Friday, March 29, 2024

ၵူၼ်းပၢႆႈၽေးသိုၵ်း တီႈမိူင်းၵိုင် ပႆႇၸၢင်ႈပွၵ်ႈမီး 1000 ပၢႆ

Must read

ၵူၼ်းမိူင်းဢိူင်ႇမိူင်းၶုၼ် ၸႄႈဝဵင်းမိူင်းၵိုင် ဢၼ်ပၢႆႈၽေးမႃးသွၼ်ႈဝႆႉ ၸွမ်းဝတ်ႉဝႃးၽႃသိူဝ်ႇလႄႈ ႁူင်းႁဵၼ်း ၸိူဝ်းၼႆႉ ႁူဝ်ၵူၼ်းမွၵ်ႈႁဵင်ပၢႆ ပၢႆႈမႃး မီးၶၢဝ်းတၢင်းၽၢၵ်ႇလိူၼ်ယဝ်ႉ ပႆႇႁတ်းပွၵ်ႈႁိူၼ်းယေး ငဝ်းလၢႆး ၼႂ်းပိုၼ်ႉတီႈပႆႇၼိမ်ယဵၼ်။

Photo CJ- ၵူၼ်းပၢႆႈၽေးသိုၵ်း တီႈမိူင်းၵိုင်

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၼႂ်းဢိူင်ႇမိူင်းၶုၼ် ၸႄႈဝဵင်း မိူင်ၵိုင် တီႈ ဝတ်ႉၼွင်လႅင်ႉ ႁူဝ်ၵူၼ်း မွၵ်ႈ 100 လႄႈ တီႈ ဝတ်ႉပၢင်ႇလႅင် ႁူဝ်ၵူၼ်း 67 ၵေႃႉၼၼ်ႉတႄႉ မိူဝ်ႈဝႃး ဝၼ်းတီႈ 18/7/2021 ၶိုၼ်းဢွၼ်ၵၼ်ပွၵ်ႈႁိူၼ်းယေး   ၽွင်ႈယဝ်ႉသေတႃႉ ဢၼ်ပႆႇၸၢင်ႈမိူဝ်းၶိုၼ်းတႄႉ ၵိုတ်းယူႇ 1000 ပၢႆ။   

- Subscription -

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵိုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးတႄႉ  ဢွၼ်ၵၼ်ပွၵ်ႈ မိူဝ်း ၶိုၼ်း တေမီးမွၵ်ႈ 150 ၼႆႉၶႃႈ။ ၸိူဝ်းဢၼ်ယူႇဝႆႉတီႈဝတ်ႉၼွင်လႅင် တင်း ဝတ်ႉပၢင်ႇလႅင်ၶႃႈ။  ဢၼ်တိုၵ်ႉၵိုတ်းထႅင်ႈၵေႃႈ တိုၵ်ႉၵိုတ်းထႅင်ႈတင်းၼမ်ၶႃႈဢေႃႈၼႆႉ ပႆႇႁတ်းပွၵ်ႈၵၼ်ၶႃႈ။ ယွၼ်ႉငဝ်းလၢႆးၼႂ်းပိုၼ်ႉတီႈ ပႆႇမီးလွင်ႈၼိမ်ယဵၼ်။  ” – ဝႃႈၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း ဢၼ်တိုၵ်ႉၵိုတ်းဝႆႉပဵၼ်တီႈဝတ်ႉပၢင်ႇလႅင်မွၵ်ႈ 200 ပၢႆ၊ ဝတ်ႉၼွင်လီ 266 ၵေႃႉ၊ ႁူင်း ႁဵၼ်း 103 ၵေႃႉ၊ ဝတ်ႉႁူၺ်ႈလူင် မွၵ်ႈ 89 ၵေႃႉ၊ ဝတ်ႉဢူးပဵမ်ႇ 102 ၵေႃႉ ဢိၵ်ႇပႃးၵူၼ်းၸိူဝ်းပၢႆႈမႃးသွၼ်ႈဝႆႉ ၸွမ်းႁိူၼ်းပီႈ ၼွင်ႉ ၼႂ်းဝဵင်းမိူင်းၵိုင် ၸိူဝ်းၼႆႉထႅင်ႈ။

“ယၢမ်းလဵဝ် ၶဝ်ႈၼမ်ႉတၢင်းၵိၼ် တႃႇၶၢဝ်းတၢင်းၽၢၵ်ႇလိူၼ်တႄႉ တေလႅပ်ႈၵုမ်ႇယူႇၶႃႈ။ ၽႃႈယၢင်မူဝ်းၵႃႇတႄႉ တိုၵ်ႉလူဝ်ႇ ထႅင်ႈဢိတ်းၼိုင်ႈၶႃႈ။ ဢၼ်လူဝ်ႇႁႅင်းတီႈသုတ်းတႄႉ လွင်ႈပၼ်ပိုၼ်ႉႁူႉ လွၵ်းလၢႆးႁႄႉၵင်ႈတၢင်းပဵၼ်ၶူဝ်ႊဝိတ်ႉ 19 ၼႆႉ ၶႃႈဢေႃႈ တႃႇၵူၼ်းပၢႆႈၽေးႁဝ်း။ သင်ဝႃႈ မီးၸုမ်းလႂ် မေႃယႃၵေႃႉလႂ် ဢၼ်တေမႃးပၼ်လႆႈတၢင်းႁူႉၼႆႉၸိုင် ၶႅၼ်းတေႃး မႃးပၼ်ပိုၼ်ႉႁူႉ လွၵ်းလၢႆးႁႄႉၵင်ႈတၢင်းပဵၼ် တႃႇၵူၼ်းပၢႆႈၽေးႁဝ်းၶႃႈ ၼင်ႇႁိုဝ် ပေႃးတေ လႆႈႁႄႉၵင်ႈၵၼ်ၶႃႈဢေႃႈ။ လွင်ႈပိုၼ်ႉႁူႉၼႆႉ လူဝ်ႇႁႅင်းၼႃႇၶႃႈ၊ ပေႃးပဵၼ်မႃးၵေႃႉၼိုင်ႈၼႆ ၸပ်းၵၼ်မူတ်းၶႃႈဢေႃႈ”-  ၽူႈၸွႆႈထႅမ် ၵူၼ်းပၢႆႈၽေးသိုၵ်း မိူင်းၵိုင် သိုပ်ႇလၢတ်ႈၼႄထႅင်ႈၼင်ႇၼႆ။

ၵူၼ်းပၢႆႈၽေးသိုၵ်း တီႈမိူင်းၵိုင်ၼႆႉ ၵမ်ႈၼမ် ပဵၼ်ၵူၼ်းၼႂ်းဢိူင်ႇမိူင်းၶုၼ် ပၢႆႈမႃး တႄႇဢဝ် ႁူဝ်လိူၼ်ၵျုႊလၢႆႊၼႆႉ မႃး တေႃႇထိုင်ယၢမ်းလဵဝ်ၼႆႉ လႆႈပၢႆႈမႃး မီးၶၢဝ်းတၢင်းၶိုင်ႈလိူၼ်ယဝ်ႉ။ ယွၼ်ႉသိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း