ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉ/ ၵျွင်းၶမ်းမုင်ႈသႃႇ တင်း ဝတ်ႉပူပ်ႉပႃႇရူင်ႇ ႁူဝ်ၵူၼ်း 150 ပၢႆ လူဝ်ႇတၢင်းၸွႆႈထႅမ်ၶဝ်ႈၼမ်ႉတၢင်းၵိၼ် ႁၢဝ်ႈႁႅင်း ။
ဝၼ်းတီႈ 28/2/2021 ၸုမ်းဢူၺ်းလီပွတ်းႁွင်ႇ TNLA, SSPP တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်းၼႂ်းဢိူင်ႇမၢၼ်ႈၸၢမ်၊ ၵူၼ်းဝၢၼ်ႈ ပွၵ်ႉႁွင်ႇ တင်း ပွၵ်ႉၸၢၼ်း ၵႂႃႇ သွၼ်ႈဝႆႉတၢင်းမိူင်းမူႉ၊ ပၢင်ႇလူင် လႄႈတၢင်းၸႄႈဝဵင်းသီႇပေႃႉ ၸိူဝ်းၼႆႉ ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “မိူဝ်ႈဝႃးၼႆႉ ၵူၼ်း မၢၼ်ႈၸၢမ် ဢွၼ်ၵၼ်ပႆႈဢွၵ်ႇမႃး မူတ်းၶႃႈယဝ်ႉ။ ဢၼ်ပၢႆႈၵႂႃႇတၢင်းသီႇပေႃႉၵေႃႈမီး၊ မိူင်းမူႉၵေႃႈမီး ပၢင်လူင်ၵေႃႈမီး ၶႃႈယဝ်ႉ။ တေႃႇထိုင်ယၢမ်းလဵဝ် ပႆႇလႆႈႁပ်ႉသဵၼ်ႈမၢႆ ဝႃႈတင်းမူတ်းလႆႈပၢႆႈၵႂႃႇမီးၵႃႈႁိုဝ် ၼႆၸိူဝ်းၼႆႉ”- ဝႃႈၼႆ။
ယၢမ်းလဵဝ် ဢၼ်ပၢႆႈမႃးသွၼ်ႈဝႆႉတီႈၵျွင်းၶမ်းမုင်ႈသႃႇသမ်ႉ ပဵၼ်ၵူၼ်း ဝၢၼ်ႈၼႃးၵႄး၊ ၵုၼ်ၵျွင်း၊ ပဵင်းလူင်လႄႈ ၼႃးၵႅင်း ၸိူဝ်းၼႆႉ ႁူဝ်ၵူၼ်းတေမီး 70 ပၢႆ။ တီႈ ဝတ်ႉပူပ်ႉပႃႇရူင်ႇသမ်ႉ ပဵၼ်ၵူၼ်းမၢၼ်ႈဝႃႈ ႁူဝ်ၵူၼ်း တေမီး 70 ပၢႆ။
“ယၢမ်းလဵဝ် ၵူၼ်းပၢႆႈၽေး တီႈၼမ်ႉတူႈၼႆႉ လူဝ်ႇတၢင်းၸွႆႈထႅမ်ၶဝ်ႈၼမ်ႉ တၢင်းၵိၼ်ႁႅင်းၶႃႈဢေႃႈ။ ဢၼ်ပၢႆႈမႃး မႂ်ႇၵေႃႈမီးထႅင်ႈလႄႈ လွင်ႈၼုင်ႈဝႂ်တႄႉ ဢမ်ႇပေႃးလူဝ်ႇၶႃႈ ဢၼ်လူဝ်ႇႁႅင်းတီႈသုတ်းၼႆႉ ပဵၼ်ၶွင်ၵိၼ်ယႅမ်ႉၶႃႈယဝ်ႉ”- လုင်းၸၢႆးပႃႉၺၢၼ်ႇ သိုပ်ႇလၢတ်ႈၼႄၼင်ႇၼႆ။
မိူဝ်ႈ ဝၼ်းတီႈ 28/2/2021 ယၢမ်းၵၢင်ဝၼ်းမွၵ်ႈ 12 မူင်းၼႆႉ မၢၵ်ႇလူင် တူၵ်းသႂ်ႇ တီႈၶွၵ်ႈမူ ၼႂ်းဝၢင်းႁိူၼ်း ၵူၼ်းမၢၼ်ႈ ၸၢမ် လုၵ်ႈၼိုင်ႈ ။ မူတၢႆ 4 တူဝ်၊ ၶဝ်ႈၵၢပ်ႇ လႄႈ ၽိူင်း ၾႆးမႆႈမူတ်း။ ၸၢၵ်ႇမၢၵ်ႇၺႃးၵႂၢႆးတၢႆ 2 တူဝ်လႄႈ မႃ 1 တူဝ် ၼႆယဝ်ႉ။
မိူဝ်ႈဝၼ်းတီႈ 27/2/2021 ယၢမ်းဝၢႆးဝၼ်းၼၼ်ႉၵေႃႈ မၢၵ်ႇလူင် တူၵ်းတႅၵ်ႇသႂ်ႇ တီႈႁိမ်းၵျွင်းၽြႃး မၢၼ်ႈၸၢမ် ၸၢၵ်ႇမၢၵ်ႇ သဵၼ်တိူဝ်ႉသႂ်ႇ တီႈတိၼ်တင်းၵွင်းလင်ၸဝ်ႈပူႇ ၸဝ်ႈၼိုင်ႈ လႆႈတိူဝ်ႉၺႃးမၢၵ်ႇၸဵပ်းသေ သူင်ႇယူတ်းယႃဝႆႉတီႈမၢၼ်ႈၸၢမ် ဝႃႈၼႆ။
တႄႇဢဝ်ႁူဝ်လိူၼ်ၾႅပ်ႊၿိဝ်ႊရီႊ 2021 ဝၢႆးသေသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းၼႆႉမႃး ၸုမ်းဢူၺ်းလီ ပွတ်းႁွင်ႇ TNLA,SSPP တင်း RCSS ပဵၼ်ပၢင်တိုၵ်းၵၼ်မႃး တင်းၵျွၵ်ႉမႄး၊ သီႇပေႃႉ၊ ၼမ်ႉတူႈ ၸိူဝ်းၼႆႉ။
