ၵူၼ်းၼမ်ႉတူႈ ဢၼ်ပၢႆႈမႃးသွၼ်ႈဝႆႉတီႈသီႇပေႃႉ ႁူဝ်ၵူၼ်း 400 ပၢႆ တီႈဝတ်ႉယေႇႁေႃႇၼၼ်ႉ ဝၢႆးလင်ၶၢႆႉ ၵႂႃႇယူႇတီႈ ႁူင်းသဝ်းၵူၼ်းပၢႆႈၽေး ဢၼ်သၢင်ႈဝႆႉတီႈ ဢိူင်ႇတူင်ႈၸၢင်ႉၼၼ်ႉယဝ်ႉ ဢွၼ်ၵၼ်ထူပ်းတၢင်းယၢပ်ႇၽိုတ်ႇၵိၼ်းၸႂ် လွင်ႈၼမ်ႉၵိၼ်ၼမ်ႉၸႂ်ႉလႄႈၾႆးၾႃႉ ။
မိူဝ်ႈဝၼ်းတီႈ 18/5/2021 ၵူၼ်းမၢၼ်ႈလီႈ ၼမ်ႉတူႈ ဢၼ်ပၢႆႈမႃးသွၼ်ႈဝႆႉတီႈ ဝတ်ႉယေႇႁေႃႇ ၸႄႈဝဵင်းသီႇပေႃႉၼၼ်ႉ လႆႈ ၶၢႆႉၵႂႃႇယူႇတီႈႁူင်းသဝ်း ၵူၼ်းပၢႆႈၽေး တီႈဢိူင်ႇတူင်ႈၸၢင်ႉတႃႇ ႁူဝ်ၵူၼ်းမွၵ်ႈ 420 ၵေႃႉ ။ ယၢမ်းလဵဝ်ၸိူဝ်းၶဝ်ဢမ်ႇမီးၼမ်ႉ – ၾႆးၾႃႉ ၸႂ်ႉလႄႈထူပ်းတၢင်းယၢပ်ႇၽိုတ်ႇၵိၼ်းၸႂ် လိူဝ်ႁႅင်း ၼႆယဝ်ႉ။
ၽူႈၸွႆႇထႅမ် ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ဢွင်ႈတီႈၼၼ်ႉ မၼ်းပဵၼ်ဢွင်ႈတီႈ ႁဵတ်းဝႆႉ တႃႇၵူၼ်းပၢႆႈၽေးမႃးလိုဝ်ႈသဝ်းဝႃႈၼႆသေတႃႉ ႁွင်ႈသဝ်းမၼ်းတႄႉ သၢင်ႈယဝ်ႉယဝ်ႉ ၵူၺ်းၵႃႈ ၾႆးၾႃႉ တင်း ၼမ်ႉၸႂ်ႉ ၸိူဝ်းၼႆႉ ပႆႇမီး ၵွပ်ႈၼႆလႄႈ ပဵၼ်ဢၼ်ယၢပ်ႇၽိုတ်ႇ တႃႇၵူၼ်းပၢႆႈၽေးသိုၵ်းႁဝ်းၶႃႈ တႄႉတႄႉ ၶႃႈဢေႃႈ”- ဝႃႈၼႆ။
ၵွပ်ႈၼႆလႄႈ ယူႇတီႈၵူၼ်းပၢႆႈၽေးသိုၵ်းတီႈၼၼ်ႈ လႆႈၵိၼ်ၼမ်ႉဢၼ်ၸဝ်ႈတႃႇၼၶဝ် မႃးၸွႆႈထႅမ်ဝႆႉပၼ်ၵူၺ်း တႃႇ ၼမ်ႉၸႂ်ႉ ၼမ်ႉဢၢပ်ႇ ၸိူဝ်းၼႆႉ ပဵၼ်ဢၼ်ၵိၼ်းၸႂ် လိူဝ်ႁႅင်း ၼႆယဝ်ႉ။
“ၼမ်ႉၵိၼ်တႄႉ ၵိၼ်ဢၼ်တီႈၸဝ်ႈတႃႇၼၶဝ် မႃးလူႇၼၼ်ႉ ၵူၺ်းၵႃႈယၢပ်ႇၽိုတ်ႇ ၼမ်ႉၸႂ်ႉ ၼမ်ႉဢၢပ်ႇၵၼ်ၶႃႈဢေႃႈ ၼႆႉ။ လႆႈငိၼ်းဝႃႈ လႆႈဢွၼ်ၵၼ်ၵႂႃႇတၵ်းတီႈၵႆမႃးၸႂ်ႉၵၼ် ယၢပ်ႇၽိုတ်ႇလိူဝ်ႁႅင်းၶႃႈဢေႃႈ”- ၽူႈၸွႆႈထႅမ်ၵူၼ်းပၢႆႈၽေး သိုပ်ႇလၢတ်ႈၼႄ ၼင်ႇၼႆ။
ထႅင်ႈၾၢႆႇၼိုင်ႈၵေႃႈ တီႈဝတ်ႉယေႇႁေႃႇၼၼ်ႉသမ်ႉ ယွၼ်ႉဝႃႈ ပိုတ်ႇဝႆႉႁူင်းႁဵၼ်းပၵ (ႁူင်းႁဵၼ်းၵျွင်းမုၼ်ၸဝ်ႈ) လႄႈ ယွၼ်ႉလူဝ်ႇပိုတ်ႇႁူင်းႁဵၼ်းၼႆ သေ ၵူၼ်းပၢႆႈၽေးသိုၵ်း 420 ၵေႃႉၼၼ်ႉ လႆႈဢွၼ်ၵၼ်ၶၢႆႉမႃးယူႇတီႈႁွင်ႈသဝ်း ၼႂ်းဢိူင်ႇတူင်ႈၸၢင်ႉ ယၢၼ်ၵႆဝဵင်းမွၵ်ႈ 7 လၵ်း ၼႂ်းၵႄႈသီႇပေႃႉ – ၼမ်ႉတူႈ ၼႆယဝ်ႉ။
ၵူၼ်းပၢႆႈၽေးသိုၵ်း 420 ၼႆႉ ပဵၼ်ၵူၼ်းမၢၼ်ႈလီႈ ၸႄႈဝဵင်းၼမ်ႉတူႈ လႆႈဢွၼ်ၵၼ်ပၢႆႈမႃးမီးတၢင်းၶၢဝ်း 2 လိူၼ်ပၢႆယဝ်ႉ ပႆႇၸၢင်ႈပွၵ်ႈ ယွၼ်ႉငဝ်းလၢႆးၵၢၼ်သိုၵ်းၼႂ်းပိုၼ်ႉတီႈ ပႆႇၼိမ် ယွၼ်ႉသိုၵ်း RCSS တင်း TNLA, SSPP ပဵၼ်ပၢင်တိုၵ်းၵၼ် မႃးႁၢဝ်ႈႁႅင်း မိူဝ်ႈႁၢင်လိူၼ်မၢတ်ႊၶျ်ပူၼ်ႉမႃးၼၼ်ႉ တေႃႇထိုင်ယၢမ်းလဵဝ် ပႆႇယဵၼ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ