ၵူၼ်းဝၢၼ်ႈၶိုမ်းမႂ်ႇ ၸႄႈဝဵင်းၵျွၵ်ႉမႄး ဢွၼ်ၵၼ်ပၢႆႈၽေးသိုၵ်းၵႂႃႇယူႇသဝ်းတီႈမိူင်းငေႃႉ ႁိူၼ်းၵူၼ်းဝၢၼ်ႈ 2 လင်ၺႃးၽဝ်   ပဵၼ်ၼမ်ႉမိုဝ်းၽႂ် ဢမ်ႇမီးၽႂ်ႁၼ်သေတႃႉ ဝၢႆးပၢင်တိုၵ်းယဝ်ႉ သိုၵ်းတဢၢင်း TNLA   တႄႉတူင်ႉၼိုင်ယူႇသဝ်းဝႆႉၼႂ်းဝၢၼ်ႈ  ၵူၼ်းဝၢၼ်ႈဢၼ်ပၢႆႈၽေးသိုၵ်းမႃးမီးတီႈ မိူင်းငေႃႉလၢတ်ႈ။

ဝၼ်းတီႈ 27/7/2021 TNLA လႄႈ SSPP ဢၼ်ပဵၼ်လုၵ်ႈၸုမ်း ဢူၺ်းလီပွတ်းႁွင်ႇ လႄႈတင်း RCSS/SSA ပိုတ်းယိုဝ်းၵၼ်ႁိမ်းဝၢၼ်ႈၶိုမ်းမႂ်ႇ ၊ ၵူၼ်းဝၢၼ်ႈၶိုမ်းမႂ်ႇလႄႈဝၢၼ်ႈၵျွင်းၶမ်း ဢွၼ်ၵၼ်ပၢႆႈၽေးသိုၵ်းၵႂႃႇသွၼ်ႈယူႇတီႈမိူင်းငေႃႉ။ ဝၢႆးလင်ပၢင်တိုၵ်းယဝ်ႉ ၾႆးမႆႈႁိူၼ်းၵူၼ်းဝၢၼ်ႈၵျွင်းၶမ်း 2 လင် ။

ၵူၼ်းပၢႆႈၽေးသိုၵ်းဢၼ်ႁွတ်ႈမိူင်းငေႃႉလၢတ်ႈတီႈၽူႈတွႆႇႁွၵ်ႈဝႃႈ -“မိူဝ်ႈႁဝ်းၶႃႈပၢႆႈဢွၵ်ႇမႃး ႁၼ်ၾႆးၵေႃႈမႆႈႁိူၼ်း 2 လင်ၶႃႈဢေႃႈ။ ပဵၼ်ၽႂ်ၸုမ်းလႂ် မႃးၽဝ်ၵေႃႈဢမ်ႇႁူႉၶႃႈ ဢမ်ႇႁၼ်ၵေႃႉၽဝ်မၼ်း။ ၵူၺ်းၵႃႈ သိုၵ်းလွႆတႄႉတူင်ႉၼိုင် ယူႇသဝ်းဝႆႉၼႂ်းဝၢၼ်ႈၶႃႈဢေႃႈ ။ ယဝ်ႉၵေႃႈ ၵွၼ်ႇၼႃႈပဵၼ်ပၢင်တိုၵ်း ၼၼ်ႉ ၵူၼ်းသိုၵ်းလွႆ မႃးၶမ်ႁႅဝ်ႉၼၢမ် မၢတ်ႇၸဵပ်းႁၢဝ်ႈႁႅင်း 2 ၵေႃႉ တီႈႁိမ်းဝၢၼ်ႈၼႆႉသေၶဝ်ၸူး ၸႂ်လမ်ဢၼ်ၼၼ်ႉၶႃႈယူဝ်ႉ” – ဝႃႈၼႆ။

ႁိူၼ်းၵူၼ်းဝၢၼ်ႈဢၼ်ၺႃးၽဝ်ၼၼ်ႉ ပဵၼ်ႁိူၼ်းၵင်ႈၽႃ မုင်းလဵၵ်း။ ၵူၼ်းဝၢၼ်ႈတႄႉဢွၼ်ၵၼ် ပၢႆႈၽေးသိုၵ်းဝႆႉ ။ မိူဝ်ႈၵွၼ်ႇတီႈႁိမ်းႁွမ်းဝၢၼ်ႈၶိုမ်းမႂ်ႇၼႆႉပဵၼ်တီႈယူႇသိုၵ်း RCSS/SSA ၵူၺ်းၵႃႈဝၢႆးလင်ပၢင်တိုၵ်းယဝ်ႉ သိုၵ်း RCSS ဢမ်ႇယူႇသဝ်းႁိမ်းဝၢၼ်ႈယဝ်ႉသေ သိုၵ်းTNLA သမ်ႉမႃးယူႇသဝ်းတူင်ႉၼိုင်ဝႆႉလႄႈၵူၼ်းပၢႆႈၽေးသိုၵ်းၵေႃႈဢမ်ႇပႆႇႁတ်းပွၵ်ႈၶိုၼ်းႁိူၼ်း ၊  ၼၢင်းယိင်းဢႃယုသႅၼ်းပၢၼ် 40 ပၢႆ ၵူၼ်းပၢႆႈၽေးသိုၵ်းႁွတ်ႈမိူင်းငေႃႉ လၢတ်ႈ။

ၵဵဝ်ႇၵပ်းလွင်ႈၽဝ်ႁိူၼ်းၼႆႉသေ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ – “ဢမ်ႇၸႂ်ႈၼမ်ႉမိုဝ်း TNLA ။  ဢမ်ႇလႆႈပၼ်ဢၼုယၢတ်ႈၵူၼ်းသိုၵ်း ႁဵတ်းႁၢႆႉတေႃႇၵူၼ်းမိူင်း။ ပဵၼ်ၶၢဝ်ႇၵႅၵ်းၶၢဝ်ႇပွမ် ဢၼ်မၢပ်ႇမႂ် TNLA ဝႆႉၵူၺ်း ”- ဝႃႈၼႆ။

ၶၢဝ်းလူင်းၼႃး ႁဵတ်းၵၢၼ်သူၼ်ႁႆႈၼႆႉ ယွၼ်ႉၽေးပၢင်တိုၵ်းသိုၵ်းသိူဝ်လႄႈၵူၼ်းဝၢၼ်ႈၶိုမ်းမႂ်ႇ ၶိုမ်းၵဝ်ႇ ၵျွင်းၶမ်း မွၵ်ႈ 600 ပၢႆႈမႃးယူႇသဝ်းမီးဝႆႉတီႈမိူင်းငေႃႉ ၊ ႁၼ်ႉတေႃႇထိုင်ယၢမ်းလဵဝ်ပႆႇၸၢင်ႈပွၵ်ႈၶိုၼ်း ႁိူၼ်းယေး။