မိူဝ်ႈဝႃး ယၢမ်းဝၢႆးဝၼ်း မွၵ်ႈ 5 မူင်း သိုၵ်းလွႆ ၼပ်ႉႁူဝ်သိပ်း ဢၼ်ပၵ်းယူႇ ဝူင်ႈၵၢင် မူႇၸေႊ – ၼမ်ႉၶမ်း ၼၼ်ႉ ထွၼ်ဢွၵ်ႇ သိုၵ်းၶႄႇ ၵဝ်ႈၵၢင်ႉ MNDAA ပုတ်ႈယူႇ ပၵ်းသဝ်း။
ဝၼ်းတီႈ 27/3/2026 ယၢမ်းၵၢင်ဝၼ်း သိုၵ်းလွႆ တဢၢင်း TNLA တင်း သိုၵ်းၶႄႇၵဝ်ႈၵၢင်ႉ MNDAA ႁူပ်ႉထူပ်းဢုပ်ႇဢူဝ်းၵၼ် တီႈဝၢၼ်ႈ 13 လၵ်း ဝူင်ႈၵၢင်ၼမ်ႉၽၵ်းၵႃ ၼမ်ႉၶမ်း။ ဝၢႆးပၢင်ၵုမ်ယဝ်ႉ ယၢမ်း တၢမ်းၶမ်ႈၵေႃႈ သိုၵ်း TNLA ထွၼ်ဢွၵ်ႇ တပ်ႉႁိမ်းၸေႊလၢၼ်ႉ သေ သိုၵ်း MNDAA ပုတ်ႈယူႇ။
“ၶဝ်ဢမ်ႇလႆႈတွၵ်ႉတႅၵ်ႉ ပိုတ်းယိုဝ်းၵၼ်သင်ၶႃႈ လႅပ်ႈပဵၼ် ၶေႃႈလႆႈ ၸႂ် တီႈလၢဝ်ႇၵၢႆးသေ သိုၵ်းလွႆ လႆႈထွၼ်ပၼ်ၸိူင်ႉၼၼ် ၵူၺ်းၶႃႈ။ တွၼ်ႈၾၢႆႇတူၵ်း တၢင်းလူင် မူႇၸေႊ – လႃႈသဵဝ်ႈ ဝၢၼ်ႈၶႄႇ ၶႄႇယူႇ ဝၢၼ်ႈလွႆ လွႆယူႇ ၸိူင်ႉၼၼ်ဢေႃႈ” – ၼႆ ၵူၼ်းယူႇ ထုင်ႉမၢဝ်းၵေႃႉၼိုင်ႈလၢတ်ႈ။
မိူဝ်ႈဝႃး 27/3/2026 ယၢမ်းတၢမ်းၶမ်ႈၼၼ်ႉ သိုၵ်းၶႄႇ ၵဝ်ႈၵၢင်ႉ လူင်းလွႆတေးမိူင်းမႃး 300-400 သိုၵ်းလွႆ TNLA ၼပ်ႉႁူဝ်သိပ်း ဢၼ်ယူႇႁိမ်းၸေႊလၢၼ်ႉၼၼ်ႉ ထွၼ် ဢွၵ်ႇၵႂႃႇတၢင်းဝဵင်းၼမ်ႉၶမ်းမူတ်း။
ၼႂ်းဝဵင်းၸေႊလၢၼ်ႉ ဢမ်ႇမီးသိုၵ်းၸုမ်းလႂ်ပၵ်းယူႇ သိုၵ်းတႆး SSPP ၵေႃႈၵႂႃႇမႃးတူင်ႉၼိုင် ယၢမ်းလဵဝ်တေႉ လွႆတေးမိူင်း တီႈဢၼ်သိုၵ်း လွႆ ယႃႉၶူးမိူင်း ၸေႊလၢၼ်ႉၼၼ်ႉ ထွၼ်ဢွၵ်ႇပၼ် သိုၵ်းၶႄႇ ၵဝ်ႈၵၢင်ႉ ပုတ်ႈ ပၵ်းယူႇသဝ်းဝႆႉယဝ်ႉၼႆ ၵူၼ်းၼႂ်းပိုၼ်ႉတီႈ လၢတ်ႈၼင်ႇၼႆ။
မိူဝ်ႈဝၼ်းတီႈ 13/2/2026 သိုၵ်းလွႆ ၽဵဝ်ႈသိုၵ်းၶႄႇၵဝ်ႈၵၢင်ႉဢွၵ်ႇ ဝဵင်းၵူတ်ႉၶၢႆ ထိုင်မႃး ဝၼ်းတီႈ 16/3/2026 သိုၵ်းၶႄႇၵဝ်ႈၵၢင်ႉ ထႅမ်ႁႅင်းသိုၵ်း လိုပ်ႈလမ်းသိုၵ်းလွႆ TNLA ဢွၵ်ႇဝဵင်းၵူတ်ႉၶၢႆသဵင်ႈသဵင်ႈ သေဢမ်ႇၵႃး ဢၼ်ပၵ်းၼႂ်းၸႄႈဝဵင်းသႅၼ်ဝီ လႃႈသဵဝ်ႈ ၸိူဝ်းၼႆႉၵေႃႈ လႆႈထွၼ်ဢွၵ်ႇယူႇ ၾၢႆႇတူၵ်း တၢင်းလူင်သဵင်ႈသဵင်ႈ။
ဝၼ်းတီႈ 17 – 19 သွင်ၾၢႆႇ ႁူပ်ႉၵၼ်တီႈ ဝဵင်းလၢဝ်ႇၵၢႆး ၾၢႆႇသိုၵ်းလွႆ လႆႈယွမ်း ပဵၼ်တၢင်းၵၢၼ် တေပၼ်သိုၵ်းၶႄႇၵဝ်ႈၵၢင်ႉ ၵုမ်းၵမ် ဝဵင်းၵူတ်ႉၶၢႆသဵင်ႈသဵင်ႈ။ ၸွမ်းၼင်ႇၶေႃႈတူၵ်းလူင်းလႆႈၸႂ်ၵၼ်သေ တီႈသိုၵ်းလွႆ ပႆႇထွၼ်ပၼ်ၼၼ်ႉ တိုၵ်ႉသိုပ်ႇထွၼ်ပၼ်မႃးတီႈၼိုင်ႈယဝ်ႉတီႈၼိုင်ႈ တေႃႇထိုင် ထွၼ်ပၼ်တပ်ႉတီႈ ႁိမ်းဝဵင်းၸေႊလၢၼ်ႉမိူဝ်ႈဝႃးၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ