ပၢင်တိုၵ်း တီႈၵျွၵ်ႉမႄး ၵူၼ်းမိူင်းမၢတ်ႇၸဵပ်း ႁိူၼ်းယေး လူႉၵွႆ

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼင်ႇၵၼ် ၼႂ်းမိူင်းတႆး ပိုတ်းယိုဝ်းၵၼ် ႁၢဝ်ႈႁႅင်း ၵူၼ်းမိူင်းပိုၼ်ႉတီႈပွတ်းၵျွၵ်ႉမႄး လႆႈပၢႆႈ ၽေးသိုၵ်းၼပ်ႉႁဵင်   ၵူၼ်းမိူင်း တိူဝ်ႉၺႃးၸၢၵ်ႇမၢၵ်ႇ   ႁိူၼ်းယေးၵေႃႈလူႉၵွႆၸွမ်း ။

မိူဝ်ႈဝႃး ဝၼ်းတီႈ 17/8/2021 သိုၵ်း TNLA, SSPP တင်း RCSS ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းဢိူင်ႇပၢင်ၵွၼ် ၸႄႈ ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တိူဝ်ႉၺႃးၵူၼ်းမိူင်း လႆႈမၢတ်ႇၸဵပ်းၸွမ်း ၵေႃႉၼိုင်ႈ ၊   ႁိူၼ်းယေးၵူၼ်းဝၢၼ်ႈ ပၢင်ၵွၼ်တိူဝ်ႉၸၢၵ်ႇမၢၵ်ႇသေလူႉၵွႆၸွမ်း 2 လင် ။

ၵူၼ်းဝၢၼ်ႈ  ပၢင်ၵွၼ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈဝႃး သဵင်ၵွင်ႈတႅၵ်ႇၸဵမ်ၸဝ်ႉ တႄႇဢဝ် 3 မူင်း ၵၢင်ၼႂ်ထိုင် 3 မူင်းဝၢႆးဝၼ်းၼႆႉၶႃႈ။ ၵူၼ်းဝၢၼ်ႈ ၺႃးၸၢၵ်ႇမၢၵ်ႇၸွမ်း တိူဝ်ႉၺႃးတီႈႁူဝ်မႃႇမၼ်းၸၢႆး လႆႈမၢတ်ႇၸဵပ်းဢိတ်း ဢွတ်း။ ယဝ်ႉၵေႃႈ ႁိူၼ်းၵူၼ်းဝၢၼ်ႈပၢင်ၵွၼ်မႂ်ႇသမ်ႉ တိူဝ်ႉၺႃးမၢၵ်ႇၵွင်ႈ 2 လင် ၼႆႉၶႃႈဢေႃႈ”- ဝႃႈၼႆ။

မိူဝ်ႈၼႆႉ ဝၼ်းတီႈ 18/8/2021 ယၢမ်းၵၢင်ၼႂ် မွၵ်ႈ 8 မူင်း ပၢင်တိုၵ်းတႄႇပဵၼ်ထႅင်ႈ တၢင်းပွတ်းဢိူင်ႇပၢင်ၵွၼ် ယွၼ်ႉၾူၼ် တူၵ်းႁႅင်းသေ သဵင်ၵွင်ႈတႄႉဢမ်ႇပေႃးႁႅင်းတၢၼ်ႇ မိူဝ်ႈဝႃး ၵူၼ်းပွတ်းဝၢၼ်ႈပၢင်ၵွၼ် သိုပ်ႇလၢတ်ႈၼင်ႇၼႆ။

ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄးၼႆႉ ၵူၼ်းပၢႆႈၽေးၸုပ်ႈၵဝ်ႇ ၸုပ်ႈမႂ်ႇ ႁူမ်ႈၵၼ် တင်းမူတ်းတေမီး 1,500 ပၢႆ ၵမ်ႈၼမ် ပဵၼ်ၵူၼ်းၼႂ်းဢိူင်ႇတေႃႉသၢင်ႇ လႄႈ ဢိူင်ႇပၢင်ၵွၼ်  ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇႁဝ်းၶႃႈ လႆႈႁူႉဝႆႉတႄႉ ပၢႆႈ မႃးတီႈမိူင်းတၢင်ႈ၊ ၼမ်ႉသေႃႉ၊ ၵိဝ်ႇသွင်း ၸိူဝ်းၼႆႉ ယဝ်ႉၵေႃႈ ႁိူၼ်းပီႈၼွင်ႉၽႂ်မၼ်းၼႂ်းဝဵင်းထႅင်ႈ။ ၵူၼ်းပၢႆႈၽေးသိုၵ်း ၸုပ်ႈမႂ်ႇၼႆႉတႄႉ  လူဝ်ႇတၢင်းၸွႆႈထႅမ် ၽႃႈႁူမ်ႇၶူဝ်းၼွၼ်း၊ သုတ်း၊ ၶဝ်ႈၼမ်ႉတၢင်းၵိၼ်  ၊ ၵူၼ်းပၢႆႈၽေး ၸုပ်ႈ ၵဝ်ႇသမ်ႉ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် လႄႈ ၽွင်သၵ်ႉၶူဝ်း သပ်ႉပျႃႇဢၢပ်ႇၼမ်ႉ ၸိူဝ်းၼႆႉ”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃး တီႈႁူင်းႁဵၼ်းၸၼ်ႉသုင်ၵိင်ႇၽႄ မိူင်းတၢင်ႈ ႁူဝ်ၵူၼ်း 82 ၵေႃႉၼႆႉ ပဵၼ်ၵူၼ်းဝၢၼ်ႈပၢင် ၵွၼ်လႄႈ ဝၢၼ်ႈႁူးၵွတ်ႈ  ၊ တီႈၼမ်ႉသေႃႉသမ်ႉ ပဵၼ်ၵူၼ်းဝၢၼ်ႈပၢင်ၵွၼ်  111 ၵေႃႉ ၊  တီႈၵိဝ်ႇသွင်း မီးၵူၼ်းဝၢၼ်ႈပၢင်ၸၢမ်   101 ၵေႃႉ လႄႈ တီႈဝၢၼ်ႈႁူးသူၼ်  ပဵၼ်ၵူၼ်း ဝၢၼ်ႈၵဵင်ၵႆႇ 100 ပၢႆ  ။

လိူဝ်ၼၼ်ႉ ၸိူဝ်းပၢႆႈၵႂႃႇသွၼ်ႈဝႆႉ ၸွမ်းႁိူၼ်းပီႈၼွင်ႉၽႂ်မၼ်း ၼႂ်းဝဵင်းသမ်ႉ တင်းမူတ်း ႁူဝ်ၵူၼ်းတေမီး 604 ၵေႃႉ။ ပဵၼ် ၵူၼ်းဝၢၼ်ႈပုင်းလူင် (ပုံးလုံ)၊ ၼမ်ႉမၢင်း( နမ့်မန်း) ၊ ၶိုမ်းမႂ်ႇ (ချုံးသစ်)၊ ပၢင်ၵွၼ် (ပန်ကွမ်)၊ ႁူးၵွတ်ႈ(ဟူးကွက်) လႄႈ ပၢင်ၽႅၵ်ႇ (ပန်ဖြတ်) ၸိူဝ်းၼႆႉ။

ၼွၵ်ႈလိူဝ်ၼၼ်ႉ ၵူၼ်းၵဝ်ႇ ဢၼ်ပၢႆႈမႃးသွၼ်ႈဝႆႉတီႈ ၵိင်ႇၽႄဝဵင်းမိူင်းငေႃႉၼၼ်ႉသမ်ႉ တင်းမူတ်းမီးဝႆႉ 470 ၵေႃႉ။ ၼႂ်း ၼၼ်ႉ မၢၼ်ႈဝဵင်း 42 ၵေႃႉ၊ မၢၼ်ႈပိုၼ်ႉ 100 ၵေႃႉ၊ ၵုၼ်ၵွၵ်ႇ 36 ၵေႃႉ၊ ၼမ်ႉသူၼ် 54 ၵေႃႉ၊ ၵေႃလိၵ်ႈလၢႆး မိူင်းငေႃႉ 69 ၵေႃႉ၊ တႃႈလူင် 95 ၵေႃႉ၊ ဝၢၼ်ႈႁႆး 50 ၵေႃႉလႄႈ မၢၼ်ႈႁူၺ်ႈ 24 ၵေႃႉ ၼႆယဝ်ႉ။