ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉၵုင်းၸူင် ဢိူင်ႇႁၢမ်းငၢႆး ႁူဝ်ၵူၼ်း 130 ပၢႆ ၼၼ်ႉ ပၢႆႈဢွၵ်ႇႁိူၼ်းမႃး လႆႈၼိုင်ႈဝူင်ႈယဝ်ႉလႄႈ ၸႂ်တိတ်းမၢၵ်ႇၶဝ်ႈတဝ်ႈၼမ်ႉၼႂ်းသူၼ်ၼႂ်းႁိူၵ်ႈ ၶႂ်ႈၶိုၼ်းပွၵ်ႈႁိူၼ်းၼႃႇယဝ်ႉဝႃႈၼႆ။
ၵူၼ်းပၢႆႈၽေးသိုၵ်းၸိူဝ်းၼႆႉ ပဵၼ်ၵူၼ်းဝၢၼ်ႈၽႃလၢမ်းလႄႈ ဝၢၼ်ႈပႅၵ်ႇၼႃးမူၼ်း ၼႂ်းဢိူင်ႇဝၢင်ႈမိူင်း ၸႄႈဝဵင်းမိူင်းၵိုင်။ RCSS လႄႈ SSPP ပိုတ်းယိုဝ်းတိုၵ်းတေႃးၵၼ်ၼႂ်းဝၼ်းတီႈ 8 ပူၼ်ႉမႃးၼႆႉ ႁၢဝ်ႈႁႅင်း၊ ပၢင်တိုၵ်းပဵၼ်ၸမ်ဝၢၼ်ႈၵူၼ်းၼႃႇလႄႈ ဢွၼ်ၵၼ်ပၢႆႈမႃးသူၼ်ႈတီႈဝတ်ႉၵုင်းၸူင် တႃႇ 4-5 ဝၢၼ်ႈ။ ယၢမ်းလဵဝ်ဝၢၼ်ႈ ပၢင်ႇၼွင် ဝၢၼ်ႈၼႃးၽွၵ်း ဝၢၼ်ႈၵုင်းၶမ်းၶဝ်တႄႉဢွၼ်ၵၼ်ပွၵ်ႈၶိုၼ်းဝၢၼ်ႈၽႂ်မၼ်းယဝ်ႉသေတႃႉ ၵိုတ်းယူႇ 2 ဝၢၼ်ႈၼႆႉတႄႉပႆႇၸၢင်ႈပွၵ်ႈ။
ၵူၼ်းႁၢမ်းငၢႆး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ပဵၼ်ၶၢဝ်းလူဝ်ႇဢဝ်မၢၵ်ႇၶဝ်ႈတဝ်ႈၼမ်ႉ လူဝ်ႇၶဝ်ႈသူၼ်ၶဝ်ႈၼႃး ယွၼ်ႉပဵၼ်ၶၢဝ်းၵၢၼ်ငၢၼ်းလႄႈ ၵူၼ်းပၢႆႈၽေးသိုၵ်း လၢတ်ႈဝႃႈ ၶႂ်ႈပွၵ်ႈမိူဝ်းႁိူၼ်းၼႃႇယဝ်ႉၼႆဢေႃႈ။ ဝၢၼ်ႈၶဝ်ၼႆႉသမ်ႉ တူၵ်းဝႆႉၼႂ်းၼႃႈသိုၵ်းၵမ်းလဵဝ် ၵွပ်ႈၼႆလႄႈ ၶဝ်ပႆႇၸၢင်ႈပွၵ်ႈႁိူၼ်းၶႃႈ၊ မုင်ႈမွင်းယွၼ်းသူးႁႂ်ႈ သိုၵ်းသွင်ၾၢႆႇ ၸဵဝ်းၵိုတ်းတိုၵ်းၵၼ်ၵူၺ်းယဝ်ႉၶႃႈ”- ဝႃႈၼႆ။
ယၢမ်းလဵဝ်သမ်ႉ တီႈမိူင်းတႆး ၵတ်းႁႅင်းၽႅဝ်လႄႈ ၵူၼ်းပၢႆႈၽေးသိုၵ်း တီႈဝတ်ႉ ၵုင်းၸူင် လူဝ်ႇၽႃႈႁူမ်ႇၶူဝ်းၼွၼ်း ၶူဝ်းဢုၼ်ႇ ၸိူဝ်းၼႆႉ ဝႃႈၼႆ။
“လွင်ႈၼုင်ႈဝႆ ၽႃႈႁူမ်ႈၶူဝ်းၼွၼ်းတႄႉ တိုၵ်ႉလူဝ်ႇထႅင်ႈယူႇၶႃႈ ပႆႇၵုမ်ႇထူၼ်ႈလီ ။ လႆႈဢဝ်တီႈဝတ်ႉသေ ၸွႆႈပၼ်ဝႆႉဢေႃႈ။ တႃႇၵူၼ်းတေမႃးၸွႆႈၵူၼ်း ပၢႆႈၽေးၵေႃႈ ယွၼ်ႉၸွမ်းသဵၼ်ႈတႃႈသၢႆတၢင်းၼႆႉ ပႆႇမီးလွင်ႈႁူမ်ႇလူမ်ႈလႄႈ ပႆႇႁတ်းမႃး ၸွႆႈထိုင်တီႈၶႃႈ။ မႃးၶွင်ႉမႃးၶမ်ပဵၼ်တီႈပဵၼ်တၢင်းဝႆႉသေ ယွၼ်ႉသၢႆငၢႆၼႂ်းပိုၼ်ႉတီႈ ဢမ်ႇပေႃးၶႅမ်ႉ ၼၼ်ႉၶႃႈယဝ်ႉ”- ၵူၼ်းပိုၼ်ႉတီႈ ႁၢမ်းငၢႆး သိုပ်ႇလၢတ်ႈၼႄၼင်ႇၼႆ။
ယၢမ်းလဵဝ် တၢင်းဝၢၼ်ႈၶဝ်ၼၼ်ႉ သိုၵ်းတင်းသွင်ၾၢႆႇ တိုၵ်ႉၶဵင်ႈၶႅင်ၵၼ်သေဢမ်ႇၵႃး ယူႇယူႇတိုၵ်ႉသိုပ်ႇယိုဝ်းၵၼ်ယူႇ ပဵၼ်မိူဝ်ႈပဵၼ်ၵမ်း ။ ပၢင်တိုၵ်းၵေႃႈ ပဵၼ်လႆႈၵူႈၶၢဝ်း ၵူၼ်းပၢႆႈၽေးသိုၵ်း လၢတ်ႈၼင်ႇၼႆ။
တႄႇဢဝ် ဝၼ်းတီႈ 14/9/2021 ၼၼ်ႉမႃးသေ RCSS တင်း SSPP ပဵၼ်ပၢင်တိုၵ်းၵၼ် တၢင်းဢိူင်ႇႁူဝ်ၶၢႆး ၸႄႈဝဵင်း မိူင်းၵိုင် ႁၢဝ်ႈ ႁႅင်း။ ၽႄႈလၢမ်းမႃးတၢင်း ဢိူင်ႇပၢင်ႇၵေႇတု၊ ႁၢမ်းငၢႆးလႄႈ တူင်ႇလၢဝ်း ၸိူဝ်းၼႆႉ ၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်းယေး ၼပ်ႉႁူဝ် ႁဵင်။
