ၼႂ်းၸႄႈဝဵင်းသီႇပေႃႉ သိုၵ်း SSPP တင်း RCSS ပိုတ်ႇၼႃႈသိုၵ်း တေႃႇၵၼ် ႁၢဝ်ႈႁႅင်း ၵူၼ်း ပိုၼ်ႉတီႈလႆႈပၢႆႈၶဝ်ႈ ဝဵင်း ဢမ်ႇယွမ်း 400 ၵေႃႉ ဝႃႈၼႆ။
မိူဝ်ႈဝႃး ဝၼ်းတီႈ 25/3/2021 ယၢမ်းဝၢႆးဝၼ်း မွၵ်ႈ 1 မူင်းၼႆႉ ၵူၼ်းဝၢၼ်ႈတႃႈတေႈ၊ ဝၢၼ်ႈၵုင်းၸၢင်ႈလဵၵ်းလႄႈ ဝၢၼ်ႈပၢင်ႇ ၼိူဝ် ဢွၼ်ၵၼ်ပၢႆႈၽေးသိုၵ်းထႅင်ႈ ႁူဝ်ၵူၼ်း 100 ပၢႆ ယၢမ်းလဵဝ် မႃးသွၼ်ႈဝႆႉတီႈဝတ်ႉၽူဝ်းတေႃႇ ၸႄႈဝဵင်းသီႇပေႃႉ ၸိုင်ႈ တႆး ပွတ်းႁွင်ႇ ၼႆယဝ်ႉ။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်တီႈဝတ်ႉၽူဝ်းတေႃႇ လၢတ်ႈဝႃႈ – “မိူဝ်ႈဝႃး သဵင်ၵွင်ႈတႅၵ်ႇသေ ႁဝ်းၶႃႈ လႆႈဢွၼ် ၵၼ်ပၢႆႈမႃး ႁွတ်ႈထိုင်တီႈ ဝတ်ႉၽူဝ်းတေႃႇၼႆႉ မီႁူဝ်ၵူၼ်း 100 ပၢႆ တင်းသၢမ်ဝၢၼ်ႈၶႃႈဢေႃႈ”- ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈဝတ်ႉၽူဝ်းတေႃႇသမ်ႉ တေမီး ႁူဝ်ၵူၼ်း 200 ပၢႆ တီႈဝတ်ႉၼမ်ႉဢုမ်သမ်ႉ တေမီး 210 ၵေႃႉ သွင်တီႈႁူမ်ႈၵၼ် တေမီး 400 ပၢႆ ၼႆယဝ်ႉ။
“ယၢမ်းလဵဝ် လွင်ႈၵိၼ်ယႅမ်ႉတႄႉ ပီႈၼွင်ႉႁဝ်းၶဝ် မႃးၸွႆႈပၼ် ယူႇၶႃႈ။ လႆႈငိၼ်းဝႃႈ မိူဝ်ႈၼႆႉ ၵၢင်ၼႂ် သဵင်ၵွင်ႈတႅၵ်ႇထႅင်ႈ တၢင်းပွတ်းတႃႈတေႈ ပီႈၼွင်ႉႁဝ်းၶႃႈ တိုၵ်ႉဢွၼ်ၵၼ်ပၢႆႈဢွၵ်ႇမႃးထႅင်ႈ မိူဝ်ႈၵႆႈၼႆႉ ႁွတ်ႈၽႅဝ်မႃးတီႈဝတ်ႉၽူဝ်းတေႃႇ 5 ၵေႃႉယဝ်ႉ တေပၢႆႈမႃးထႅင်ႈၵႃႈႁိုဝ်တႄႉ ပႆႇႁူႉ တိုၵ်ႉပႂ်ႉႁပ်ႉယူႇၶႃႈ”- ၽူႈၸွႆႇထႅမ် ၵူၼ်းပၢႆႈၽေး သိုၵ်းတီႈသီႇပေႃႉ လၢတ်ႈ ၼႄၼင်ႇၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်ဝႆႉ တီႈဝတ်ႉၽူဝ်းတေႃႇ တင်း ဝတ်ႉၼမ်ႉဢုမ်ၼႆႉသမ်ႉ ပဵၼ်ၵူၼ်းဝၢၼ်ႈသူၼ်လူင်၊ ႁၢတ်ႇလႅၼ်ႈ၊ ၽႃလၢႆး၊ ၶျွင်းသူင်ႇ၊ တႃႈတေႈ၊ ၵုင်းၸၢင်ႈလဵၵ်းလႄႈ ဝၢၼ်ႈပၢင်ႇၼိူဝ် ၸိူဝ်းၼႆႉ။
သင်ပဵၼ်လႆႈ ပၢင်တိုၵ်းဢၼ်ပဵၼ်ယူႇ တၢင်းသီႇပေႃႉၼႆႉ ယူႇတီႈသိုၵ်းၼင်ႇၵၼ်သေ ယႃႇပေလၢမ်းလိမ်းပွႆႇမၢၵ်ႇၵႂႃႇ ၵူႈႁူး ၵူႈတၢင်း။ ၵူဝ်တိူဝ်ႉၺႃးၵူၼ်းဝၢၼ်ႈ ဝူဝ်း ၵႂၢႆး မူ ၵႆႇ ႁိူၼ်းယေး လူႉၵွႆ မၢတ်ႇတၢႆ ၵူၼ်းပၢႆႈၽေးသိုၵ်း တုၵ်းယွၼ်းလၢတ်ႈၼင်ႇၼႆ ။
တႄႇဢဝ် ဝၼ်းတီႈ 23 ၼႆႉမႃး သိုၵ်း RCSS တင်း SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်းမႃးၼႂ်းၸႄႈတွၼ်ႈၵျွၵ်ႉမႄး တေႃႇထိုင် ယၢမ်းလဵဝ် သဵင်ၵွင်ႈပႆႇယဵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ