သိုၵ်းမၢၼ်ႈ တင်း ၸုမ်းဢူၺ်းလီ ပဵၼ်ပၢင်တိုၵ်းၵၼ် တီႈၵူတ်ႉၶၢႆ ၾၢႆႇသိုၵ်းမၢၼ်ႈ မီးလွင်ႈလူႉတၢႆၼမ်

ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်း တီႈၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ႁၢဝ်ႈႁႅင်း ၾၢႆႇသိုၵ်း မၢၼ်ႈ မီးလွင်ႈလူႉတၢႆ 11 ၵေႃႉ ႁၢႆတူဝ်ဝႆႉ 15 ၵေႃႉ ဝႃႈၼႆ။

မိူဝ်ႈၼႆႉ ဝၼ်းတီႈ 31/5/2021 ယၢမ်းၵၢင်ၼႂ်ၸဝ်ႉ 1 မူင်း ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပွတ်းႁွင်ႇ သိုၵ်းတဢၢင်း TNLA, သိုၵ်းၵူဝ်းၵၢင်ႉ MNDAA လႄႈ သိုၵ်းရၶႅင်ႇ AA ၸိူဝ်းၼႆႉ လႆႈပဵၼ်ပၢင်တိုၵ်းၵၼ် တီႈတပ်ႉပၢင်သဝ်းသိုၵ်းမၢၼ်ႈ ဢၼ်မီးဝႆႉတီႈၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်း ၼမ်ႉၽၵ်းၵႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ပၢင်တိုၵ်းၵၼ် ၸႂ်ႉမၢၵ်ႇလူင်သေ ယိုဝ်းသႂ်ႇၵၼ်ၶႃႈဢေႃႈ။ ႁဝ်းၶႃႈတႄႉ လႆႈပၢႆႈမူၵ်းယူႇဝႆႉၼႂ်းလုၵ်းပဵမ်ႇ/ ထင်ဝႆႉၶႃႈဢေႃႈ။ မၢၵ်ႇလူင် တူၵ်းမႃးၼႂ်းဝၢၼ်ႈႁဝ်း ၶႃႈ 2 လုၵ်ႈ။ တႃႇလုၵ်ႈၼိုင်ႈ တႅၵ်ႇသႂ်ႇႁိူၼ်းယေး လူႉၵွႆၸွမ်း။ ယဝ်ႉၵေႃႈ တိူဝ်ႉၺႃးၵူၼ်းမိူင်း မၢတ်ႇၸဵပ်းၸွမ်းၵေႃႉၼိုင်ႈ။ ၵူၼ်းမၢတ်ႇၸဵပ်းၼၼ်ႉတႄႉ လႆႈၵႂႃႇၼႄတီႈႁွင်ႈယႃ (ဆေးခန်း) သေ ယၢမ်းလဵဝ် လႆႈပွၵ်ႈမႃးႁိူၼ်းယဝ်ႉ”- ဝႃႈၼႆ။

ပၢင်တိုၵ်းမိူဝ်ႈၼႆႉ တၢင်းၾၢႆႇ ၶွင်ႇသီႇသိုၵ်းမၢၼ်ႈ လူႉတၢႆ 11 ၵေႃႉ ပႃးၽူႈမီးၸၼ်ႉ (ဒုတပ်ရင်းမှူး) ၵေႃႉၼိုင်ႈလႄႈ ယၢမ်းလဵဝ် ႁၢႆတူဝ်ဝႆႉ 15 ၵေႃႉ။  ယူႇတီႈၸုမ်းဢူၺ်းလီ ပွတ်းႁွင်ႇ တီႉလႆႈ ၶိူင်ႈၵွင်ႈၵၢင်ႇ သိုၵ်း မၢၼ်ႈ တင်းၼမ် ဝႃႈၼႆ။

ၸဝ်ႈႁၢၼ် တႃႉဢၢႆႈၵျေႃႇ ၽူႈၶၢၼ်ပၢၵ်ႇ TNLA လၢတ်ႈတီႈၽူႈတွႆႇႁွၵ်ႈဝႃႈ – “ပိူင်ပဵၼ် ပၢင်တိုၵ်းၵၼ်ၼႆႉ ပႆႇလႆႈႁပ်ႉႁူႉ ၶေႃႈ မုလ်းၼႂ်းပိုၼ်ႉတီႈ ႁၢႆးငၢၼ်းမႃး ႁူဝ်ယွႆႈမၼ်း။ ႁဝ်းၶႃႈ လႆႈငိၼ်းၼႂ်းၶၢဝ်ႇၸိူင်ႉၼႆၵူၺ်းၶႃႈဢေႃႈ”- ဝႃႈၼႆ။

မိူဝ်ႈဝႃး ဝၼ်းတီႈ 30 ၼၼ်ႉၵေႃႈ ၶွင်ႇသီႇသိုၵ်းမၢၼ်ႈ တင်း ၸုမ်းဢူၺ်းလီ ပွတ်းႁွင်ႇ လႆႈပဵၼ်ပၢင်တိုၵ်းၵၼ် ၼႂ်းၸႄႈဝဵင်း ၵူတ်ႉၶၢႆ။  

မိူဝ်ႈဝၼ်းတီႈ 18 လိူၼ်မေႊၼၼ်ႉၵေႃႈ ၶွင်ႇသီႇသိုၵ်းမၢၼ်ႈ တင်း သိုၵ်းၶၢင် KIA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ်ႉ ပႃၶီး ၸႄႈဝဵင်းၵူတ်ႉၶၢႆသေ ၵႃးတၢင်းၼမ်ႉမၼ်း ၶွင်သိုၵ်းမၢၼ်ႈ ထုၵ်ႇသိုၵ်းၶၢင် ဢဝ်မၢၵ်ႇလူင် ယိုဝ်းသႂ်ႇ ၾႆးမႆႈလမ်းၼိုင်ႈ ၼႆယဝ်ႉ။