ဝၼ်းတီႈ 28/2/2021 ယၢမ်းၵၢင်ဝၼ်း မွၵ်ႈ 12 မူင်း မၢၵ်ႇလူင်လုၵ်ႈၼိုင်ႈ တူၵ်းတႅၵ်ႇ သႂ်ႇၼႂ်းဝၢင်းႁိူၼ်းယေးၵူၼ်း ဝၢၼ်ႈ တီႈမၢၼ်ႈၸၢမ် ပွၵ်ႉႁွင်ႇ ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉသိုၵ်း TNLA, SSPP တင်း RCSS ပိုတ်းယိုဝ်းၵၼ် ႁၢဝ်ႈႁႅင်း ၼႆယဝ်ႉ။
ၵူၼ်းမၢၼ်ႈၸၢမ် ၵေႃႉၼိုင်ႈ လၢတ်ႈဝႃႈ – “ ယၢမ်းၵၢင်ဝၼ်း မွၵ်ႈ 12 မူင်း မၢၵ်ႇလူင်တူၵ်းသႂ်ႇတီႈၶွၵ်ႈမူ၊ ၶွၵ်ႈဝူဝ်း တီႈၼၼ်ႈသမ်ႉမီးၽိူင်းလႄႈ သိုင်ႇၶဝ်ႈၵၢပ်ႇ ။ တူၵ်းတႅၵ်ႇလုၵ်ႈၼိုင်ႈ ပဵၼ်ၾႆး လၢမ်းမႆႈၶႃႈ ဢေႃႈ”- ဝႃႈၼႆ။
ဢိင်ၼိူဝ်လွင်ႈၼႆႉ မူတၢႆ 4 တူဝ်၊ ၵႂၢႆးတၢႆ 2 တူဝ်လႄႈ မႃတၢႆ 1 တူဝ် ၼႆယဝ်ႉ။
“ယၢမ်းလဵဝ်ၼႆႉ ပဵၼ်ၽွင်းမၼ်းၶႃႈယဝ်ႉ သဵင်ၵွင်ႈသဵင်မၢၵ်ႇပႆႇယဵၼ် ႁဝ်းၶႃႈ ၵူၼ်းမၢၼ်ႈၸၢမ် လႆႈဢွၼ်ၵၼ်ၽူင်ႉပၢႆႈ ဢွၵ်ႇမႃးၶႃႈဢေႃႈ၊ ပၢင်တိုၵ်းၼႆႉ ၶႂ်ႈဝႃႈ ပဵၼ်ၵူႈဝၼ်းၶႃႈယဝ်ႉ တပ်ႉပွင်းၸူႉ တင်း RCSS ၶႃႈဢေႃႈ”- ၵူၼ်းမၢၼ်ႈၸၢမ် ၵေႃႉၼိုင်ႈ လၢတ်ႈၼႄၼင်ႇၼႆ။
ဝၼ်းတီႈ 27/2/2021 ၵေႃႈမၢၵ်ႇလူင်တူၵ်းသႂ်ႇတႅၵ်ႇလုၵ်ႈၼိုင်ႈ တီႈႁိမ်းၵျွင်းၽြႃး မၢၼ်ႈၸၢမ် ၸၢၵ်ႇမၢၵ်ႇသဵၼ်တိူဝ်ႉ သႂ်ႇ တီႈတိၼ်တင်းၵွင်းလင်ၸဝ်ႈပူႇ ၸဝ်ႈၼိုင်ႈ လႆႈတိူဝ်ႉၺႃးမၢၵ်ႇၸဵပ်းသေ သူင်ႇယူတ်းယႃဝႆႉတီႈမၢၼ်ႈၸၢမ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ