ရူတ်ႉၵႃးသိုၵ်းမၢၼ်ႈလတ်းဝဵင်းသႅၼ်ဝီယၢမ်းၸဝ်ႈတိုၵ်ႉလပ်းသိင်ႇ မၢၵ်ႇတႅၵ်ႇၸွမ်းလင်ၵႃး တိူဝ်ႉႁိူၼ်းၵူၼ်းမိူင်း ပဵၼ်ၼမ်ႉမိုဝ်းၽႂ်ၵေႃႈဢမ်ႇႁူႉ ။

မိူဝ်ႈၼႆႉ ဝၼ်းတီႈ 6/9/2021 ယၢမ်းၵၢင်ၼႂ် မွၵ်ႈ 1 မူင်း ရူတ်ႉၵႃးသိုၵ်းမၢၼ်ႈလတ်းဝဵင်းၵႂႃႇဢမ်ႇပေႃးႁိုင်မၢၵ်ႇတႅၵ်ႇ 2 လုၵ်ႈ တီႈ ၼိူဝ်သဵၼ်ႈတၢင်းလူင် ၼႂ်းၵႄႈၼွင်လူင်သႅၼ်ဝီလႄႈ ၵၢတ်ႇလူင် ၼႂ်း ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ ။   ၸၢၵ်ႇမၢၵ်ႇသဵၼ်တိူဝ်ႉသႂ်ႇ ႁိူၼ်းယေးၵူၼ်းဝၢၼ်ႈ ၊ မၢၼ်ႇႁူးလႅင်းလႄႈ ၽၵ်းတူႁိူၼ်း လူႉၵွႆၸွမ်းတင်းၼမ် ၵူၼ်းမိူင်း မၢတ်ႇၸဵပ်းလူႉတၢႆတႄႉ ဢမ်ႇမီး  ။

ၵူၼ်း သႅၼ်ဝီ ၵေႃႉၼိုင်ႈ လၢတ်ႈ ၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇတႅၵ်ႇတီႈဝဵင်းသႅၼ်ဝီ 2 လုၵ်ႈၶႃႈ မိူဝ်ႈ ၼႆႉယၢမ်းၵၢင်ၼႂ်ၸဝ်ႉ မွၵ်ႈ 1 မူင်းၼႆႉၶႃႈ။ မၢၵ်ႇၼၼ်ႉ တႅၵ်ႇၼႂ်းၵႄႈ ၼွင်လူင်လႄႈ ၵၢတ်ႇသႅၼ်ဝီၶႃႈဢေႃႈ။ ၸၢၵ်ႇမၢၵ်ႇ သဵၼ် တိူဝ်ႉသႂ်ႇႁိူၼ်းယေးၵူၼ်းဝၢၼ်ႈ ႁိမ်းႁွမ်းၼၼ်ႉ မၢၼ်ႇႁိူၼ်း ၽၵ်းတူၸိူဝ်းၼႆႉ လူႉၵွႆၸွမ်းပႃးၶႃႈ ဝၢႆးၵႃးသိုၵ်းမၢၼ်ႈ လတ်းပူၼ်ႉၵႂႃႇ မွၵ်ႈႁိုင် 15 မိၼိတ်ႉၼႆႉ”-  ဝႃႈၼႆ။

မၢၵ်ႇတႅၵ်ႇဝၢႆးလင်ၵႃးသိုၵ်းမၢၼ်ႈပူၼ်ႉၵႂႃႇယဝ်ႉလႄႈ ၵႃးလႄႈတူဝ်သိုၵ်းမၢၼ်ႈတႄႉ ဢမ်ႇတိူဝ်ႉမၢတ်ႇၸဵပ်း။ ပဵၼ်ၼမ်ႉမိုဝ်းၽႂ်ႁဵတ်းတႄႉတႄႉၵေႃႈဢမ်ႇႁူႉ။ ဢိင်ၼိူဝ် လွင်ႈမၢၵ်ႇတႅၵ်ႇတီႈၸႄႈဝဵင်းသႅၼ်ဝီ 2 လုၵ်ႈၼႆႉသေ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်တူၵ်းၸႂ် တိုၼ်ႇ သၢၼ်ႇၵၼ် ၼႆယဝ်ႉ။

ၵူၼ်းၼုမ်ႇပိုၼ်ႉတီႈ ၸႄႈဝဵင်းသႅၼ်ဝီ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ – “မိူဝ်ႈၵူႈပွၵ်ႈတႄႉ တီႈသႅၼ်ဝီၼႆႉ ၵတ်း ယဵၼ်ၼိမ်လီၶႃႈဢေႃႈ။ ယၢမ်းလဵဝ် ၵၢၼ်မိူင်းဢမ်ႇမီးလွင်ႈၼိမ်သဝ်းသေ ၸင်ႇပဵၼ်မႃးၸိူင်ႉၼႆၶႃႈ။ သင်ဝႃႈ ပဵၼ်မႃး ၸိူင်ႉၼႆ တင်းၶဝ်ႈဢွၵ်ႇဝဵင်းၸိူဝ်းၼႆႉ တေမီးလွင်ႈၵူတ်ႇထတ်းၵၼ်ႁၢဝ်ႈႁႅင်းမႃးၶႃႈယဝ်ႉ။ ယၢမ်းလဵဝ် သိုၵ်းမၢၼ်ႈ ပေႃး ၸႅတ်ႈထၢမ်ႁၢဝ်ႈႁႅင်းယဝ်ႉၶႃႈ။ သင်ၶဝ်ႁဵတ်းၸိူင်ႉၼႆ ၵူၼ်းမိူင်းၼႆႉ ဢမ်ႇမီးၽႂ်ႁတ်းၵႂႃႇမႃးၵၼ်ၶႃႈယဝ်ႉ”-  ဝႃႈၼႆ။

ၼႂ်းၸႄႈဝဵင်းသႅၼ်ဝီၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ယူႇဝႆႉ မိူၼ်ၼင်ႇ ၶွင်ႇသီႇသိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA သိုၵ်းဝၢၼ်ႈႁႆး SSPP/SSA သိုၵ်းတဢၢင်း TNLA ၸိူဝ်းၼႆႉ တူင်ႉၼိုင်ၵႂႃႇမႃးယူႇဝႆႉ ဝႃႈၼႆ။