ပၢင်တိုၵ်းၸဵမ်ပီၵၢႆလၢမ်းထိုင်ပီၼႆႉ ၵူၼ်းမိူင်းၵိုင်ပၢႆႈၽေးသိုၵ်းထႅင်ႈႁဵင်ပၢႆ

RCSS လႄႈ SSPP သိုပ်ႇပဵၼ်ပၢင်တိုၵ်း ပိုတ်းယိုဝ်းၵၼ် ၼႂ်းၸႄႈဝဵင်းမိူင်းၵိုင် ၼႂ်းၶၢဝ်းတၢင်း ဝူင်ႈ႞ၼႆႉ ၵူၼ်းမိူင်း ပၢႆႈယၢၼ် ႁိူၼ်းယေး တီႈယူႇတၼ်းသဝ်း ဢမ်ႇယွမ်း 1,500  ဝႃႈၼႆ။

တႄႇဢဝ် ႁၢင်လိူၼ်ၻီႊသႅမ်ႊပိူဝ်ႊ 2021 ႁၢၼ်ႉတေႃႇထိုင်ယၢမ်းလဵဝ် ႁူဝ်လိူၼ် ၵျၼ်ႊၼိဝ်ႊရီႊ 2022 ပၢင်တိုၵ်းပဵၼ် ၼႂ်းဢိူင်ႇႁူဝ်ၼႃး ၾၢႆႇႁွင်ႇဝဵင်း မိူင်းၵိုင် ယၢၼ်ဝဵင်းမွၵ်ႈ 5-6 လၵ်း   ၵူၼ်းဝၢၼ်ႈပၢႆႈၽေး 1,500 ပၢႆ ။

ၵူၼ်း  မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်းၼႆႉ ၸမ်ဝဵင်းႁႅင်းၼႃႇယဝ်ႉ။ ၵူၼ်းပၢႆႈၽေးသိုၵ်း  တေႃႇထိုင် မိူဝ်ႈဝႃး ဝၼ်းတီႈ 2 ၼႆႉ မီးၵႂႃႇ 1,500 ပၢႆ  မႃးသွၼ်ႈယူႇၸွမ်းဝတ်ႉၵျွင်းမုၼ်ၸဝ်ႈဢေႃႈ။ ယၢမ်းလဵဝ် လူဝ်ႇ ၶဝ်ႈၼမ်ႉတၢင်းၵိၼ် လႄႈ လွင်ႈၼုင်ႈဝႆ ၶူဝ်းဢုၼ်ႇၸိူဝ်းၼႆႉၶႃႈဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ၸိူဝ်းၼႆႉမႃးသွၼ်ႈဝႆႉတီႈဝတ်ႉ/ၵျွင်းမူၺ်ႇတေႃႇၸၢၼ်း၊  ၵျွင်းၼႃးလူင် ဢွၵ်ႇ၊  ၵျွင်းလွႆလႅင်၊  ၵျွင်းၶမ်း၊  ၵျွင်းဝဵင်းငိုၼ်း၊   ၵျွင်းၵၢင် လႄႈ ၸွမ်းႁိူၼ်းယေး ပီႈၼွင်ႉၽႂ်မၼ်း ၸိူဝ်းၼႆႉ။

ၵူၼ်းပၢႆႈၽေးသိုၵ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပဵၼ်ႁႅင်းၶႃႈဢေႃႈ။ ပဵၼ်ႁဝ်းတေႃႇႁဝ်းယိုဝ်းၵၼ်  ၊  ၸုမ်းဢူၺ်းလီ  ၵေႃႈပႃးၶႃႈဢေႃႈ။ ယၢမ်းလဵဝ် ပဵၼ်ၶၢဝ်းလူဝ်ႇႁဵတ်းၵၢၼ်လႄႈ ပၢင်တိုၵ်းသမ်ႉ ပဵၼ်ယူႇၶိူဝ်းယႂ်းၸိူင်ႉၼႆ ပၼ်တၢင်း ယၢပ်ႇၽိုတ်ႇႁဝ်းၶႃႈ ၵူၼ်းမိူင်းတႄႉၶႃႈဢေႃႈ”- ဝႃႈၼႆ။

ၵူၼ်းပၢႆႈၽေးသိုၵ်း ၼႂ်းၸႄႈဝဵင်းမိူင်းၵိုင် ဢၼ်ပၢႆႈၽေးမႃးယၢမ်းလဵဝ်သမ်ႉ ပဵၼ်ၵူၼ်းဝၢၼ်ႈႁူၺ်ႈၼွႆႉ၊ ၵုၼ်ၼႃး၊ ၼႃးတီး၊ ဝဵင်းငိုၼ်း၊ ႁူဝ်ၼႃး ယဝ်ႉၵေႃႈ ဢိၵ်ႇထႅင်ႈလၢႆလၢႆဝၢၼ်ႈ ၵူၼ်းမိူင်းၵိုင် သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 14/9/2021 မႃး RCSS တင်း SSPP ပဵၼ်ပၢင်တိုၵ်းၵၼ် တၢင်းဢိူင်ႇႁူဝ်ၶၢႆး ၸႄႈဝဵင်းမိူင်းၵိုင် ႁၢဝ်ႈႁႅင်း။ ၽႄႈ လၢမ်းမႃး တၢင်း ဢိူင်ႇပၢင်ႇၵေႇတု၊ ႁၢမ်းငၢႆး၊ တူင်ႇလၢဝ်းလႄႈ တၢင်းၼႂ်းဢိူင်ႇႁူဝ်ၼႃး ၸိူဝ်းၼႆႉ  ၵူၼ်းမိူင်း လႆႈပၢႆႈယၢၼ် ႁိူၼ်းယေး ၼပ်ႉ ႁူဝ်ႁဵင်။