ထုင်ႉဢၼ် သိုၵ်း RCSS တင်း ၸုမ်းဢူၺ်းလီသိုၵ်းပွတ်းႁွင်ႇ တိုၵ်းတေႃးၵၼ် မိူဝ်ႈပူၼ်ႉမႃး 2-3 လိူၼ်ၼၼ်ႉ ယၢမ်းလဵဝ် သိုၵ်းမၢၼ်ႈ ၶဝ်ႈမူၵ်းယူႇၼႂ်းဝၢၼ်ႈၼႂ်းသူၼ်လႄႈ ၵူၼ်းဝၢၼ်ႈ 300 ပၢႆ ၸိူဝ်းပၢႆႈၽေးသိုၵ်းၼၼ်ႉ ပႆႇၸၢင်ႈပွၵ်ႈဝၢၼ်ႈ ႁဵတ်းၵၢၼ်ၽုၵ်ႇသွမ်ႈၶိုၼ်း။

တႄႇဢဝ်လိူၼ် ဢေႊပရိူဝ်ႊမႃးတေႃႇထိုင်ယၢမ်းလဵဝ် ငဝ်းလၢႆးသိုၵ်းသိူဝ် ဝူင်ႈၵၢင်ၸုမ်းသိုၵ်းပွတ်းႁွင်ႇ တင်း ၸုမ်းသိုၵ်း RCSS ၵေႃႈပႆႇလီၵၼ်၊ သိုၵ်းမၢၼ်ႈ ဢၼ်ႁွၼ်ႈထဝ်ႈၵႂႃႇမႃးတူင်ႉၼိုင်ယူႇၼၼ်ႉၵေႃႈ မူၵ်းယူႇၼႂ်းဝၢၼ်ႈ ႁဵတ်းႁႂ်ႈၵူၼ်းဝၢၼ်ႈ ၵူၼ်းသူၼ် ပႆႇၸၢင်ႈပွၵ်ၶိုၼ်းႁိူၼ်း၊ ယၢမ်းလဵဝ် ပဵၼ်ၶၢဝ်း ၽုၵ်ႇ သွမ်ႈ သေတႃႉ ဢမ်ႇၸၢင်ႈပွၵ်ႈဝၢၼ်ႈ ၽုၵ်ႇသွမ်ႈၶိုၼ်း၊ သူၼ်ၼႃး မႃႉလႃး ဝူဝ်းၵႂၢႆးၵေႃႈ လႆႈပွႆႇဝႆႉ ၸိူင်ႉ ၼၼ်။

ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈသီႇပေႃႉႁဝ်းၶႃႈၼႆႉ ၵိုတ်းဝႆႉ ပီႈၼွင်ႉဝၢၼ်ႈၶၢႆးမွၼ် ႁူဝ်ၵူၼ်း 265 ၵေႃႉ။ ယဝ်ႉၵေႃႈ ပီႈၼွင်ႉၶျွင်းသုင်ႇ ႁူဝ်ၵူၼ်း 30 ပၢႆ တင်းမူတ်း တေမီးမွၵ်ႈ 300 ၼႆႉ ပႆႇၸၢင်ႈပွၵ်ႈႁိူၼ်းယေးၵၼ်”- ဝႃႈၼႆ။

ယၢမ်းလဵဝ် တၢင်းပွတ်းၸႄႈဝဵင်းၵျွၵ်ႉမႄးၵေႃႈ သိုၵ်း TNLA, SSPP တင်း RCSS ပဵၼ်ပၢင်တိုၵ်း ၵၼ်ဝႆႉယူႇ ႁၢဝ်ႈႁႅင်းလႄႈ ၵူၼ်းဝၢၼ်ႈ ၵူၼ်းမိူင်း ၼႂ်းဢိူင်ႇတေႃႉသၢင်ႇ၊ ၼႂ်းၵိင်ႇၸႄႈဝဵင်းမိူင်းငေႃႉ ၸိူဝ်းၼႆႉၵေႃႈ ၺႃးၽေးသိုၵ်းသိူဝ် လႄႈ လႆႈဢွၼ်ၵၼ်ပၢႆႈဝႆႉ။

ပွတ်းလွႆႁူၼ်း ၸႄႈဝဵင်းၵေးသီး ၸိုင်ႈတႆးပွတ်းၸၢၼ်းၵေႃႈ RCSS တင်း SSPP ပဵၼ်ပၢင်တိုၵ်း ၵၼ်မႃးႁၢဝ်ႈႁႅင်း ၶၢဝ်းတၢင်းလိူၼ်ပၢႆ ၊ ၵူၼ်းမိူင်းၼပ်ႉႁဵင် လႆႈပၢႆႈယၢၼ်ႁိူၼ်းယေးတီႈယူႇ လုတ်ႈႁၢမ်းၵၢၼ်ငၢၼ်း ဢမ်ႇလႆႈၽုၵ်ႇသွမ်ႈၵၼ် ၼႆယဝ်ႉ။