ၵူၼ်းပၢႆႈၽေးသိုၵ်း တီႈဢိူင်ႇပၢင်ႇၵေႇတု ဝဵင်းမိူင်းၵိုင် ႁူဝ်ၵူၼ်း မွၵ်ႈ 300 ပၢႆႈမႃး ၸမ်သွင်လိူၼ်ယဝ်ႉ ပႆႇလႆႈ ပွၵ်ႈၶိုၼ်းႁိူၼ်းယေး  ၼႂ်းပိုၼ်ႉတီႈ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်း ၵၼ်ယူႇ။

ၵူၼ်းပၢႆႈၽေးသိုၵ်းၼႆႉပဵၼ် ၵူၼ်းဝၢၼ်ႈၵုင်းလႅင်း မႃးယူႇဝႆႉၼႂ်းဢိူင်ႇပၢင်ႇၵေႇတု ၸႄႈဝဵင်းမိူင်းၵိုင်  ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “ၵိုတ်းဝႆႉ မွၵ်ႈ 300 ၼႆႉၶႃႈ ပႆႇလႆႈပွၵ်ႈၶိုၼ်း ႁိူၼ်းယေးၵၼ်။ ၵမ်ႈၼမ် ဢွၼ်ၵၼ် ယူႇသဝ်းၸွမ်းထူဝ်ႈ/ ထေႃႈ၊ ၸွမ်းသိူင်ႇလႄႈ ႁိူၼ်းပီႈၼွင်ႉၽႂ်မၼ်း ၸိူဝ်းၼႆႉ။ တီႈၵျွင်းၼႃးၼိူဝ်တႄႉ ဢမ်ႇမီးယဝ်ႉၶႃႈ။ ထႅင်ႈၾၢႆႇ ၼိုင်ႈၵေႃႈ ယွၼ်ႉပဵၼ်ၶၢဝ်းၵတ်းလႄႈ ႁဝ်းၶႃႈလႆႈဢဝ်ၶူဝ်းဢုၼ်ႇ မိူဝ်းပၼ်ၶႃႈဢေႃႈ။ ၶူဝ်းၸႂ်ႉသွႆၵေႃႈမိူၼ်ၼင်ႇ ၽွင်သၵ်ႉၽႃႈ(သပ်ႉပျႃႇ) ၸိူဝ်းၼႆႉ ဢေႃႈ”- ဝႃႈၼႆ။

 ၾၢႆႇၼိုင်ႈ ယၢမ်းလဵဝ် ပဵၼ်ၽွင်းဢဝ်မၢၵ်ႇတဝ်ႈၶဝ်ႈၼမ်ႉ၊  ၵူၼ်းပၢႆႈၽေးသိုၵ်း ၸိူဝ်းပဵၼ်ၵူၼ်းၼုမ်ႇ ဢွၼ်ၵၼ်ၵႂႃႇၵိၼ်ၸၢင်ႈ  ၶဝ်ႈသူၼ် ႁႃငိုၼ်း။

ၵူၼ်းပၢႆႈၽေးသိုၵ်း ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “  ႁဝ်းၶႃႈၵႂႃႇၵိၼ်ၸၢင်ႈပၢတ်ႇၶဝ်ႈဢေႃႈ။ ပႆႇၸၢင်ႈပွၵ်ႈၶႃႈ သိုၵ်းၼႆႉ တင်းသွင်ၾၢႆႇတိုၵ်ႉထႅမ် ႁႅင်းသိုၵ်း ၶဵင်ႈၵၼ်ဝႆႉယူႇၶႃႈဢေႃႈ။ ဢမ်ႇႁူႉဝႃႈပၢင်တိုၵ်းတေ ပဵၼ်ထႅင်ႈမိူဝ်ႈလႂ် ၵွပ်ႈ ၼႆလႄႈ ႁဝ်းၶႃႈ ပႆႇႁတ်းပွၵ်ႈ ၶႃႈ”- ဝႃႈၼႆ။

  ၶွမ်ႊပတီႊၾၢႆႇၸွႆႈထႅမ်ၵူၼ်းပၢႆႈၽေး မိူင်းၵိုင်ၵေႃႈ တုၵ်းယွၼ်းထိုင်ဝႃႈ သင်ပဵၼ်လႆႈ ၽူႈၸွႆႈထႅမ် ၵူၼ်းပၢႆႈၽေးသိုၵ်း ဢမ်ႇ ဝႃႈ မူႇလႂ် ၸုမ်းလႂ် သုၼ်ႇတူဝ်လႄႈသင် ႁႂ်ႈၵွင်ႉၸူးတင်းၶွမ်ႊပၼီႊၾၢႆႇၸွႆႈထႅမ်ၼႂ်းပိုၼ်ႉတီႈသေ လူင်းၸွႆႈထႅမ်တႄႉ တေတိူဝ်းလီ ဝႃႈၼႆ။

“ၶႂ်ႈတုၵ်းယွၼ်းထိုင်ဝႃႈ မူႇလႂ် ၸုမ်းလႂ် သုၼ်ႇတူဝ်ၵေႃႈလီ သင်ဝႃႈ မိူဝ်းၸွႆႈထႅမ် ၵူၼ်းပၢႆႈၽေးသိုၵ်း ႁဝ်းၶႃႈၸိုင် ႁႂ်ႈၵပ်းသိုပ်ႇတီႈၶွမ်ႊပတီႊၾၢႆႇ ၸွႆႈထႅမ် တီႈၼႂ်းဢိူင်ႇပၢင်ႇၵေႇတုႁဝ်းၶႃႈသေ လူင်းၸွႆႈၼႆ တေတိူဝ်းလီ။ ယွၼ်ႉဝႃႈ ၵၢၼ်ၸွႆႈၼႆႉ ၵူၼ်းပၢႆႈၽေး မၢင်ၵေႃႉ ဢမ်ႇလႆႈႁပ်ႉၵေႃႈမီး။ မၢင်ၵေႃႉသမ်ႉ လႆႈႁပ်ႉပဵၼ်သွင်သၢမ်ၵမ်း ၸိူဝ်းၼႆ ၵေႃႈမီးလႄႈ သင်ဝႃႈ ၵွင်ႉတင်းၶွမ်ႊမတီႊၼႂ်းပိုၼ်ႉတီႈၸိုင် လွင်ႈၸွႆႈထႅမ်ၼႆႉ မၼ်းတေၽႅဝ် ၼႂ်းမိုဝ်း ၵူၼ်းပၢႆႈၽေးႁဝ်းၶႃႈ ၵူႈၵေႃႉဢေႃႈ ၵူၼ်းပၢႆႈၽေးႁဝ်းၶႃႈ ၵဝ်လႆႈၼမ်လႆႈဢေႇဢၼ်ဝႃႈၼၼ်ႉၵေႃႈ မၼ်းတေဢမ်ႇမီးယဝ်ႉၶႃႈ”- ၽူႈ ၸွႆႈထႅမ်ၵူၼ်းပၢႆႈၽေးသိုၵ် တိုၵ်းယွၼ်းလၢတ်ႈၼႄၼင်ႇၼႆ။

တႄႇဢဝ် ဝၼ်းတီႈ 14/9/2021 ၼၼ်ႉမႃးသေ  RCSS တင်း SSPP ပဵၼ်ပၢင်တိုၵ်းၵၼ် တၢင်းဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်   ႁၢဝ်ႈႁႅင်း။ ၽႄႈလၢမ်းမႃးတၢင်း ဢိူင်ႇပၢင်ႇၵေႇတု၊ ႁၢမ်းငၢႆးလႄႈ တူင်ႇလၢဝ်း ၸိူဝ်းၼႆႉ ၵူၼ်းမိူင်းၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်းယေး ၼပ်ႉ ႁူဝ်ႁဵင်။