ၵူၼ်းပၢႆႈၽေးသိုၵ်း ထဝ်ႈယိင်းဢႃယု 70 ပၢႆၵေႃႉၼိုင်ႈ ဢၼ်ပၢႆႈမႃးသွၼ်ႈဝႆႉ တီႈမိူင်းငေႃႉၼၼ်ႉ လႆႈလူႉသဵင်ႈသုတ်းမုၼ်ၵႂႃႇ လူၺ်ႈတၢင်းပဵၼ်ၵူၼ်းထဝ်ႈ ဝႃႈၼႆ။
ဝၼ်းတီႈ 27/7/2021 ယၢမ်းႁူဝ်ၶမ်ႈမွၵ်ႈ 5 မူင်းၶိုင်ႈ ထဝ်ႈယိင်း ဢႃယု 70 ပၢႆ ၵူၼ်းဝၢၼ်ႈၶိုမ်း ဢၼ်ပၢႆႈမႃးသွၼ်ႈဝႆႉတီႈ မၢၼ်ႈႁႆး ၵိင်ႇၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ လႆႈလူႉသဵင်ႈၵႂႃႇ လူၺ်ႈတၢင်းပဵၼ် ၵူၼ်း ထဝ်ႈ ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၵျွၵ်ႉမႄးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵူၼ်းထဝ်ႈ ဢႃယု 70 ပၢႆ ထဝ်ႈယိင်း လူႉသဵင်ႈၵႂႃႇ မိူဝ်ႈဝၼ်းတီႈ 27 ၼၼ်ႉၶႃႈ ယွၼ်ႉၵူၼ်းထဝ်ႈၼၼ်ႉ မီးဝႆႉတၢင်းပဵၼ်ၵူၼ်းထဝ်ႈမႃးႁိုင်ယဝ်ႉ ၶႃႈ။ ႁဵတ်းၼၼ်သေ လႆႈလူႉသဵင်ႈၵႂႃႇတီႈမၢၼ်ႈႁႆးၼႆႉၶႃႈဢေႃႈ။ ဢမ်ႇၸႂ်ႈ တၢင်းပဵၼ်ၶူဝ်ႊဝိတ်ႉ 19 ၶႃႈ”- ဝႃႈၼႆ။
ထိုင်မႃး မိူဝ်ႈဝၼ်းတီႈ 28/7/2021 ၼႆႉ ယူႇတီႈပီႈၼွင်ႉၸိူဝ်ႉၶိူဝ်းလႄႈ ၵူၼ်းမၢၼ်ႈႁႆး ၵူၼ်းပၢႆႈၽေး ဢၼ်ပၢႆႈမႃးသွၼ်ႈ ဝႆႉ တီႈၼၼ်ႈ ဢွၼ်ၵၼ်ပူၼ်ႉၶၢပ်ႈတူဝ် ထဝ်ႈယိင်း ဢႃယု 70 ပၢႆၼၼ်ႉၵႂႃႇ ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈမိူင်းငေႃႉၼႆႉ တေၵိုတ်းႁူဝ် ၵူၼ်းမွၵ်ႈ 100 ပၢႆ ။ ၸိူဝ်ႉၶၢႆႉၵႂႃႇယူႇတၢင်ႇတီႈၵေႃႈမီး၊ မၢင်ၵေႃႉၶၢႆႉ ယူႇၸွမ်းႁိူၼ်းပီႈၼွင်ႉ သေ ႁဵတ်းၵၢၼ်ႁႃၵိၼ် လဵင်ႉတွင်ႉ တၢင်းဝဵင်းၵျွၵ်ႉမႄး ၵေႃႈမီးၼမ်။
