ၾၢႆႇၼိုင်ႈပဵၼ်ၶၢဝ်းႁူဝ်ၾူၼ်သေဢမ်ႇၵႃး ၾၢႆႇၼိုင်ႈၵေႃႈ မီးဝႆႉပႃးတၢင်းပဵၼ်ၵူၼ်းထဝ်ႈလႄႈ ၵူၼ်းပၢႆႈၽေးသိုၵ်း ႁွတ်ႈထိုင်ၼမ်ႉတူႈ လူႉတၢႆၵေႃႉၼိုင်ႈ ။
မိူဝ်ႈဝႃး ဝၼ်းတီႈ 9/5/2021 ယၢမ်းၵၢင်ၼႂ် လုင်းၸၢႆးထုၼ်း ဢႃယု 60 ပၢႆ ၵူၼ်းပၢႆႈၽေးသိုၵ်း လူႉတၢႆတီႈဝၢၼ်ႈၵွင်းႁူင်း ဢိူင်ႇမိူင်းမူႉ ၸႄႈဝဵင်းၼမ်ႉတူႈ ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈ ဢေႃႈ လႆႈလူႉသဵင်ႈၵႂႃႇ ၵေႃႉၼိုင်ႈ ပဵၼ်ၵူၼ်းထဝ်ႈ ၽူႈၸၢႆး။ လုၵ်ႉမၢၼ်ႈသႃႇသေ ပၢႆႈမႃးသွၼ်ႈဝႆႉတီႈဝၢၼ်ႈၵွင်းႁုင်း။ မၼ်းပဵၼ်တၢင်းပဵၼ်ၵူၼ်းထဝ်ႈသေ လႆႈလူႉသဵင်ႈၵႂႃႇ။ လႆႈပူၼ်ႉၶၢပ်ႈတူဝ်မၼ်းၸၢႆးၵႂႃႇ မိူဝ်ႈၼႆႉယဝ်ႉ”- ဝႃႈၼႆ။
ၾၢႆႇၼိုင်ႈ ၼႂ်းမိူင်းတႆးမီးၾူၼ်တူၵ်းမႃးထပ်းၵၼ်ယဝ်ႉသေဢမ်ႇၵႃး ၼႂ်းဝၢၼ်ႈၼႂ်းဢိူင်ႇၵေႃႈၸုမ်းသိုၵ်းသမ်ႉတိုၵ်ႉၶဵင်ႈၶႅင်ၵၼ်ယူႇလႄႈ ၵူၼ်းပၢႆႈၽေး ပႆႇၸၢင်ႈပွၵ်ႈႁိူၼ်းၶိုၼ်း။ လွင်ႈယူႇလွင်ႈၵိၼ်ဢမ်ႇမိူၼ်ႁိူၼ်းယေးလႄႈ ၵူၼ်းပၢႆႈၽေး ၸိူဝ်းဢႃယုယႂ်ႇ ယၢပ်ႇၽိုတ်ႇၶၢၼ်ၸႂ်။
“တေႃႇထိုင်ယၢမ်းလဵဝ် ပၢင်တိုၵ်းပႆႇယဵၼ်ၶႃႈ တီႈၼမ်ႉတူႈၼႆႉ မိူဝ်ႈဝႃး တိုၵ်ႉပဵၼ်ၵၼ်ထႅင်ႈတီႈႁိမ်းဝၢၼ်ႈၶျွင်းတႃႇယူႇ။ ၵူၼ်းပၢႆႈၽေးတႄႉ ၵႂႃႇၵႂႃႇ မႃးမႃး ပေႃးယဵၼ်ၵေႃႈ မိူဝ်းသေ ပေႃးငဝ်းလၢႆး ဢမ်ႇလီၼႆၵေႃႈ မႃးၶိုၼ်း ႁဵတ်းၼႆ”- လုင်းၸၢႆး ပႃႉၺၢၼ်ႇ သိုပ်ႇလၢတ်ႈၼႄၼင်ႇၼႆ။
ယွၼ်ႉၼႂ်းပိုၼ်ႉတီႈပႆႇၼိမ်ယဵၼ်လႄႈ ၵူၼ်းပၢႆႈၽေးသိုၵ်း တီႈၸႄႈဝဵင်းၼမ်ႉတူႈ ပႆႇၸၢင်ႈပွၵ်ႈၶိုၼ်းႁိူၼ်း ယေးၵၼ် တေမီးၶၢဝ်းတၢင်း 3 လိူၼ် ယဝ်ႉ။
ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းဢႃႇၼႃႇမႃးမိူဝ်ႈဝၼ်းတီႈ 1/2/2021 သေ သိုၵ်း RCSS တင်း TNLA, SSPP ပဵၼ် ပၢင်တိုၵ်းၵၼ်မႃးၼႂ်းၸႄႈဝဵင်းၼမ်ႉတူႈ ႁၢဝ်ႈႁႅင်း တေႃႇထိုင်ယၢမ်းလဵဝ် ပႆႇယဵၼ် ႁိူၼ်းယေးၵူၼ်းဝၢၼ်ႈလႆႈထုၵ်ႇၾႆးၽဝ် ဢမ်ႇယွမ်း 100 လင်ၶႃးႁိူၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ