ၽူႈၸၢႆး ၵူၼ်းဝၢၼ်ႈပၢင်လူင် ၸႄႈဝဵင်းၼမ်ႉတူႈ ယဵပ်ႇၺႃးမၢၵ်ႇ တႅၵ်ႇၽူင်ႉသႂ်ႇ ၽွင်းၵႂႃႇသူၼ်၊ လႆႈမၢတ်ႇၸဵပ်း ႁၢဝ်ႈႁႅင်းသေ သူင်ႇယူတ်းယႃတူဝ်တီႈ သီႇပေႃႉ ။
မိူဝ်ႈဝၼ်းတီႈ 11/6/2021 ယၢမ်းဝၢႆးဝၼ်း မွၵ်ႈ 2 မူင်းပၢႆ ၽူႈၸၢႆး ၵေႃႉၼိုင်ႈ ဢႃ ယု မွၵ်ႈ 30 ၵူၼ်းဝၢၼ်ႈပၢင်လူင် ဢိူင်ႇပၢင်လူင် ၵႂႃႇသူၼ်သေ ယဵပ်ႇၺႃးမၢၵ်ႇ ႁၢင်ႈၵၢင်ဝႆႉ တႅၵ်ႇၽူင်ႉသႂ်ႇမၼ်းၸၢႆး လႆႈမၢတ်ႇၸဵပ်းႁၢဝ်ႈႁႅင်း ယၢမ်းလဵဝ် လႆႈ သူင်ႇယူတ်း ယႃတူဝ်ဝႆႉတီႈ ႁူင်းယႃသီႇပေႃႉ ။
လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ် ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၵူၼ်း ဝၢၼ်ႈပၢင်လူင် ၵႂႃႇႁဵတ်းသူၼ်သေ ယဵပ်ႇၺႃးမၢၵ်ႇတႅၵ်ႇ ယၢမ်းလဵဝ် ဢဝ်သူင်ႇယူတ်းယႃတူဝ်ဝႆႉတီႈသီႇပေႃႉယဝ်ႉ။ ထႅင်ႈ လွင်ႈၼိုင်ႈၶႂ်ႈပၼ်ၾၢင်ႉထိုင် ၵူၼ်းမိူင်းႁဝ်းၶႃႈဝႃႈ ဢွင်ႈတီႈၶဝ်ၵႆႉပဵၼ်ပၢင်တိုၵ်းၵၼ် တီႈၶဝ်ၵႆႉယူႇၸိူဝ်းၼၼ်ႉ မၼ်းဢမ်ႇ လီၵႂႃႇသေဢိတ်းယဝ်ႉ။ ၵူဝ်ယဵပ်ႇၺႃးမၢၵ်ႇၵၼ်”- ဝႃႈၼႆ။
ၵူၼ်းမိူင်းပိုၼ်ႉတီႈ တၢင်းၼမ်ႉတူႈၼႆႉ ၵႆႉမီးလွင်ႈယဵပ်ႇၺႃးမၢၵ်ႇ ၽွင်ႈၵႂႃႇႁဵတ်းႁႆႈႁဵတ်းသူၼ် မၢၵ်ႇဢၼ်ႁၢင်ႈ ၵၢင်ဝႆႉ ၼၼ်ႉၵေႃႈ ဢမ်ႇမီးသိုၵ်းၸုမ်းလႂ် ၵႂႃႇၽဵဝ်ႈပႅတ်ႈ။ ပဵၼ်မၢၵ်ႇၸုမ်းလႂ် ႁၢင်ႈၵၢင်ဝႆႉၵေႃႈဢမ်ႇႁူႉ ဝႃႈ ၼႆ။
“ပၢင်တိုၵ်းၵမ်းလႂ် ပွၵ်ႈလႂ် ဢၼ်ပဵၼ်မႃးၸိူဝ်းၼၼ်ႉ ဢမ်ႇဝႃႈသိုၵ်းၸုမ်းလႂ် ၶဝ်ယိုဝ်းၵၼ်ယူႇ ၶဝ်ဢမ်ႇတွၼ်ႉၽဵဝ်ႈမၢၵ်ႇ ဢၼ်ၶဝ်ၾင်ဝႆႉ ။ ဢွင်ႈတီႈဢၼ်ၶဝ် ၾင်ဝႆႉ ၸိူဝ်းၼၼ်ႉၵေႃႈ လိုမ်းယဝ်ႉယူဝ်ႉ ၵမ်းလိုၼ်းမႃး ၵူၼ်းမိူင်း ၵူၺ်း ယဵပ်ႇၺႃး။ ၸူဝ်ႈၶဝ်ယိုဝ်းၵၼ်ၼႆႉ ၵူၼ်းၼႂ်းဢိူင်ႇႁဝ်းၶႃႈၼႆႉ ယဵပ်ႇၺႃးမၢၵ်ႇ မီးလၢႆၵေႃႉယဝ်ႉ”- ၵူၼ်းမိူင်းပိုၼ်ႉတီႈ ပွတ်းပၢင်လူင် ၼမ်ႉတူႈ ၵေႃႉၼိုင်ႈ လၢတ်ႈတီႈၽူႈ တွႆႇႁွၵ်ႈၼင်ႇၼႆ။
မိူဝ်ႈဝၼ်းတီႈ 20/5/2021 ယၢမ်းဝၢႆးဝၼ်း မွၵ်ႈ 2 မူင်းပၢႆ ၸၢႆးလၢဝ်သႂ် ဢႃယု 25 ပီ ၽႃႇၺႃးမၢၵ်ႇၾင်လိၼ် ၼိူဝ်သဵၼ်ႈ တၢင်း ဢၼ်မီးတၢင်းၾၢႆႇတူၵ်းဝၢၼ်ႈပၢင်ႁၢတ်ႇ ဢိူင်ႇပၢင်လူင် ၸႄႈဝဵင်းၼမ်ႉတူႈ။ မၢၵ်ႇတႅၵ်ႇတိူဝ်ႉသႂ်ႇၸွမ်းၶႃ မၼ်းၸၢႆး။
မိူဝ်ႈဝၼ်းတီႈ 16/5/2021 ယၢမ်းၵၢင်ဝၼ်း မွၵ်ႈ 12 မူင်းၼၼ်ႉၵေႃႈ ၸၢႆးသၢၼ်း ဢႃယု 35 ပီ လႄႈမေးၼၢင်းမၼ်း ၵူၼ်း ဝၢၼ်ႈပၢင်လူင် ၵႂႃႇႁဵတ်းသူၼ် တၢင်းဝၢၼ်ႈၼမ်ႉမၢဝ်း ဢၼ်မီးၾၢႆႇတူၵ်းဝၢၼ်ႈပၢင်လူင်၊ ၾၢႆႇႁွင်ႇဝၢၼ်ႈယေႇဢူဝ်း ၼႂ်း ၸႄႈဝဵင်းၼမ်ႉတူႈ။ ၵႂႃႇယဵပ်ႇၺႃးမၢၵ်ႇ တႅၵ်ႇတိူဝ်ႉသႂ်ႇ ၸၢႆးသၢၼ်းလူႉတၢႆထင်တီႈ ၊ မေးၼၢင်းမၼ်း မၢတ်ႇၸဵပ်း။
မိူဝ်ႈဝၼ်းတီႈ 9/5/2021 ယၢမ်းဝၢႆးႁူဝ်ၶမ်ႈ မွၵ်ႈ 5 မူင်းၼၼ်ႉၵေႃႈ ၸၢႆးဢၢႆႈတႄႉ ဢႃယု 21 ပီ ၵႂႃႇထႆသူၼ် ဢၼ်မီးၾၢႆႇ တူၵ်းဝၢၼ်ႈသၢမ်ၶႃ ယၢၼ်ဝၢၼ်ႈမွၵ်ႈၼိုင်ႈလၵ်းပၢႆ ၼႂ်းဢိူင်ႇမိူင်းမူႉ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ မၼ်းၸၢႆး ယဵပ်ႇၺႃးမၢၵ်ႇၾင်လိၼ် လုၵ်ႈၼိုင်ႈတႅၵ်ႇတိူဝ်ႉသႂ်ႇသေ လႆႈလူႉတၢႆ ထင်တီႈၼင်ႇၵဝ်ႇ။
ပူၼ်ႉမႃးပႆႇႁိုင်ၼႆႉ ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆး ၼင်ႇၵၼ် သိုၵ်း RCSS တင်း သိုၵ်း TNLA, SSPP ပဵၼ်ပၢင်တိုၵ်းတေႃႇၵၼ်မႃး ႁၢဝ်ႈႁႅင်း ၼႂ်းၸႄႈဝဵင်းၼမ်ႉတူႈ ၵူၼ်းမိူင်းၼပ်ႉႁူဝ်ႁဵင်လႆႈပၢၵ်ႈ။ ႁိူၼ်းယေး ၵူၼ်းဝၢၼ်ႈ ဢမ်ႇယွမ်း 100 ပၢႆ လႆႈထုၵ်ႇၾႆးၽဝ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ