ပၢင်တိုၵ်းၼႂ်းၵႄႈသိုၵ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းၵၼ်ၼႂ်းၸႄႈဝဵင်းၼမ်ႉတူႈ၊ ၸၢၵ်ႇမၢၵ်ႇတိူဝ်ႉၺႃး ၼၢင်းယိင်း 2ၵေႃႉ တၢႆၵေႃႉၼိုင်ႈလႄႈယူတ်းယႃတူဝ်ဝႆႉ ၵေႃႉၼိုင်ႈ ။
မိူဝ်ႈၼႆႉဝၼ်းတီႈ3/3/2021 ပၢင်တိုၵ်းပဵၼ်တီႈမၢၼ်ႈၸၢမ်ႁၢဝ်ႈႁႅင်း ။ မၢၵ်ႇလူင်တူၵ်းႁိမ်းမၼ်းၼၢင်းၽွင်းယူႇၼႂ်းသူၼ် ၸၢၵ်ႇမၢၵ်ႇတိူဝ်ႉၸႂ်ႇၼႃႈၽၢၵ်ႇလႄႈ ၸွမ်းတူဝ်။ ယၢမ်းလဵဝ်သူင်ႇယူတ်းယႃတူဝ်ဝႆႉတီႈႁူင်းယႃသိုၵ်း ဝဵင်းလႃႈသဵဝ်ႈ။
ၵူၼ်းမၢၼ်ႈၸၢမ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၸိုဝ်ႈမၼ်းႁွင်ႉဢေးၼၢင်း ပဵၼ်ၵူၼ်းဝၢၼ်ႈၼွင်ဢေႃႈ ဢိူင်ႇၼမ်ႉတွင်ႈၵူင်း ။ ဢႃယုတေမီးမွၵ်ႈ 35 ပီ။ မၢၵ်ႇတူၵ်းသႂ်ႇႁိမ်းမၼ်းၽွင်းမၼ်းၵဵပ်းမွၵ်ႇတီႈသူၼ် ။ ၸၢၵ်ႇမၢၵ်ႇတိူဝ်ႉသႂ်ႇႁူဝ်မၼ်းလႄႈတလဵဝ်ဢဝ်မႃးမီးဝႆႉတီႈႁူင်းယႃသိုၵ်းတီႈလႃႈသဵဝ်ႈၶႃႈ။ လႆႈမႆႈၸႂ်ဢေႃႈ ႁွႆးၸဵပ်းမၼ်း။ ”- ဝႃႈၼႆ။
ၸုမ်းဢူၺ်းလီပွတ်းႁွင်ႇ TNLA,SSPP တင်း RCSS ပဵၼ်ပၢင်တိုၵ်းၵၼ် ႁိမ်းမၢၼ်ႈၸၢမ် ႁၢဝ်ႈႁႅင်း တေႃႇထိုင်မိူဝ်ႈၼႆႉ သဵင်ၵွင်ႈတိုၵ်ႉတႅၵ်ႇယူႇ ဝႃႈၼႆ။
ဝၼ်းတီႈ 1/3/2021 ၼၼ်ႉၵေႃႈ ၼၢင်းယိင်း ဢႃယု 50 ပီၵေႃႉၼိုင်ႈ ၵူၼ်းမၢၼ်ႈၸၢမ် ၺႃးၸၢၵ်ႇမၢၵ်ႇလူင်တူၵ်းတႅၵ်ႇ သႂ်ႇတီႈၼႂ်းဝၢင်းႁိူၼ်းမၼ်းလႄႈလႆႈတိူဝ်ႉၺႃးမၢတ်ႇၸဵပ်း ႁၢဝ်ႈႁႅင်း ၼင်ႇၵဝ်ႇ။
လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ မၢၵ်ႇလူင် တူၵ်းတႅၵ်ႇသႂ်ႇ တိူဝ်ႉၺႃး ၸွမ်းတူဝ်မၼ်း။ မၢတ်ႇၸဵပ်း ႁၢဝ်ႈႁႅင်းသေ သူင်ႇယူတ်းယႃတူဝ်တီႈလႃႈသဵဝ်ႈ လႆႈၵႂႃႇလူႉသဵင်ႈ ၵႂႃႇတီႈႁူင်းယႃသိုၵ်းဝၼ်းၼၼ်ႉၵမ်းလဵဝ်”- ဝႃႈၼႆ။
သိုၵ်း 2-3 ၾၢႆႇၼႆႉၶဵင်ႈၶႅင်ၵၢၼ်သိုၵ်းတေႃႇၵၼ်မႃးၸဵမ်မိူဝ်ႈၵၢင်လိူၼ်ၾႅပ်ႉပိဝ်ႊရီႊပူၼ်ႉမႃးၼႆႉ။ ၵူၼ်းမိူင်းလႆႈပၢႆႈၽေးသိုၵ်း ယင်းပႆႇၸၢင်ႈပွၵ်ႈႁိူၼ်းၶိုၼ်း။
ၵူၼ်းပၢႆႈၽေးသိုၵ်း တီႈၼမ်ႉတူႈ ၵေႃႉၼိုင်ႈ လၢတ်ႈၼႄဝႃႈ – “ပၢင်တိုၵ်းၼႆႉ လႅပ်ႈတေႁိုင်ယူႇၶႃႈယူဝ်ႉ။ ယၢမ်းလဵဝ် သဵင် ၵွင်ႈ တိုၵ်ႉတႅၵ်ႇယူႇၶႃႈလူင် တၢင်းႁိမ်းမၢၼ်ႈၸၢမ်ၸိူဝ်းၼႆႉ။ တင်းသွင်ၾၢႆႇၵေႃႈ တိုၵ်ႉထႅမ်ႁႅင်းသိုၵ်း ၼင်ႇၵၼ်လူင်”- ဝႃႈၼႆ။
မိူဝ်ႈဝၼ်းတီႈ 27/2/2021 ယၢမ်းဝၢႆးဝၼ်းၼၼ်ႉၵေႃႈ မၢၵ်ႇလူင် တူၵ်းတႅၵ်ႇသႂ်ႇ တီႈႁိမ်းၵျွင်းၽြႃး မၢၼ်ႈၸၢမ် ၸၢၵ်ႇမၢၵ်ႇ သဵၼ်တိူဝ်ႉသႂ်ႇၸဝ်ႈပူႇတူၼ်ၼိုင်ႈ သူင်ႇယူတ်း ယႃတူဝ်ဝႆႉတီႈလႃႈသဵဝ်ႈ ဝႃႈၼႆ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈၼမ်ႉတူႈၼႆႉ တီႈၵျွင်းၶမ်းမုင်ႈသႃႇ မီးႁူဝ် ၵူၼ်း 100 ပၢႆ ဝတ်ႉပူၵ်ႉပႃႇရူင်ႇ သမ်ႉ မီး 73 ၵေႃႉ။ ယဝ်ႉၵေႃႈ ၵူၼ်းမၢၼ်ႈၸၢမ်၊ ၼွင်ဢေႃႈ လႄႈ ၸိူဝ်းယူႇႁိမ်းႁွမ်းမၢၼ်ႈၸၢမ် ၸိူဝ်းၼၼ်ႉ လႆႈဢွၼ်ၵၼ်ပၢႆႈၵႂႃႇ တၢင်းမိူင်းမူႉ၊ ဝၢၼ်ႈပၢင်လူင်လႄႈ ဝဵင်းသီႇပေႃႉ ၸိူဝ်းၼႆႉဝႆႉ ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈ ၵျွင်းၶမ်းမုင်ႈသႃႇသမ်ႉ ပဵၼ်ၵူၼ်းဝၢၼ်ႈၼႃးၵႄး၊ ၵုၼ်ၵျွင်း၊ ပဵင်းလူင် လႄႈ ၼႃးၵႅင်း။ တီႈဝတ်ႉပူပ်ႉပႃႇရူင်ႇသမ်ႉ ပဵၼ်ၵူၼ်းမၢၼ်ႈဝႃႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ