မိူဝ်ႈၼႆႉ ဝၼ်းတီႈ 23/3/2021 ယၢမ်းၵၢင်ၼႂ် မွၵ်ႈ 6 မူင်းပၢႆ မၢၵ်ႇလူင် တူၵ်းသႂ် ႁိူၼ်းၵူၼ်းဝၢၼ်ႈ တီႈဝၢၼ်ႈပၢင်မၢၵ်ႇမိုဝ်း ဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၵူၼ်းဝၢၼ်ႈလူႉတၢႆ 1 မၢတ်ႇ 2 ၊တေႃႇထိုင်ယၢမ်းလဵဝ် ပႆႇၸၢင်ႈဢဝ်တူဝ်ဢွၵ်ႇမႃးယူတ်းယႃ။
ၵူၼ်းပိုၼ်ႉတီႈ ၸွႆႈထႅမ် တူင်ႇဝူင်းတႆး ၵေႃႉၼိုင်ႈ လၢတ်ႈဝႃႈ – “မိူဝ်ႈၼႆႉ ၵၢင်ၼႂ် ၶႃႈဢေႃႈ မၢၵ်ႇလူင် တူၵ်းသႂ်ႇ ႁိူၼ်းၵူၼ်း ဝၢၼ်ႈ လုင်းဢွင်ႇၵျေႃႇ ဢႃယု 53 ပီ လႆႈမၢတ်ႇၸဵပ်းႁၢဝ်ႈႁႅင်းသေ လႆႈလူႉတၢႆ ၵႂႃႇတီႈဝၢၼ်ႈၼၼ်ႉၶႃႈဢေႃႈ၊ မၢၵ်ႇဢၼ် မႃးတူၵ်းသႂ်ႇၼၼ်ႉ ပဵၼ်မၢၵ်ႇၸုမ်းလႂ် ယိုဝ်းမႃးတႄႉ ပႆႇႁူႉ”- ဝႃႈၼႆ။
ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈလၢတ်ႈဝႃႈ သိုၵ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းၵၼ်။ ၶဵင်ႈၶႅင်ၵၢၼ်သိုၵ်းၵၼ်မႃးႁိုင်ယဝ်ႉ- ဝႃႈၼႆ။
ၵေႃႉပဵၼ်မေးၼၢင်း လုင်းဢွင်ႇၵျေႃႇတႄႉ တိူဝ်ႉၺႃး တီႈဢႅင်ႈလႄႈ တုမ်ႇၵူၼ်ႈ လႆႈမၢတ်ႇၸဵပ်းႁၢဝ်ႈႁႅင်းဝႆႉ။ ပႃႈၵမ်ႇ ဢႃယု 45 ပီ ဢၼ်ယူႇႁိမ်းႁိူၼ်းလုင်းဢွင်ႇၵျေႃႇ ၵေႃႈ ၸၢၵ်ႇမၢၵ်ႇတိူဝ်ႉၺႃး တီႈမိုဝ်း သေ လႆႈမၢတ်ႇၸဵပ်း ႁၢဝ်ႈႁႅင်းဝႆႉ မိူၼ်ၵၼ်။ တေႃႇထိုင်ယၢမ်းလဵဝ် ပၢင်တိုၵ်းတိုၵ်ႉပဵၼ်ႁၢဝ်ႈႁႅင်းလႄႈ ၸုမ်းၸွႆႈထႅမ် ပႆႇၸၢင်ႈၶဝ်ႈၵႂႃႇဢဝ်ၵူၼ်းတိူဝ်ႉမၢတ်ႇဢွၵ်ႇမႃးလႆႈ ဝႃႈၼႆ။
မၢၵ်ႇဢၼ်ယိုဝ်းတူၵ်းမႃးၼႂ်းဝၢၼ်ႈၼၼ်ႉ ပဵၼ်မၢၵ်ႇၸုမ်းလႂ်တႄႉ ပႆႇႁူႉ ။ ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS ၼႆႉ ၶဵင်ႈၶႅင်ၵၢၼ်သိုၵ်းၵၼ်မႃး တၢင်းထုင်ႉတေႃႉသၢင်ႇၼႆႉႁိုင်ယဝ်ႉ ၵူၼ်းပွတ်းတေႃႉသၢင်ႇ လၢတ်ႈၼႄၼင်ႇၼႆ။
