Sunday, May 19, 2024

ၵူၼ်းပၢႆႈၽေးသိုၵ်း တီႈမိူင်းၵိုင် 100 ပၢႆ မႆႈၸႂ် ၵူဝ်တိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ

Must read

ၵူၼ်းပၢႆႈၽေးသိုၵ်း ဢၼ်လုၵ်ႉတၢင်းသီႇပေႃႉ ပၢႆႈမႃးသွၼ်ႈဝႆႉတီႈဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ႁူဝ်ၵူၼ်း 100 ပၢႆၼၼ်ႉ မႆႈၸႂ် ၵူဝ်တိတ်း ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ဝႃႈၼႆ။

Photo Tai Youth- ၵူၼ်းပၢႆႈၽေးသိုၵ်း တီႈဢိူင်ႇတူင်ႇလၢဝ်း မိူင်းၵိုင်

တႄႇဢဝ် ဝၼ်းတီႈ 11-23/8/2021 ၼႆႉ ၵူၼ်းပၢႆႈၽေးသိုၵ်း ဢၼ်လုၵ်ႉတၢင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ပၢႆႈပၢင်တိုၵ်း RCSS တင်း SSPP သေမႃး သွၼ်ႈဝႆႉတီႈဝတ်ႉပၢင်လၢင်ႈ ဝၢၼ်ႈၽၵ်းႁီႉ ဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း  ႁူဝ်ၵူၼ်း 100 ပၢႆၼၼ်ႉ ဢွၼ်ၵၼ်မႆႈၸႂ် ၵူဝ်တိတ်းၸပ်းၸိူဝ်ႉမႅင်းၶူဝ်ႊဝိတ်ႉ  ။

- Subscription -

ၵူၼ်းဝၢၼ်ႈၽၵ်းႁီႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယွၼ်ႉဝႃႈ တီႈၼႂ်းဢိူင်ႇတူင်ႇလၢဝ်းၼႆႉ မီးၵူၼ်း ပဵၼ်ၶူဝ်ႊဝိတ်ႉဝႆႉလႄႈ လွင်ႈၼႆႉ ႁဝ်းၶႃႈၵေႃႈ မႆႈၸႂ် တႃႇၵူၼ်းပၢႆႈၽေးသိုၵ်းတႄႉၶႃႈ။ ၼင်ႇႁိုဝ် တေဢမ်ႇတိတ်းၸပ်း ၼၼ်ႉ ႁဝ်းၶႃႈၵေႃႈ ႁႃလၢႆးတၢင်းၵႅတ်ႇၶႄႁႄႉၵင်ႈယူႇ။ ႁၢမ်ႈၵူၼ်းၶဝ်ႈဢွၵ်ႇ ၼႂ်းဝၢင်းၵျွင်း။ တိုၵ်းသူၼ်းပၼ်ႁႂ်ႈ ၵႆႉလၢင်ႉမိုဝ်း တိုဝ်းၽႃႈပူၵ်ႉပၢၵ်ႇ ႁဵတ်းၼႆၶႃႈဢေႃႈ”-  ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်ဝႆႉတီႈဢိူင်ႇတူင်ႇလၢဝ်းၼႆႉ တီႈဝတ်ႉပၢင်လၢင်ႈ ႁူဝ်ၵူၼ်း မီး 107 ၵေႃႉ ၸိူဝ်းပၢႆႈမႃးသွၼ်ႈဝႆႉ ၸွမ်းႁိူၼ်းယေး ၵူၼ်းဝၢၼ်ႈၽၵ်းႁီႉသမ်ႉ တေမီးမွၵ်ႈ 50 ။ႁူမ်ႈၵၼ် တင်းမူတ်း တေမီးမွၵ်ႈ 150 ၵေႃႉ ၼႆႉ ဝႃႈၼႆ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တီႈဢိူင်ႇတူင်ႇလၢဝ်း မီးၵူၼ်းတိတ်းၸပ်းၶူဝ်ႊဝိတ်ႉ 19 ဝႆႉ 4 ၵေႃႉ။ ၼႂ်းၶဝ် 4 ၵေႃႉၼၼ်ႉ လႆႈဢဝ်မႃးယူတ်းယႃတူဝ်တီႈႁူင်းယႃမိူင်းၵိုင်ယဝ်ႉ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ဢိူင်ႇတူင်ႇလၢဝ်းၼႆႉ ပဵၼ်ၵူၼ်းဝၢၼ်ႈ ၼႂ်းဢိူင်ႇဝၢၼ်ႈၸိင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ပဵၼ်ၵူၼ်းဝၢၼ်ႈၵုင်းၵေႃႇ၊ ဝၢၼ်ႈၵျွင်း၊ ဝၢၼ်ႈၼွင်ပိင်၊ ဝၢၼ်ႈလွႆလူင် ၸိူဝ်းၼႆႉ။

မိူဝ်ႈဝႃး ဝၼ်းတီႈ 23 သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈႁိမ်းဝၢၼ်ႈၵုင်းၵေႃႇ ဢိူင်ႇဝၢၼ်ႈၸိင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၵူၼ်းဝၢၼ်ႈ 500 ပၢႆ လႆႈပၢႆႈမႃးသွၼ်ႈဝႆႉတီႈဝတ်ႉၵုင်းၵေႃႇ ၼႆယဝ်ႉ။

တႄႇဢဝ် ႁူဝ်လိူၼ်ၵျုၼ်ႊၼၼ်ႉမႃး သိုၵ်း RCSS တင်း SSPP တႄႇပဵၼ်ပၢင်တိုၵ်း ၵၼ်မႃးႁၢဝ်ႈႁႅင်းထႅင်ႈ ၵဵဝ်ႇလူၺ်ႈ လွင်ႈပၼ်ႁႃၼႃႈတီႈသေ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇ လႆႈပၢႆႈၽေးသိုၵ်းသေဢမ်ႇၵႃး တုမ်ႉ ယွၼ်ႈပႃး လွင်ႈၵၢၼ်ၽုၵ်ႇသွမ်ႈ ၸိူဝ်းၼႆႉ တင်းၼမ်။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း