ၵူၼ်းမိူင်းၼမ်ႉတူႈ ႁူဝ်ၵူၼ်း 70 ပၢႆ ဢၼ်ပၢႆႈႁွတ်ႈထိုင်ဝႆႉ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ လူဝ်ႇတၢင်းၸွႆႈထႅမ် ၶူဝ်းၼုင်ႈတၢင်းဝႆ ၽႃႈၵၢင်/ သုတ်းမုင်းၸိူဝ်းၼႆႉ ဝႃႈၼႆ။
ၵူၼ်းဝၢၼ်ႈပၢင်လူင် ပၢင်ႁၢတ်ႇ လႄႈ ၼႃးၶူဝ်လႅင် ၼႂ်းၸႄႈဝဵင်းၼမ်ႉတူႈ ႁူဝ်ၵူၼ်း 70 ပၢႆ ပၢႆႈႁွတ်ႈထိုင်ဝႆႉတီႈ ဝတ်ႉႁူမ်ႈ ယဵၼ် ပွၵ်ႉ 8 ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ယွၼ်ႉပၢင်တိုၵ်းၼႂ်းၵႄႈၸုမ်းၸၢဝ်းၶိူဝ်းၼင်ႇၵၼ်ပိုတ်းယိုဝ်းၵၼ်။ ယၢမ်းလဵဝ်ၵူၼ်းပၢႆႈၽေး လူဝ်ႇတၢင်းၸွႆႈထႅမ် လွင်ႈၼုင်ႈဝႆ ။
ၵူၼ်းပၢႆႈၽေးသိုၵ်း ႁွတ်ႈၽႅဝ်ဝႆႉတီႈလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်တႄႉ လူဝ်ႇတင်းၸွႆႈထႅမ် ၽႃႈၵၢင်/ သုတ်း။ ယဝ်ႉၵေႃႈ သၢင်ႇၵၢၼ်း ၸဝ်ႈသၢင်ႇ ၸဝ်ႈၸၢင်းၶဝ်ၽွင်ႈၶႃႈ။ ယွၼ်ႉဢမ်ႇတၼ်းလႆႈမႃးၶူဝ်းၼုင်ႈတင်းဝႆ ။ လွင်ႈၵိၼ်ယႅမ်ႉတႄႉ မီးသင်ၵေႃႈ ၵိၼ်ၼၼ်ႉၶႃႈ ၽူႈမႃးၵမ်ႉၸွႆႈတႄႉ မီးဢေႇၶႃႈဢေႃႈ မိူဝ်ႈပူၼ်ႉ မႃးလၢႆဝၼ်းၼႆႉ ၸဝ်ႈသြႃႇႁဝ်းၶႃႈ တၢင်းၵျွင်းတေႃးရ၊ ၶိူဝ်းၼိမ်းၵေႃႈ မႃးၸွႆႈယူႇၶႃႈ”- ဝႃႈၼႆ။
ၵူၼ်းပၢႆႈၽေးသိုၵ်းဢၼ်ပၢႆႈႁွတ်ႈၽႅဝ်ဝႆႉတီႈလႃႈသဵဝ်ႈ ႁူဝ်ၵူၼ်း 70 ပၢႆၼၼ်ႉ တႃႇ 30 ပၢႆ ပဵၼ်ၸဝ်ႈၸၢင်း ၸဝ်ႈသၢင်ႇ တႃႇ ထႅင်ႈ 30 ပၢႆသမ်ႉ ပဵၼ်ၵူၼ်းႁိူၼ်း။ ၼွၵ်ႈလိူဝ်ၼၼ်ႉ ၵူၼ်းမိူင်းၼမ်ႉတူႈ လႆႈပၢႆႈၽေးသိုၵ်းႁွတ်ႈထိုင်တၢင်းသီႇပေႃႉ၊ ၼမ်ႉသၼ်ႇ ၸဵမ်ၸိူဝ်းၼႆႉၵေႃႈ မီးထႅင်ႈ တင်းၼမ် ၼႆယဝ်ႉ။
ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉ တီႈသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ပၢႆႈမႃးတီႈသီႇပေႃႉၼႆႉ တေမီးၶၢဝ်းတၢင်း လိူၼ်ပၢႆယဝ်ႉပႆႇၸၢင်ႈပွၵ်ႈႁိူၼ်း။ သဵင်ၵွင်ႈ တိုၵ်ႉတႅၵ်ႇယူႇၶႃႈ ၼႂ်းပိုၼ်ႉတီႈ ပႆႇၵတ်းယဵၼ် ။ ယွၼ်ႉၼႆ ပႆႇၸၢင်ႈပွၵ်ႈႁိူၼ်းၶႃႈ” – ဝႃႈၼႆ။
တႄႇဢဝ် ႁၢင်လိူၼ်မၢတ်ႊၶျ် 2021 ၼႆႉမႃး သိုၵ်း RCSS တင်း TNLA, SSPP တႄႇ ပဵၼ်ပၢင်တိုၵ်းၵၼ် မႃးတၢင်းၸႄႈ ဝဵင်းၼမ်ႉတူႈ ၸိုင်ႈတႆး ပွတ်းႁွင်ႇ ႁၢဝ်ႈႁႅင်း ၵူၼ်းမိူင်း ၼမ်ႉတူႈ ၼပ်ႉႁဵင် လႆႈပၢႆႈၽေးသိုၵ်း မၢင်ၵေႃႈပၢႆႈႁွတ်ႈထိုင် သီႇ ပေႃႉ၊ လႃႈသဵဝ်ႈ၊ ၼမ်ႉသၼ်ႇ ၸိူဝ်းၼႆႉၵေႃႈမီး တင်းၼမ် ယဝ်ႉၵေႃႈ ပၢႆႈသွၼ်ႈဝႆႉ ၼႂ်းၸႄႈဝဵင်း ၼမ်ႉ တူႈ မိူၼ်ၼင်ႇ တၢင်း ႁွင်ႇဝဵင်း ၵွင်းႁုင်း၊ မၢၼ်ႈမႂ်ႇ၊ မၢၼ်ႈၸၢမ် ယဝ်ႉၵေႃႈ ဢိၵ်ႇထႅင်ႈ လၢႆလၢႆတီႈ ။ ႁိူၼ်းယေး ၵူၼ်းဝၢၼ်ႈလႆႈထုၵ်ႇၾႆးၽဝ် 100 လင်ၶႃးႁိူၼ်းပၢႆ ၵူၼ်းမိူင်းယဵပ်ႇၺႃးမၢၵ်ႇႁၢင်ႈၵၢင် လူႉ တၢႆ မၢတ်ႇၸဵပ်းၵေႃႈမီး။
