ၸုမ်းဢူၺ်းလီသိုၵ်းပွတ်းႁွင်ႇ ဢၼ်မီး သိုၵ်း SSPP သိုၵ်း TNLA ၼၼ်ႉ ပဵၼ်ပၢင်တိုၵ်းၵၼ်တင်း သိုၵ်းRCSS ႁၢဝ်ႈႁႅင်း ၼႂ်းၸႄႈဝဵင်းၼမ်ႉတူႈ ႁၢဝ်ႈႁႅင်း ႁိူၼ်းယေးၵူၼ်းဝၢၼ်ႈၵေႃႈ ၺႃးမၢၵ်ႇလူင်သေ ၾႆးမႆႈပႅတ်ႈထႅင်ႈလၢႆလင်။
မိူဝ်ႈဝႃး ဝၼ်းတီႈ 21/4/2021 တၢင်းဢိူင်ႇပၢင်လူင် – ဝၢၼ်ႈပၢင်လူင်၊ ယေႇဢူဝ်းလႄႈ မၢၼ်ႈသႃႈ ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉ မႄး ၸိုင်ႈတႆး ပွတ်းႁွင်ႇ ၼၼ်ႉ ၸုမ်းဢူၺ်းလီသိုၵ်း ပွတ်းႁွင်ႇ SSPP, TNLA ၼၼ်ႉပဵၼ်ပၢင်တိုၵ်းတင်း RCSS ႁၢဝ်ႈႁႅင်း။ ယွၼ်ႉပၢင်တိုၵ်းသွင်ၾၢႆသေ ၾႆးမႆႈ ႁိူၼ်းၵူၼ်းဝၢၼ်ႈ ၵႂႃႇထႅင်ႈ 5-6 လင် လႄႈ ႁဵတ်းႁႂ်ႈ ၵူၼ်းဝၢၼ်ႈပဵၼ်ၼမ်ႉႁူ ၼမ်ႉတႃထႅင်ႈ။
ၵူၼ်း ၼမ်ႉတူႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးၼႆႉ တႄႇဢဝ် ယၢမ်းၵၢင်ၼႂ် တေႃႇထိုင်ဝၢႆး ဝၼ်းၶႃႈၼႃႇ သဵင်ၵွင်ႈၸင်ႇတေယဵၼ် ပဵၼ်ၵၼ်ႁႅင်းဝႆႉ။ ႁိူၼ်းယေးၵူၼ်းဝၢၼ်ႈပၢင်လူင်တင်း မၢၼ်ႈသႃႇၼႆႉ ၺႃးၾႆးမႆႈ ၵႂႃႇ မွၵ်ႈ 5-6 လင် ဢေႃႈ ယွၼ်ႉၶဝ်ယိုဝ်းၵၼ် ။ ပႆႇႁူႉႁူဝ်ယွႆႈမၼ်းလီလီ ပဵၼ်ႁိူၼ်းယေးၽႂ်လၢႆလၢႆ ၊ လူႉသုမ်းၸွမ်းၾႆးၵႂႃႇ သင်လၢႆလၢႆ ၸိူဝ်းၼႆႉတိုၵ်ႉၵူတ်ႇ ထတ်းဝႆႉယူႇ”- ဝႃႈၼႆ။
တႄႇဢဝ်ႁၢင်လိူၼ်မၢတ်ႊၶျ်မႃး တေႃႇထိုင် ႁူဝ်လိူၼ်ဢေႊၿရိူဝ်ႊၼႆႉ ႁိူၼ်းယေး ၵူၼ်းဝၢၼ်ႈပၢင်လူင် ထုၵ်ႇၾႆးမႆႈ ယွၼ်ႉ ပၢင်တိုၵ်းၼႆႉ ဢမ်ႇယွမ်း 20 လင်ယဝ်ႉ ဝႃႈၼႆ။
“ယၢမ်းလဵဝ် ၵူၼ်းဝၢၼ်ႈ ဢွၼ်ၵၼ်ပၢႆႈမူတ်းယဝ်ႉ။ ႁိူၼ်းယေး ဢၼ်ၵိုတ်း ဝႆႉၸိူဝ်းၼၼ်ႉတႄႉ လႅပ်ႈလူႉၵွႆ ၾႆးမႆႈ ယွၼ်ႉပၢင်တိုၵ်းၶဝ်ၼႆႉ ၶႂ်ႈဝႃႈ တင်းၼမ်ၶႃႈယဝ်ႉ။ တေႃႈလဵဝ် ၵူၼ်းဝၢၼ်ႈတၢင်းသၢႆၼၼ်ႉတႄႉ ဢွၼ်ၵၼ်ပၢႆႈၵႂႃႇ တၢင်း ၼမ်ႉသၼ်ႇ၊ သီႇပေႃႉ၊ မၢၼ်ႈၸၢမ် ၼမ်ႉတူႈ လႃႈသဵဝ်ႈ ၸိူဝ်းၼႆႉမူတ်းယဝ်ႉ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈၼႄၼင်ႇၼႆ။
ဝၢႆးသေ သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉမႃးၼႆႉ တၢင်းပွတ်း သီႇပေႃႉ၊ ၵျွၵ်ႉမႄးလႄႈ ၼမ်ႉတူႈ ၸိူဝ်းၼႆႉ ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း သိုၵ်းမၢၼ်ႈတင်း RCSS ၵေႃႈယိုဝ်းၵၼ်၊ သိုၵ်း TNLA, SSPP တင်း RCSS ၵေႃႈယိုဝၼ်းၵၼ်။ ယွၼ်ႉပၢင်တိုၵ်းသေ ၵူၼ်းပၢႆႈ ၽေးသိုၵ်း တီႈၼမ်ႉတူႈမီး ၸမ် 2,000 လႆႈပၢႆႈ၊ တီႈသီႇပေႃႉ 1,000 ႁဵင်လႄႈ တီႈၵျွၵ်ႉမႄးထႅင်ႈမွၵ်ႈ 1,000 လႆႈပၢႆႈၽေးသိုၵ်းၵၼ် ၼႆယဝ်ႉ။
