မိူဝ်ႈၼႆႉ ဝၼ်းတီႈ 24/3/2021 ယၢမ်းၵၢင်ၼႂ် ၼႂ်းၵႄႈ 6 မူင်း – 7 မူင်း မၢၵ်ႇလူင် တူၵ်းသႂ်ႇ ႁိူၼ်းၵူၼ်းဝၢၼ်ႈၼႃးမၢၵ်ႇၶေႃ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ ၊ ၵူၼ်းမိူင်းလႆႈပၢႆႈၽေးသိုၵ်း ၶဝ်ႈၼႂ်းဝဵင်း။
ၵူၼ်းဝၢၼ်ႈၼႃးမၢၵ်ႇၶေႃ ဢၼ်ပၢႆႈမႃးသွၼ်ႈဝႆႉ တီႈၼႂ်းဝဵင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မိူဝ်ႈၼႆႉ ယၢမ်းၵၢင်ၼႂ် ၼႂ်းၵႄႈ 6 -7 မူင်းၼႆႉၶႃႈ။ ႁဝ်းၶႃႈ ယင်းပႆႇတိုၼ်ႇ သဵင်မၢၵ်ႇၼႆႉ တူၵ်းမႃးတႅၵ်ႇႁႅင်းၶႃႈဢေႃႈ။ ယၢၼ်ႁိူၼ်းႁဝ်းၶႃႈ မွၵ်ႇ 2 လင်ၼႆႉၵူၺ်းၶႃႈ၊ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ဢမ်ႇႁူႉၶႃႈ”- ဝႃႈၼႆ။
မၢၵ်ႇလူင် တူၵ်းသႂ်ႇ ၼႂ်းႁိူၼ်းၵူၼ်းဝၢၼ်ႈ ၼႃးမၢၵ်ႇၶေႃ သွင်လုၵ်ႈၼၼ်ႉ တိူဝ်ႉၺႃးႁိူၼ်း လုင်းၸၢႆးလဵၵ်ႉ လုၵ်ႈၼိုင်ႈလႄႈ ႁိူၼ်း လုင်းဢႃႇရိယ ၼၢင်းသႅင်ၸိင်ႇ လုၵ်ႈၼိုင်ႈ။ ၵူၺ်းၵႃႈ လွင်ႈၵူၼ်း မၢတ်ႇၸဵပ်း လူႉတၢႆတႄႉ ဢမ်ႇမီး ဝႃႈၼႆ။
“မၢၵ်ႇတႄႉ တူၵ်းၼမ်ၶႃႈဢေႃႈ မၢင်ၸိူဝ်းၵေႃႈ တူၵ်းသႂ်ႇၼႂ်းၼမ်ႉ၊ တူၵ်းသႂ်ႇ ၼႂ်းပၢင်ႇၸိူဝ်းၼႆႉဢေႃႈ။ ဢၼ်တိူဝ်ႉႁိူၼ်းၵူၼ်းတႄႉ မီးသွင်လင်ၼၼ်ႉၵူၺ်းၶႃႈ”- ၵူၼ်းပၢႆႈၽေးသိုၵ်း တီႈဝၢၼ်ႈၼႃးမၢၵ်ႇၶေႃ သိုပ်ႇ လၢတ်ႈ ၼႄၼင်ႇၼႆ။
ဝၢၼ်ႈၼႃးမၢၵ်ႇၶေႃၼႆႉ မီးၾၢႆႇၸဵင်ႇၸၢၼ်းဝၼ်းဢွၵ်ႇ ယၢၼ်ၵႆဝဵင်းသီႇပေႃႉ မွၵ်ႈ 20 လၵ်း ။
Image: ၵူၼ်းပိုၼ်ႉတီႈ/ ႁိူၼ်းၵူၼ်းဝၢၼ်ႈ ဢၼ်ၺႃးမၢၵ်ႇတူၵ်းသႂ်ႇ တီႈဝၢၼ်ႈၼႃးမၢၵ်ႇၶေႃႈ မိူဝ်ႈၼႆႉ 24/3/2021 
Image: ၵူၼ်းပိုၼ်ႉတီႈ/ ႁိူၼ်းၵူၼ်းဝၢၼ်ႈ ဢၼ်ၺႃးမၢၵ်ႇတူၵ်းသႂ်ႇ တီႈဝၢၼ်ႈၼႃးမၢၵ်ႇၶေႃႈ မိူဝ်ႈၼႆႉ 24/3/2021
ၽူႈတႅၼ်းသၽႃး ၵေႃႉၵဝ်ႇ ၸႄႈဝဵင်းသီႇပေႃႉ လၢတ်ႈဝႃႈ – “ပဵၼ်ႁဝ်းတေႃႇႁဝ်းယိုဝ်းၵၼ်ၶႃႈဢေႃႈ။ ၸုမ်းၼိုင်ႈမီးတၢင်းၾၢႆႇဢွၵ်ႇ တၢင်း ထႅင်ႈၸုမ်းၼိုင်ႈသမ်ႉ မီးၾၢႆႇတူၵ်းတၢင်း” – ဝႃႈၼႆ။
လွင်ႈၼႆႉ ၽူႈၶၢၼ်ပၢၵ်ႇ RCSS ၸဝ်ႈႁၢၼ် ၶမ်းၸၢမ်ႇ ၵေႃႈလၢတ်ႈဝႃႈ ၼႂ်ၼႆႉ SSPP တင်း RCSS ယိုဝ်းၵၼ် ၼႂ်းၸႄႈဝဵင်းသီႇပေႃႉ ဝႃႈၼႆ။
ဢိင်ၼိူဝ်လွင်ႈမၢၵ်ႇတႅၵ်ႇၼႆႉသေ ၵူၼ်းဝၢၼ်ႈၼႃးမၢၵ်ႇၶေႃ မၢင်ၸိူဝ်း ဢမ်ႇတၼ်းလႆႈ ၶူဝ်းၶွင်သင် ၼႅတ်ႈဢွၼ်ၵၼ်ပၢႆႈ ၶဝ်ႈဝဵင်း။ မၢင်ဝၢၼ်ႈ ဢၼ်ယူႇၼႂ်းဢိူင်ႇၼႃးမၢၵ်ႇၶေႃႈ ၸိူဝ်းၼၼ်ႉသမ်ႉ ထုၵ်ႇသိုၵ်းႁႄႉႁၢမ်ႈ ဢမ်ႇပၼ်ဢွၵ်ႇဝၢၼ်ႈၵေႃႈမီး ဝႃႈၼႆ။
မိူဝ်ႈဝႃး ဝၼ်းတီႈ 23/3/2021 ယၢမ်းဝၢႆးဝၼ်း 1 မူင်း ၵူၼ်းဝၢၼ်ႈသူၼ်လူင်၊ ႁၢတ်ႇလႅၼ်ႈလႄႈ ၽႃလၢႆး ႁူဝ်ၵူၼ်း ၸမ် 100 လႆႈဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ။ ၼႆႉၵေႃႈ ယွၼ်ႉသိုၵ်း RCSS တင်း SSPP ယိုဝ်းၵၼ် ၼင်ႇၵဝ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ