပ်ႉၶဝ်ၵူၼ်းၶဝ်ဢွၵ်ႇပၼ်ၵူၺ်းယဝ်ႉၶႃႈ။ ႁဝ်းၶႃႈတႄႉ ၶႂ်ႈ မိူဝ်းႁိူၼ်းၼႃႇယဝ်ႉ”- ဝႃႈၼႆ။

ယွၼ်ႉဝႃႈ ယၢမ်းလဵဝ်ၼႆႉ ပဵၼ်ၶၢဝ်းလူဝ်ႇၽုၵ်ႇလူဝ်ႇသွမ်း လူဝ်ႇဢဝ်ၶူဝ်းၼႂ်းသူၼ်ႁႆႈၼႃးလႄႈၶႂ်ႈပွၵ်ႈႁိူၼ်း။ ၵူၼ်းပၢႆႈၽေးသိုၵ်းတီႈၵျွင်းၵၢင်ႉမေႃႇသမ်ႉ ပဵၼ် ၵူၼ်းႁဵတ်းၵိၼ်ႁႆႈၼႃးသူၼ်ၵၼ် ၵမ်ႈၼမ် ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေး သိုၵ်းတီႈၵျွင်းၵၢင်ႉမေႃႇၼႆႉ တေမီး 450 ပၢႆ။ ႁူမ်ႈပႃး ဢၼ်ပၢႆႈမႃး မိူဝ်ႈဝႃး တင်းမိူဝ်ႈၼႆႉ တီႈယူႇတႄႉ ပေႃးၶႂ်ႈတဵမ်မူတ်းယဝ်ႉၶႃႈ။ သင်ဝႃႈ ပၢႆႈမႃးထႅင်ႈတႄႉ တေလႆႈသူင်ႇၸူးတၢင်းၼႂ်းဝဵင်း ၵူၺ်းၶႃႈယဝ်ႉ။ တၢင်းၸွႆႈထႅမ်တႄႉ တိုၼ်းဝႃႈလူဝ်ႇၶႃႈယဝ်ႉ ပၢင်တိုၵ်းၼႆႉ ဢမ်ႇႁူႉဝႃႈ တေၵႂႃႇႁိုင်ထႅင်ႈၵႃႈႁိုဝ်။ ထႅင်ႈလွင်ႈၼိုင်ႈၵေႃႈ မႆႈၸႂ်ပၢႆးယူႇ လီၶႃႈဢေႃႈ။ ၾၢႆႇပၢႆးယူႇလီၶဝ်ၵေႃႈ ဢမ်ႇလူင်းမႃးတူၺ်းပၼ် ၵူႈဝၼ်း ဢၼ်ၼႆႉၵေႃႈ ပဵၼ်လွင်ႈယူပ်ႈယွမ်းဝႆႉၶႃႈ။ ယႃႈယႃၸိူဝ်းၼႆႉၵေႃႈ လူဝ်ႇၶႃႈ ဢေႃႈ”- ဝႃႈၼႆ။

ၼွၵ်ႈလိူဝ်ၼၼ်ႉ ၵူၼ်းပၢႆႈၽေးသိုၵ်း ႁူမ်ႈၵၼ်သေတုၵ်းယွၼ်းထႅင်ႈဝႃႈ သင်ဝႃႈ သိုၵ်းသွင်ၾၢႆႇ ဢုပ်ႇဢူဝ်းငူပ်ႉငီႉၵၼ်ဢမ်ႇလႆႈၵေႃႈ ႁႂ်ႈထွႆထွၼ် ပၼ်ၵၼ် တင်းသွင်ၾၢႆႇ သင်ဝႃႈဢုပ်ႇဢူဝ်းၵၼ်လႆႈၵေႃႈ ႁႂ်ႈၸဵဝ်းဢုပ်ႇဢူဝ်းၵၼ်သေ ႁႂ်ႈၸဵဝ်းၵိုတ်းတိုၵ်းပၼ်ၽႂ်းၽႂ်းသေၵမ်း ဝႃႈၼႆ။

တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2022 ၼႆႉမႃး ယွၼ်ႉသိုၵ်း RCSS တင်း SSPP, TNLA ပဵၼ်ပၢင်တိုၵ်းၵၼ် တၢင်းဢိူင်ႇၼမ်ႉသိမ်ႇ ႁၢဝ်ႈႁႅင်းသေ ႁဵတ်းႁႂ်ႈၵူၼ်းၼႂ်းပိုၼ်ႉတီႈ ၼႂ်းဢိူင်ႇၼမ်ႉသိမ်ႇ၊ ဢိူင်ႇၼမ်ႉဢုၼ်ႇ(ၵုင်းၼိဝ်ႉ) လႄႈ ဢိူင်ႇၼႃးမူၼ်း ၸႄႈဝဵင်းသီႇပေႃႉ လႆႈပၢႆႈၽေးသိုၵ်း ၊ႁၢၼ်ႉတေႃႇ ထိုင်ယၢမ်းလဵဝ် ပႆႇလႆႈပွၵ်ႈၶိုၼ်းႁိူၼ်းယေးၵၼ်။ မၢင်ၸိူဝ်းပွၵ်ႈၶိုၼ်းမိူဝ်းလၢႆဝၼ်းၵူၺ်း လႆႈပၢႆႈဢွၵ်ႇမႃးၶိုၼ်းထႅင်ႈ ယွၼ်ႉငဝ်းလၢႆး ၼႂ်း ပိုၼ်ႉတီႈ ပႆႇၼိမ်ယဵၼ်။