ၼႂ်းတပ်ႉၶွင်ႇသီႇသိုၵ်းမၢၼ်ႈ ဢၼ်ပၵ်းဝႆႉတီႈၵေးသီးၼၼ်ႉ ၵူတ်ႇထတ်း ႁူပ်ႉႁၼ်ၵူၼ်းတိတ်းၸပ်း တၢင်းပဵၼ် ၶူဝ်ႊဝိတ်ႉ 19 သွင်ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 8/7/2021 လုၵ်ႈမေးၵူၼ်းသိုၵ်း သွင်မႄႈလုၵ်ႈ ဢၼ်ယူႇၼႂ်းတပ်ႉသိုၵ်းမၢၼ်ႈ 131 ဢၼ်ပၵ်းဝႆႉတီႈၼႂ်းၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႆယဝ်ႉ။
ၽူႈတူင်ႉၼိုင်ၼႂ်းတူင်ႇဝူင်းၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵူၼ်းၼႂ်းတပ်ႉ 131 ၼၼ်ႉၶႃႈ ဢေႃႈ။ သွင်မႄႈလုၵ်ႈ ၼၢင်းယိင်းတင်း သွင်ၵေႃႉၶႃႈယဝ်ႉ။ ၵေႃႉပဵၼ်လုၵ်ႈယိင်းၼၼ်ႉ ၶိုၼ်ႈဝႆႉ ၸၼ်ႉသိပ်း တီႈႁူင်းႁဵၼ်း ၸၼ်ႉသုင်ၵေးသီးၼႆႉဝႆႉၶႃႈ။ မိူဝ်ႈဝႃး တီႈႁူင်းႁဵၼ်းၼၼ်ႉ လႆႈသိတ်ႇယႃ ၶႃႈမူင်းမႅင်း 2 ပွၵ်ႈၶႃႈဢေႃႈ”- ဝႃႈၼႆ။
ဝၢႆးသေ ထူပ်းထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တီႈဝဵင်းၵေးသီး 2 ၵေႃႉ မႄႈလုၵ်ႈၼႆႉသေ ၸွမ်းၵၢတ်ႇလူင် ၸွမ်း ႁၢၼ်ႉၶၢႆၶူဝ်းၵုၼ်ႇ/ ၶွင်ၵိၼ်ယႅမ်ႉ ၸိူဝ်းၼႆႉ ၵမ်ႈၼမ် ပိၵ်းႁပ်းဝႆႉ။
ၼႂ်းၸႄႈဝဵင်းၵေးသီးၼႆႉ သမ်ႉ မီးၵူၼ်းပၢႆႈၽေးသိုၵ်း 2,400 ၵေႃႉပၢႆ ၊ မႃးပိုင်ႈႁူမ်ႈယူႇဝႆႉတီႈ ၸွမ်းဝတ်ႉ ၸွမ်းဝႃး ၼိုင်ႈတီႈ 2-3 ပၢၵ်ႇၵေႃႉ။ ၸိူဝ်းၼႆႉၵေႃႈ လႆႈဝႆႉ သတိ ပၵ်းတႃ ၵူဝ်တၢင်းပဵၼ် ၽႄႈလၢမ်းၶဝ်ႈၸူး ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈၵူၼ်းပၢႆႈၽေးတႄႉ ႁဝ်းၶႃႈ လႆႈသိတ်းယႃႈၶႃႈမူင်းမႅင်း ပၼ်ယူႇၶႃႈ။ ယဝ်ႉၵေႃႈ ၼႂ်းဝၼ်းသွင်ဝၼ်းၼႆႉ ၽႃႈတူမ်းသူပ်းၵေႃႈ တေႁွတ်ႈမႃး ထိုင်ယဝ်ႉၶႃႈ တႃႇၸွႆႈထႅမ်ၵူၼ်းပၢႆႈၽေးႁဝ်းၶႃႈ ပေႃးတေလႆႈၸႂ်ႉၵၼ်။ ၵူၺ်းၵႃႈ ၵူၼ်းတိတ်းၸပ်း ၸိူဝ်ႉမႅင်း ၶူဝ်ႊဝိတ်ႉ 19 မိူဝ်ႈဝႃးၼၼ်ႉလႄႈ တီႈၵူၼ်းပၢႆႈၽေးႁဝ်းၶႃႈ ယူႇသဝ်းဝႆႉၸိူဝ်းၼႆႉတႄႉ ယၢၼ်ၵႆၵၼ်ဝႆႉယူႇၶႃႈ”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵေးသီးၼႆႉ တင်းမူတ်းမီး 2,408 ၵေႃႉ။ ၽူႈၸၢႆး 1,006 ၵေႃႉ။ ၼၢင်းယိင်း 1,402 ၵေႃႉ။
ၵူၼ်းၸပ်းၶူဝ်ႊဝိတ်ႉ ၼႂ်းမိူင်းတႆး ဝၼ်းမိူဝ်ႈၼႆႉ မီး 2532 ၵေႃႉ၊ ဢၼ်ၽႄႈၸပ်းၼမ်လိူဝ်ပိူၼ်ႈတေႉ ပဵၼ်တၢင်းမိူင်းတႆးပွတ်းႁွင်ႇ၊ မိူၼ်ၼင်ႇ လႃႈသဵဝ်ႇ ၵၢတ်ႇၵဝ်ႇ/လၢဝ်ႇၵၢႆး တၢင်းမိူင်းတႆးပွတ်းၸၢၼ်းသမ်ႉ ပဵၼ်ၼႂ်းၸႄႈဝဵင်းဢုမ်ႇပဝ်း/ဢွင်ႇပၢၼ်း။
