ဢိင်ၼိူဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆး ၼင်ႇၵၼ် ပိုတ်းယိုဝ်းၵၼ် ႁၢဝ်ႈႁႅင်းသေ ၵူၼ်းမိူင်းၼႂ်းပိုၼ်ႉတီႈ လႆႈ ငိူင်ႉပၢႆႈၽေးသိုၵ်းထႅင်ႈ 300 ပၢႆ တီႈၸႄႈဝဵင်းၼမ်ႉတူႈ ဝႃႈၼႆ။
မိူဝ်ႈဝႃး ဝၼ်းတီႈ 28/3/2021 ယၢမ်းဝၢႆးဝၼ်း မွၵ်ႈ 3 မူင်းၶိုင်ႈ တၢင်းၾၢႆႇဢွၵ်ႇဝၢၼ်ႈပၢင်လူင် ၸႄႈဝဵင်းၼမ်ႉတူႈ ၸႄႈ တွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းဝၢၼ်ႈပၢင်လူင် ဢွၼ်ၵၼ်ငိူင်ႈပၢႆႈ ၵႂႃႇသွၼ်ႈဝႆႉတီႈဝၢၼ်ႈပၢင်သပေႇ – မၢၼ်ႈလီႈ ႁူဝ်ၵူၼ်း 300 ပၢႆ ၼႆယဝ်ႉ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၸုမ်းၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈပၢင်သပေႇ မၢၼ်ႈလီႈႁဝ်းၶႃႈၼၼ်ႉ မီးၵူၼ်းပၢႆႈၽေးသိုၵ်းဝႆႉ မိူၼ်ၼင်ႇသင်ၶၸဝ်ႈ 60 တူၼ်၊ ၵူၼ်းႁိူၼ်းသမ်ႉ 352 ၵေႃႉ၊ ၸၢႆး 210 ၵေႃႉ လႄႈ ယိင်း 142 ၵေႃႉ”- ဝႃႈၼႆ။
ၵဵဝ်ႇလူၺ်ႈ လွင်ႈၵူၼ်းပၢႆႈၽေးသိုၵ်း တီႈဝၢၼ်ႈပၢင်သပေႇၼႆႉသေ ႁူဝ်ၵူၼ်း 300 ပၢႆ ႁူပ်ႉလွင်ႈယၢပ်ႇၽိုတ်ႇၶဝ်ႈၼမ်ႉ တၢင်းၵိၼ်ၵၼ် ၼႆယဝ်ႉ။
“သဵၼ်ႈတၢင်း တႃႇတေၶဝ်ႈၸူးတီႈဝၢၼ်ႈသပေႇၼၼ်ႉ မၼ်းၵႂႃႇဢမ်ႇလႆႈ ထုၵ်ႇပိၵ်ႉဢိုတ်းဝႆႉၶႃႈဢိူဝ်ႈ။ လုၵ်ႉၼမ်ႉတူႈၵႂႃႇ ၵေႃႈ ဢမ်ႇလႆႈ။ လုၵ်ႉတၢင်းသီႇပေႃႉ မႃးၵေႃႈ ဢမ်ႇလႆႈ။ ၵူၼ်းပၢႆႈၽေးသိုၵ်း 300 ပၢႆတႄႉ ႁူႉထူပ်းတၢင်းယၢပ်ႇၽိုတ်ႇ ၶဝ်ႈ ၼမ်ႉ တင်းၵိၼ်ၶႃႈယဝ်ႉ။ ပေႃးဢမ်ႇၸၢင်ႈၶဝ်ႈၵႂႃႇၸွႆႈၶဝ်လႆႈတႄႉ”- လုင်းၸၢႆးပႃႉၺၢၼ်ႇ သိုပ်ႇလၢတ်ႈၼႄၼင်ႇၼႆ။
ၼွၵ်ႈလိူဝ်ၼၼ်ႉ မိူဝ်ႈဝႃး ယၢမ်းဝၢႆးဝၼ်း ၵူၼ်းဝၢၼ်ႈပၢင်လူင် ပႃႈၼၢင်းၸၢမ်ႇ ၺႃးၸၢၵ်ႇမၢၵ်ႇတူၵ်းသႂ်ႇ လႆႈမၢတ်ႇၸဵပ်း တီႈ ပုမ်သေ လႆႈသူင်ႇယူတ်းယႃတီႈလႃႈသဵဝ်ႈ။ ယဝ်ႉၵေႃႈ မၢၵ်ႇလူင် တူၵ်းသႂ်ႇ ႁိူၼ်းၵူၼ်းဝၢၼ်ႈၸၢၼ်း ဢၼ်မီးႁိမ်း ဝၢၼ်ႈပၢင် လူင် ထုၵ်ႇၾႆးမႆႈၵႂႃႇ သၢမ်လင် ၼႆယဝ်ႉ။
