Saturday, May 25, 2024

RCSS တင်း SSPP ပဵၼ်ပၢင်တိုၵ်းၵၼ် ၼႂ်းဝဵင်းၼမ်ႉလၼ်ႈထႅင်ႈ

Must read

မိူဝ်ႈၼႆႉ ဝၼ်းတီႈ 26/7/2021 ယၢမ်းၵၢင်ၼႂ် မွၵ်ႈ 5 မူင်းၶိုင်ႈ သိုၵ်း RCSS တင်း SSPP ပဵၼ်ပၢင်တိုၵ်းၵၼ် ၼႂ်းဢိူင်ႇဝၢၼ်ႈ ၸိင်း ဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းမိူင်းပိုၼ်ႉတီႈလႆႈဢွၼ်ၵၼ်ပၢႆႈၶဝ်ႈၼႂ်းဝဵင်းၼမ်ႉလၼ်ႈ ၵမ်ႈၽွင်ႈ။

ၵူၼ်းပၢႆႈၽေးသိုၵ်းႁွတ်ႈထိုင်ၼမ်ႉလၼ်ႈ

ၵူၼ်းပိုၼ်ႉတီႈ ၼမ်ႉလၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ သဵင်ၵွင်ႈ တႅၵ်ႇၸဵမ်ၸဝ်ႉၶႃႈ တႄႇဢဝ် ယၢမ်း ၵၢင်ၼႂ် မွၵ်ႈ 5 မူင်းၶိုင်ႈၼႆႉၶႃႈဢေႃႈ။ ပဵၼ်သိုၵ်းတႆးႁဝ်းၶႃႈ သွင်ၼၼ်ႉၵူၺ်း။ သဵင်ၵွင်ႈတႄႉ ငိၼ်းလီၼႃႇၶႃႈ သဵင်ၵွင်ႈလူင်၊ ၵွင်ႈၸၢၵ်ႈ၊ ၵွင်ႈဢွၼ်ႇ ၸိူင်ႉၼႆႉ ပၢင်တိုၵ်းၼႆႉ မၼ်းတေပဵၼ် ၼႂ်းၵႄႈ ဝၢၼ်ႈတၢပ်ႈ – ယေႇၽိဝ်ႇၼႆႉၶႃႈ။ ထိုင်ယၢမ်းၵၢင်ၼႂ် 9 မူင်းၼႆႉ သဵင်ၵွင်ႈၸင်ႇယဵၼ်လူင်းၶႃႈ”- ဝႃႈၼႆ။

- Subscription -

ယၢမ်းလဵဝ် ၼႂ်းဝဵင်းၼမ်ႉလၼ်ႈၼႆႉ ၵူၼ်းတိတ်းၸပ်းၸိူဝ်ႉမႅင်းၶူဝ်ႊဝိတ်ႉ 19 ၵေႃႈ ၼမ်ဝႆႉလႄႈ ၵူၼ်းမိူင်းပိုၼ်ႉတီႈ ပွတ်း သၢႆၼၼ်ႉ ၵမ်ႈၼမ် ဢွၼ်ၵၼ်ယူႇၼႂ်းႁိူၼ်းယေး Stay at Home    တႃႇၵႅတ်ႇၵင်ႈ ၼင်ႇ ႁိုဝ်တၢင်းပဵၼ် တေဢမ်ႇၽႄႈလၢမ်းၸပ်းၵၼ်ႁၢဝ်ႈႁႅင်း  ဝႃႈၼႆ။

“ၵူၼ်းပၢႆႈၽေးသိုၵ်းတႄႉ လႆႈငိၼ်းဝႃႈ  ၶဝ်ႈမႃးတၢင်း ၼမ်ႉလၼ်ႈၼႆႉၵေႃႈ မီးၼမ်ဝႆႉၼႆၶႃႈ။ ၵူၺ်းၵႃႈ သဵၼ်ႈ မၢႆမီးၵႃႈႁိုဝ်တႄႉ ပႆႇႁူႉ ယွၼ်ႉဝႃႈ ယၢမ်းလဵဝ်ၼႆႉ ႁဝ်းၶႃႈ သမ်ႉဢွၼ်ၵၼ်ဢမ်ႇႁတ်းဢွၵ်ႇႁိူၼ်း    ယွၼ်ႉတၢင်းပဵၼ်ၶူဝ်ႊဝိတ်ႉ 19   ၶႃႈ။ ၵမ်ႈၼမ် ဢၼ်ပၢႆႈမႃးတၢင်းၼမ်ႉလၼ်ႈၼႆႉ တေပဵၼ်ၵူၼ်းထဝ်ႈလႄႈ လုၵ်ႈဢွၼ်ႇ ၼႆၶႃႈဢေႃႈ”- ၵူၼ်းပိုၼ်ႉတီႈၼမ်ႉ လၼ်ႈ သိုပ်ႇလၢတ်ႈ ၼႄၼင်ႇၼႆ။

ဢိင်ၼိူဝ် လွင်ႈသိုၵ်း RCSS တင်း SSPP ပဵၼ်ပၢင်တိုၵ်းၵၼ် တၢင်းပွတ်း ဝဵင်းၼမ်ႉလၼ်ႈၼႆႉသေ ယူႇတီႈ ၸဝ်ႈႁၢၼ် ၶမ်းၸၢမ်ႇ ၽူႈၶၢၼ်ပၢၵ်ႇ RCSS လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈပူၼ်ႉမႃးၼၼ်ႉ လႆႈပဵၼ်ပၢင်တိုၵ်းၵၼ် တၢင်းပွတ်း သီႇပေႃႉ ယၢမ်းလဵဝ် မႃးပဵၼ်ၵၼ်တၢင်းထုင်ႉၼမ်ႉလၼ်ႈၼႆႉ။ ပၢင်တိုၵ်း တိုၵ်ႉသိုပ်ႇၵၼ်ယူႇ တၢင်းၼႂ်းဢိူင်ႇဝၢၼ်ႈၸိင်း”- ဝႃႈၼႆ။

တၢင်းၽူႈၶၢၼ်ပၢၵ်ႇ SSPP တႄႉ ယူႇတီႈၽူႈတွႆႇႁွၵ်ႈၵပ်းၸူးၵေႃႈ ဢမ်ႇႁပ်ႉသၢႆ ။

ပူၼ်ႉမႃး မိူဝ်ႈဝၼ်းတီႈ 22/7/2021 ၼၼ်ႉၵေႃႈ သိုၵ်း RCSS တင်း SSPP ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼွင်ဢၢင်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း