ပၢင်တိုၵ်းတၢင်းၼမ်ႉတူႈ ပႆႇယဵၼ် ၵူၼ်းပၢႆႈၽေးသိုၵ်း ပႆႇၸၢင်ႈပွၵ်ႈႁိူၼ်းယေး

ဢိင်ၼိူဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼင်ႇၵၼ် ၼႂ်းမိူင်းတႆး ပိုတ်းယိုဝ်းၵၼ် ႁၢဝ်ႈႁႅင်း တၢင်းပွတ်းၸႄႈ ဝဵင်းၼမ်ႉတူႈ ၼႆႉ မီးၶၢဝ်းတၢင်း 2 လိူၼ်ပၢႆ  ပႆႇယဵၼ် ၵူၼ်းပၢႆႈၽေးသိုၵ်း ထူပ်းတၢင်းယၢပ်ႇၽိုတ်ႇ ပႆႇၸၢင်ႈပွၵ်ႈ ႁိူၼ်းယေးၵၼ်။

မိူဝ်ႈဝႃး ဝၼ်းတီႈ 17/5/2021 ယၢမ်းၵၢင်ၼႂ် သိုၵ်း RCSS တင်း TNLA, SSPP တိုၵ်ႉသိုပ်ႇပဵၼ်ပၢင်တိုၵ်းၵၼ် တၢင်းၸႄႈ ဝဵင်းၼမ်ႉတူႈထႅင်ႈ ႁၢဝ်ႈႁႅင်း ပႆႇၵိုတ်းပႆႇယဵၼ်သေ ၵူၼ်းမိူင်းပိုၼ်ႉတီႈ ၼပ်ႉႁူဝ်ႁဵင် လႆႈပၢႆႈၽေးသိုၵ်း မီးၶၢဝ်းတၢင်း 2 လိူၼ်ပၢႆယဝ်ႉ ပႆႇၸၢင်ႈပွၵ်ႈႁိူၼ်းယေး ႁဵတ်းႁႂ်ႈၵူၼ်းမိူင်းတုၵ်ႉၶယၢပ်ႇၽိုတ်ႇတႃႇ ၵၢၼ်ႁႃၵိၼ်လဵင်ႉတွင်ႉ ၼႆယဝ်ႉ။

ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈဝႆႉတီႈမၢၼ်ႈၸၢမ် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ပဵၼ်ၶၢဝ်းလူဝ်ႇလူင်း ၵၢၼ်ၶႃႈယဝ်ႉ လူဝ်ႇၽုၵ်ႇၶဝ်ႈၵၢပ်ႇ ထူဝ်ႇၼၢဝ်ႈ ၽုၵ်ႇၶဝ်ႈ ။ ၵူၼ်းပၢႆႈၽေးသိုၵ်းသမ်ႉပႆႇႁတ်းပွၵ်ႈႁိူၼ်းၶႃႈ ၶႂ်ႈပွၵ်ႈမိူဝ်း ၼႃႇယဝ်ႉၶႃႈၼႆႉ။ သိုၵ်းသွင်ၸုမ်းၼႆႉသမ်ႉ ပႆႇယဵၼ်”- ဝႃႈၼႆ။

ယွၼ်ႉဝႃႈ ပဵၼ်ၶၢဝ်းလူဝ်ႇၽုၵ်ႇ လူဝ်ႇသွမ်ႈပဵၼ်ၶၢဝ်းလူင်းၵၢၼ် ယဝ်ႉလႄႈ ၵူၼ်းပၢႆႈၽေးမႆႈၸႂ် တႃႇၵၢၼ်ႁႃၵိၼ်လဵင်ႉတွင်ႉ တႃႇပီၼႃႈပီလိုၼ်းသေ မၢင်ၵေႃႉ လၵ်ႉပွၵ်ႈမိူဝ်း ႁဵတ်းၵၢၼ်ၶိုၼ်းတီႈဝၢၼ်ႈၵေႃႈမီး ဝႃႈၼႆ။

“ပေႃးၵေႃႉသွင်ၵေႃႉတႄႉ ၽႂ်ၵေႃႈ ဢမ်ႇႁတ်းပွၵ်ႈမိူဝ်း ၵူဝ်ၵႂႃႇယဵပ်ႇၺႃးမၢၵ်ႇၵၼ်။ ပေႃးမိူဝ်းၵေႃႈ လူဝ်ႇမိူဝ်းၸွမ်းၵၼ် ပဵၼ် မူႇပဵၼ်ၽုင်ၵူၺ်းၶႃႈ။ မၢင်ၵေႃႉ ၸိူဝ်းႁတ်းၸုၼ်ႉသၢႆၸႂ်သေ လၵ်ႉပွၵ်ႈမိူဝ်းႁဵတ်းသူၼ်ၵၼ်ၵေႃႈမီးယူႇ။ မိူၼ်ၵႂႃႇလၵ်ႉႁဵတ်း ၸူၼ်ႁဵတ်းၼၼ်ႉၶႃႈယဝ်ႉ”- ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းမိူင်းမႃး ဝၼ်းတီႈ 1/2/2021 ၼၼ်ႉသေ သိုၵ်းၸၢဝ်းၶိူဝ်းၼႂ်းမိူင်းတႆး ၼင်ႇၵၼ် ၵေႃႈ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း တၢင်းမိူင်းတႆး ပွတ်းႁွင်ႇ ၼႂ်းၸႄႈဝဵင်းသီႇပေႃႉ၊ ၵျွၵ်ႉမႄးလႄႈ ၼမ်ႉတူႈ ၸိူဝ်းၼႆႉ ၵူၼ်းမိူင်းၼပ်ႉႁူဝ်ႁဵင် လႆႈပၢႆႈၽေးသိုၵ်း ထိုင်ယၢမ်းလဵဝ် ပႆႇၸၢင်ႈပွၵ်ႈႁိူၼ်းယေး ၼႆယဝ်ႉ။