ၵူၼ်းပၢႆႈၽေးသိုၵ်း တီႈမိူင်းငေႃႉ ၵိူတ်ႇလုၵ်ႈၸၢႆးဢွၼ်ႇၼႂ်းပၢင်သဝ်း

ဢွင်ႈတီႈၵူၼ်းပၢႆႈၽေးသိုၵ်း မိူင်းငေႃႉ ဢၼ်ၵူတ်ႇထတ်းႁၼ်ၵူၼ်း တိတ်းၸပ်းၶူဝ်ႊဝိတ်ႉ 19 ၼၼ်ႉ မီးမႄႈပုမ်ယႂ်ႇ ၵေႃႉၼိုင်ႈ ၵိူတ်ႇလုၵ်ႈဢွၼ်ႇလႅင် ပဵၼ်ၽူႈၸၢႆး  ။

မိူဝ်ႈၼႆႉ ဝၼ်းတီႈ 3/9/2021 ယၢမ်းၵၢင်ၼႂ် 6 မူင်း ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉတႃႈလူင် ဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ မီးမႄႈပုမ်ယႂ်ႇၵေႃႉၼိုင်ႈ ၵိူတ်ႇလုၵ်ႈဢွၼ်ႇလႅင် ပဵၼ်ၽူႈၸၢႆးဢွၼ်ႇ။ ဢွင်ႈ တီႈၼၼ်ႉသမ်ႉ မိူဝ်ႈၼႆႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်း 12 ၵေႃႉ ၼႆ ယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းငေႃႉ လၢတ်ႈၼႄၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉ ၵၢင်ၼႂ် ၵူၼ်းပၢႆႈၽေး   ၵိူတ်ႇလုၵ်ႈဢွၼ်ႇလႅင်ၵေႃႉၼိုင်ႈ ပဵၼ်ၽူႈၸၢႆးဢွၼ်ႇ၊ ၵိူတ်ႇတီႈႁိမ်းႁူင်းထမ်ႇမႃႇယူင်ႇ တီႈၵူၼ်းပၢႆႈၽေးယူႇသဝ်း ၼၼ်ႉ ယၢမ်းလဵဝ်။ ႁဝ်းၶႃႈလႆႈ သုမ်ႉၶႃးဢွၼ်ႇသေ မုင်းဝႆႉပၼ်ၶႃႈဢေႃႈ။ ၾၢႆႇပၢႆးယူႇလီမႃးၵိူတ်ႇပၼ်ဢေႃႈ”-  ဝႃႈၼႆ။

ဢွင်ႈတီႈပၢင်သဝ်းၵူၼ်းပၢႆႈၽေးသိုၵ်း တီႈဝတ်ႉတႃႈလူင်ၼႆႉသမ်ႉ မိူဝ်ႈၼႆႉ ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 ထႅင်ႈ 12 ၵေႃႉ ၼႆယဝ်ႉ။

လုင်းၸၢႆးလႅင်းႁၢၼ် ႁူဝ်ပဝ်ႈၵေႃလိၵ်ႈလၢႆး ၸႄႈဝဵင်းၵျွၵ်ႉမႄး လၢတ်ႈၼႄၽူႈတွႆႇႁွၵ်ႈဝႃႈ – “ႁဝ်းၶႃႈၵေႃႈ သင်ႇဝႆႉ တီႈၶွမ်ႊ မတီႊၵူၼ်းပၢႆႈၽေး ဝႆႉယူႇၶႃႈ တႃႇမႄႈလုၵ်ႈဢွၼ်ႇလႄႈ လုၵ်ႈဢွၼ်ႇလႅင် ပေႃးတေလွတ်ႈၽႄးလီၼၼ်ႉ ယႃႇႁႂ်ႈ ၵူၼ်းၶဝ်ႈဢွၵ်ႇၵႂႃႇသူႉၸႂ်း ၵႂႃႇဢုမ်ႈ ၵႂႃႇႁွပ်ႇ ၵႂႃႇၼူမ် လႃးလႃး။ ယၢမ်းလဵဝ်ၼႆႉ ပႆႇၵိုင်ႇလီပၼ်ၽႂ်ၶဝ်ႈ ၸႂ်းၶႃႈ ။ ယွၼ်ႉဝႃႈတီႈ ၼၼ်ႈသမ်ႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉဝႆႉလႄႈ ၵူဝ်ၸိူဝ်ႉမႅင်းၵႂႃႇ တိတ်းၸပ်းမႄႈလုၵ်ႈဢွၼ်ႇ လႄႈ လုၵ်ႈဢွၼ်ႇၶႃႈဢေႃႈ”-  ဝႃႈၼႆ။

ၵူၼ်းပၢႆႈၽေးသိုၵ်း ဢၼ်မႃးၵိူတ်ႇလုၵ်ႈတီႈဝတ်ႉတႃႈလူင်ၼၼ်ႉ ပဵၼ်ၵူၼ်းဝၢၼ်ႈႁိူၼ်းဝူဝ်း ၸိုဝ်ႈႁွင်ႉၼၢင်းဝိၼ်းၵျီႇလႄႈ ၵေႃႉပဵၼ်ၸဝ်ႈၽူဝ်သမ်ႉ ၸိုဝ်ႈႁွင်ႉ ၸၢႆးၵျေႃႇဝိၼ်း ။ လႆႈပၢႆႈၽေးသိုၵ်းမႃးသွၼ်ႈယူႇဝႆႉ တီႈဝတ်ႉတႃႈလူင်ၼႆႉ မီးၶၢဝ်းတၢင်း မွၵ်ႈ 2 လိူၼ်ယဝ်ႉလႆႈႁူႉၼင်ႇၼႆ။

ပၢင်သဝ်းၵူၼ်းပၢႆႈၽေးသိုၵ်းတီႈဝၢၼ်ႈတႃႈလူင်ၼႆႉ မႄႈပုမ်ယႂ်ႇ/ မႄႈမၼ်း  ဢၼ်တေၵိူတ်ႇလုၵ်ႈထႅင်ႈ မီး 4 ၵေႃႉ လုင်းၸၢႆးလႅင်း ႁၢၼ်လၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉတႃႈလူင်ၼႆႉ ပဵၼ်ၵူၼ်းဝၢၼ်ႈႁိူၼ်းဝူဝ်း၊ ဝၢၼ်ႈၶိုမ်းမႂ်ႇလႄႈ ဝၢၼ်ႈတႃႇတေႁွင်ႇ ၸိူဝ်းၼႆႉ ႁူဝ်ၵူၼ်းတေမီး 100 ပၢႆ ယွၼ်ႉလႆႈပၢႆႈၽေးသိုၵ်း ယွၼ်ႉသိုၵ်း TNLA, SSPP လႄႈ RCSS ၼႆယဝ်ႉ။

မိူဝ်ႈဝၼ်းတီႈ 26/8/2021 ပူၼ်ႉမႃးၼၼ်ႉၵေႃႈ ၵူၼ်းပၢႆႈၽေးသိုၵ်းတီႈမိူင်းတၢင်ႈ  ၵေႃႉၼိုင်ႈၵေႃႈ ၵိူတ်ႇ လုၵ်ႈဢွၼ်ႇ ပဵၼ်ၽူႈယိင်း  ။