ၸုမ်းဢူၺ်းလီပွတ်းႁွင်ႇ ဢၼ်ပႃး သိုၵ်း SSPP, TNLA ၶဵင်ႈၶႅင်ၵၢၼ်သိုၵ်း တင်း RCSS လႄႈသွင်ၾၢႆႇ တိုၵ်းတေႃးၵၼ် ႁဵတ်းႁႂ်ႈ ၵူၼ်းဝၢၼ်ႈၵူၼ်းသူၼ် ၼႂ်းၸႄႈဝဵင်းသီႇပေႃႉ( ၸႄႈတွၼ်ႈၵျွၵ်ႉမႄး၊ မိူင်းတႆးပွတ်းႁွင်ႇ) ဢၼ်လႆႈပၢႆႈၽေး သိုၵ်းသိူဝ် ႁူဝ်ၵူၼ်း 500 ပၢႆၼၼ်ႉ ပႆႇၸၢင်ႈပွၵ်ႈဝၢၼ်ႈၶိုၼ်း။

တႄႇဢဝ် ႁူဝ်လိူၼ်ၾႅပ်ႊၿိဝ်ႊရီႊ မႃးတေႃႇထိုင် ဝၼ်းတီႈ 16/3/2021 မိူဝ်ႈၼႆႉ ဢၼ်ပၢႆႈမႃးမီး တီႈဝတ်ႉမိူင်းမူႉ မီးႁူဝ်ၵူၼ်း 100 ပၢႆ။ ဝတ်ႉပူပ်ႉပႃႇရူင်ႇ ႁူဝ်ၵူၼ်းတေမီး 73 ၵေႃႉ ။ ဝတ်ႉၶမ်းမုင်ႈသႃႇ ႁူဝ်ၵူၼ်း 70 ပၢႆ ။ ဝတ်ႉလွႆၶမ်း ႁူဝ်ၵူၼ်းမွၵ်ႈ 20 ပၢႆ ။ တီႈဝိႁၢရ်ၵျွင်းႁွင်ႇမၢၼ်ႈလႄႈ တီႈၵျွင်းၵမ်မထၢၼ်း မၢၼ်ႈၸၢမ် မီး 200 ပၢႆ – ၸိူဝ်းၼႆႉ ပႆႇၸၢင်ႈပွၵ်ႈႁိူၼ်းၶိုၼ်း။

လုင်းၸၢႆးပႃႉၺၢၼ်ႉ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ် ၵူၼ်းပၢႆႈၽေးသိုၵ်း ဝဵင်းၼမ်ႉတူႈ လၢတ်ႈဝႃႈ – “ပၢင်တိုၵ်းၼႆႉ ၽႂ်ၵေႃႈ ဢမ်ႇထွႆ တိုၵ်ႉၶဵင်ႈၵၼ်ယူႇၶႃႈ။ မိူဝ်ႈၼႆႉ ၵၢင်ၼႂ်ၵေႃႈ တိုၵ်ႉပဵၼ်ၵၼ်ယူႇ တၢင်းပွတ်းၼႃးၵေး ၸိူဝ်းၼႆႉ။ ပၢင်တိုၵ်း ဢၼ် ၶဝ်ပဵၼ်ၵၼ်ၼၼ်ႉ ၶဝ်ဢမ်ႇလေႃႇၵၼ်တႄႉတႄႉ ယူႇတီႈၵႆသေ ဢဝ်မၢၵ်ႇလူင် ယိုဝ်းသႂ်ႇၵၼ် ၸိူင်ႉၼၼ်ၵူၺ်း၊ ၵူၼ်း
ပၢႆႈၽေးသိုၵ်းတႄႉ မိူဝ်းမိူဝ်းမႃးမႃး ၸိူင်ႉၼႆၶႃႈ ၵၢင်ဝၼ်းၵေႃႈ ၵႂႃႇႁဵတ်းၵၢၼ် ၵၢင်ၶမ်ႈၵေႃႈ မႃးၼွၼ်း တီႈဝတ်ႉ ႁဵတ်း ၼႆၶႃႈ” – ဝႃႈၼႆ။

ၵူၼ်းဝၢၼ်ႈ ဢၼ်ပၢႆႈၽေးသိုၵ်းၼႆႉ ပဵၼ်ၵူၼ်းဝၢၼ်ႈၼႃးၵေး၊ ၼႃးၵႅင်း ၊ ၵူၼ်းဝၢၼ်ႈၼွင်ဢေႃႈ၊ ၼႃးငူး၊ ၼႃးႁၢင်း ၸိူဝ်း ၼႆႉ။ ၸိူဝ်းမီးပီႈၼွင်ႉ ၸိူဝ်းယူႇၸမ်ၵႂႃႇတၢင်းသီႇပေႃႉ ၵေႃႈ ပၢႆႈၵႂႃႇတၢင်းၸႄႈဝဵင်းသီႇပေႃႉၵေႃႈမီး။ ငဝ်းလၢႆးတၢင်းဝၢၼ်ႈ ၼမ်ႉပၢႆႈတႄႉ ယဵၼ်ၵႂႃႇယဝ်ႉလႄႈ ၵူၼ်းၸိူဝ်းပွၵ်ႈၶိုၼ်းဝၢၼ်ႈ ၵေႃႈမီးၽွင်ႈ။

သိုၵ်းသွင်ၾၢႆႇ သွင်ၸုမ်းၼႆႉ ႁိမ်တီႈယူႇၵၼ်၊ ၶဵင်ႈၶႅင်ၵၢၼ်သိုၵ်း တိုၵ်းတေႃးၵၼ်ၶိုၼ်းလႄႈ တႄႇႁၢင်ပီ 2020 မႃး တေႃႇ ထိုင်ဝၼ်းမိူဝ်ႈၼႆႉ ၵႆႉၵႆႉပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ၊ ၼမ်ႉတူႈ၊ ၵျွၵ်ႉမႄး ၸိူဝ်းၼႆႉလႄႈ ႁူဝ်ၵူၼ်း ၼပ်ႉႁဵင် ၺႃးၸၢၵ်ႇသိုၵ်းသိူဝ်သေ လႆႈပၢႆႈယၢၼ်ႁိူၼ်းယေးတီႈယူႇ။