ၵူၼ်းပၢႆႈၽေးသိုၵ်း တိုၵ်ႉမီးယူႇၼႂ်းၸႄႈဝဵင်းမိူင်းၵိုင် ႁူဝ်ၵူၼ်း 700 ပၢႆ ပႆႇၸၢင်ႈပွၵ်ႈႁိူၼ်းယေး ငဝ်းလၢႆးပၢင်တိုၵ်းတၢင်းဝၢၼ်ႈတိုၵ်ႉၶဵင်ႈၶႅင်  ယူႇ ဝႃႈၼႆ။

ၵူၼ်းပၢႆႈၽေးသိုၵ်း တီႈဝတ်ႉဝဵင်းငိုၼ်း၊ ဝတ်ႉၵုင်းၸူင်လႄႈ ၼႂ်းဝၢၼ်ႈပၢင်ႇၵေႇတု ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ႁူဝ်ၵူၼ်း 700 ပၢႆ ပႆႇၸၢင်ႈပွၵ်ႈၶိုၼ်ႈႁိူၼ်းယေး ၽႂ်မၼ်း ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇၼိမ်ယဵၼ် တိုၵ်ႉမီးလွင်ႈၶဵင်ႈၶႅင် ပဵၼ်ပၢင်တိုၵ်းၵၼ်ယူႇ ၼႆယဝ်ႉ။

ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ငဝ်းလၢႆးၼႂ်းပိုၼ်ႉတီႈ ပႆႇယဵၼ်ၶႃႈ တိုၵ်ႉၶဵင်ႈၶႅင်ၵၢၼ်သိုၵ်းၵၼ်ယူႇ သဵင်ၵွင်ႈတိုၵ်ႉ တႅၵ်ႇယူႇၶႃႈဢေႃႈ ၶႅၼ်ႈဝၼ်းတႅၵ်ႇႁဵတ်းၼႆၶႃႈ ၵူဝ်မၼ်းတႅၵ်ႇသေ ႁဝ်းၶႃႈ ပႆႇႁတ်းပွၵ်ႈမိူဝ်းၵၼ်ၶႃႈ၊ လွင်ႈတၢင်းၸွႆႈထႅမ်တႄႉ ၶႅၼ်းယူႇ ပီႈၼွင်ႉ တီႈၸမ်ၵႆၵေႃႈ မႃးၸွႆႈပၼ်ယူႇၶႃႈ ၼႂ်းၸူဝ်ႈဝူင်ႈဝၢင်ႈၼႆႉတႄႉၵေႃႈ တေၵုမ်ႇယူႇ”- ဝႃႈၼႆ။

ၵူၼ်းပၢႆႈၽေးသိုၵ်း ႁူဝ်ၵူၼ်း 700 ပၢႆၼႆႉ မီးတီႈဝတ်ႉဝဵင်းငိုၼ်း   160 ပၢႆ၊ တီႈဝတ်ႉၵုင်းၸူင် 260 ပၢႆ လႄႈ တီႈဝၢၼ်ႈပၢင်ႇၵေႇတုသမ်ႉ မွၵ်ႈ 280 ၵေႃႉ ၼႆယဝ်ႉ။

“ၵူၼ်းပၢႆႈၽေးသိုၵ်း ဢၼ်ပၢႆႈမႃးမႂ်ႇတႄႉ တေပဵၼ်တီႈဝတ်ႉဝဵင်းငိုၼ်းတင်း ဝတ်ႉၵုင်းၸူင်ၶႃႈ တိုၵ်ႉပၢႆႈမႃးၼႂ်းလိူၼ်ၼႆႉ။ တီႈဝၢၼ်ႈပၢင်ႇၵေႇတုတႄႉ ပဵၼ်ၵူၼ်းပၢႆႈၽေးၵဝ်ႇ ပႆႇၸၢင်ႈပွၵ်ႈမိူၼ်ၵၼ်ၶႃႈ ပဵၼ်ၵူၼ်းဝၢၼ်ႈၵုင်းလႅင်းၶႃႈ။ ၵမ်ႈၼမ် သွၼ်ႈယူႇၸွမ်းႁိူၼ်းယေးပီႈၼွင်ႉၽႂ်မၼ်းဝႆႉ”-  ၵူၼ်း ပၢႆႈၽေးသိုၵ်း မိူင်းၵိုင် သိုပ်ႇလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 14/9/2021  မႃး RCSS တင်း SSPP ပဵၼ်ပၢင်တိုၵ်းၵၼ် တၢင်းဢိူင်ႇႁူဝ်ၶၢႆး ၸႄႈဝဵင်းမိူင်းၵိုင် ႁၢဝ်ႈႁႅင်း။ ၽႄႈ လၢမ်းမႃးတၢင်း ဢိူင်ႇပၢင်ႇၵေႇတု၊ ႁၢမ်းငၢႆး၊ တူင်ႇလၢဝ်းလႄႈ ဝၢင်းမိူင်း ၸိူဝ်းၼႆႉ  ၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်းယေး ၼပ်ႉႁူဝ်ႁဵင်။