ၸုမ်းဢူၺ်းလီသိုၵ်းပွတ်းႁွင်ႇ ဢၼ်မီး သိုၵ်း TNLA သိုၵ်း SSPP ၶဵင်ႈၶႅင်ၵၢၼ်သိုၵ်းတေႃႇၵၼ်တင်း သိုၵ်း RCSS လႄႈ ၵူၼ်းမိူင်း ၼႂ်းၸႄႈဝဵင်းၼမ်ႉတူႈ ၼပ်ႉႁူဝ်ႁဵင် ႁူပ်ႉတၢင်းယၢပ်ႇ – လႆႈပၢႆႈ လႆႈၼီ လႄႈ ၵိၼ်းၸႂ် တႃႇယူႇ တႃႇၵိၼ် ဝႃႈၼႆ။
ၵူၼ်းဝၢၼ်ႈၵူၼ်းမိူင်း ၸိူဝ်းပၢႆႈၽေး သိုၵ်း TNLA သိုၵ်း SSPP တင်း သိုၵ်း RCSS ယိုဝ်းၵိၼ်ၼၼ်ႉ မႃးမီးတီႈဝတ်ႉပၢင်သပေႇၸၢၼ်း၊ ဝတ်ႉ/ၵျွင်း ႁွင်ႇမၢၼ်ႈၸၢမ် လႄႈ ဝတ်ႉယေႇဢူဝ်း ဢၼ်မီးၶၢဝ်းတၢင်းၸမ်လိူၼ် ၼႂ်းၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ႁူဝ်ၵူၼ်း ၸမ်သွင်ႁဵင် ၼၼ်ႉ လူဝ်ႇတၢင်းၸွႆႈထႅမ် ၶဝ်ႈသၢၼ် ၽၵ်းမီႇ ၼမ်ႉမၼ်း ပႃးၸဵမ် ၶိူင်ႈၸႂ်ႉၼၢင်းယိင်း လႄႈ ၽႃႈႁူမ်ႇၶူဝ်းၼွၼ်း သုတ်းတႃႇလုၵ်ႈဢွၼ်ႇ ၸိူဝ်းၼႆႉ။
လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵူၼ်းပၢႆႈၽေးသိုၵ်းႁဝ်းၶႃႈ လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉ ၼႃႇၶႃႈယဝ်ႉ။ လွင်ႈၼုင်ႈဝႆတႄႉ ဢမ်ႇပေႃးၵႃႈႁိုဝ်ၶႃႈ ဢၼ် လူဝ်ႇႁႅင်းတႄႉ ပဵၼ်ၶွင်ၵိၼ်ယႅမ်ႉၼၼ်ႉၶႃႈယဝ်ႉ”- ဝႃႈၼႆ။
ၵူၼ်းပၢႆႈၽေးသိုၵ်း ႁူဝ်ၵူၼ်း ၸမ်သွင်ႁဵင် ဢၼ်ပၢႆႈမႃးၼႆႉ ၵမ်ႈၼမ် ပဵၼ်ၵူၼ်း ၼႂ်းဢိူင်ႇပၢင်လူင်၊ ဢိူင်ႇမၢၼ်ႈၸၢမ်၊ ဢိူင်ႇ မိူင်းမူႇလႄႈ ဢိူင်ႇၶျွင်းသႃႇ ၸိူဝ်းၼႆႉ။
“ၵူၼ်းပၢႆႈၽေးသိုၵ်း ႁူဝ်ၵူၼ်း သွင်ႁဵင်ပၢႆၼႆႉ မၢင်ၵေႃႉ ပၢႆႈမႃး တေမီးၶၢဝ်းတၢင်းၸမ်လိူၼ်ယဝ်ႉ၊ မၢင်ၵေႃႉ ပၢႆႈမႃး ပႆႇတဵမ် လိူၼ်၊ မၢင်ၵေႃႉ တိုၵ်ႉပၢႆႈမႃး ၼႂ်းႁူဝ်လိူၼ်ၼႆႉၵေႃႈမီး။ မိူဝ်းမိူဝ်းမႃးမႃးၵၼ်ၶႃႈဢေႃႈ ပေႃးပၢင်တိုၵ်းယဵၼ်ၵေႃႈ မိူဝ်း။ ပေႃးငဝ်းလၢႆးဢမ်ႇလီၵေႃႈ ၼႅတ်ႈမႃးၶိုၼ်း ႁဵတ်းၼႆ“ လုင်းၸၢႆးပႃႉၺၢၼ်ႇ သိုပ်ႇ လၢတ်ႈၼႄထႅင်ႈၼင်ႇၼႆ။
သိုၵ်းဢူၺ်းလီပွတ်းႁွင်ႇ ဢၼ်မီး TNLA, SSPP ၼၼ်ႉ ပဵၼ်ပၢင်တိုၵ်းၵၼ်တင်း RCSS ၼႂ်းၸႄႈဝဵင်းသီႇပေႃႉ ၊ ၵျွၵ်ႉမႄး၊ ၼမ်ႉတူႈ ၸိူဝ်းၼႆႉ တင်ႈဢဝ် ႁၢင်ပီ 2020 မႃး။ ၼႂ်းပီ 2021 ၽွင်းသိုၵ်းမၢၼ်ႈမိူၵ်ႈလိူင်း ယိုတ်းဢႃႇၼႃႇ ၶႃႈႁႅမ်ၵူၼ်းမိူင်း ၼႂ်းၶူးၼႂ်းဝဵင်း ၸုမ်းသိုၵ်းၸိူဝ်း ၼႆႉသမ်ႉယိုဝ်းၵၼ်ၸွမ်းဝၢၼ်ႈၼွၵ်ႈၼႃးပၢင်ႇလႄႈ ႁဵတ်းႁႂ်ႈၵူၼ်းဝၢၼ်ႈ ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉ လႆႈပၢႆႈယၢၼ်ႁိူၼ်းယေးတီႈယူႇ ၼပ်ႉႁူဝ်ႁဵင်။ ယွၼ်ႉၸုမ်းသိုၵ်းၸိူဝ်း ၼႆႉယိုဝ်းၵၼ်သေ မၢၵ်ႇလူင် တူၵ်းသႂ်ႇ ႁိူၼ်းယေး ၵူၼ်းဝၢၼ်ႈ ၺႃးၾႆးမႆႈ ဢမ်ႇယွမ်း 10 လင်၊ ၵူၼ်းမိူင်း လႆႈလူႉတၢႆယွၼ်ႉၶဝ်ၵေႃႈ မီးလၢႆလၢႆၵေႃႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ