ၵူၼ်းဝၢၼ်ႈၵူၼ်းသူၼ် ၼပ်ႉႁူဝ်ပၢၵ်ႇ ဢၼ်ပၢႆႈၽေးသိုၵ်း မႃးမီးဝႆႉယူႇ ၼႂ်းၸႄႈဝဵင်းၼမ်ႉတူႈ ၼၼ်ႉ ယၢပ်ႇၽိုတ်ႇ တႃႇၵိၼ်တႃႇယမ်ႉ၊ ယၢပ်ႇၽိုတ်ႇ ၽႃႈႁူမ်ႇၶူဝ်းၼွၼ်း ပဵၼ်ၸဵမ် ၶူဝ်းၶွင်ဢၼ်ၼၢင်းယိင်းလူဝ်ႇၸႂ်ႉလူဝ်ႇသွႆ။

ၸုမ်းဢူၺ်းလီပွတ်းႁွင်ႇ တင်း သိုၵ်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ် ပိုတ်းယိုဝ်းတိုၵ်းတေႃးၵၼ်လႄႈ မိူဝ်ႈဝၼ်းတီႈ 18/2/2021 ၼႆႉ ၵူၼ်းဝၢၼ်ႈဝႃႈ၊ ၼမ်ႉတွင်ႇၵုင်း လႄႈ ဝၢၼ်ႈလွႆဝဵင်း ႁူဝ်ၵူၼ်း 165 ၵေႃႉ ပၢႆႈၽေးသိုၵ်း မႃးယူႇတီႈ ဝတ်ႉပူပ်ႉပႃႇရူင်ႇ ဝဵင်းၼမ်ႉတူႈ။ ၵူၼ်းဝၢၼ်ႈ – ဝၢၼ်ႈၵုၼ်ၵျွင်း၊ ဝၢၼ်ႈၼႃးၵေး၊ ၼႃးၵႅင်း၊ ၼမ်ႉပၢႆႇ၊ ပဵင်းလူင် ႁူမ်ႈၵၼ် တင်းမူတ်းတေမီးမွၵ်ႈ 200 ပၢႆ သမ်ႉ ပၢႆႈမႃးယူႇတီႈ ဝိႁၢရ် ၵျွင်းႁွင်ႇ မၢၼ်ႈၸၢမ် ။

လုင်းပႃႉၺၢၼ်ႇ ၵႅမ်ႁူဝ်ပဝ်ႈၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ဢၼ်မႃးထႅင်ႈ165 ၵေႃႉ။ ပေႃးၼပ်ႉပႃး ဢၼ်ပၢႆႈမႃး ၵမ်းဢွၼ်တၢင်း တႄႉ ႁူမ်ႈၵၼ် တေမီး 300 ၼႆႉ။ လွင်ႈၶဝ်ႈၼမ်ႉ တင်းၵိၼ် တီႈဝတ်ႉပူပ်ႇ ပႃႇရူင်ႇၼႆႉ ၵုမ်ႇတႃႇၵူၼ်းပၢႆႈၽေး မွၵ်ႈ 2-3 ဝၼ်းၼႆႉ ၵူၺ်းၶႃႈယဝ်ႉ။ ယၢမ်းလဵဝ် ဢၼ်လူဝ်ႇႁႅင်းတႄႉ ၶဝ်ႈၼမ်ႉတၢင်းၵိၼ် ယဝ်ႉၵေႃႈ ၶိူင်ႈၸႂ်ႉသွႆ ၽွင်သၵ်းၶူဝ်း သပျႃႇဢၢပ်ႇ ၼမ်ႉ ၸိူဝ်းၼႆႉၵေႃႈလူဝ်ႇ”– ဝႃႈၼႆ။

ယၢမ်းလဵဝ် ၸုမ်းဢူၺ်းလီသိုၵ်းပွတ်းႁွင်ႇ (တပ်ႉသိုၵ်း SSPP , TNLA ) တင်း သိုၵ်း RCSS ၶဵင်ႈၵၢၼ်သိုၵ်းတေႃႇၵၼ်၊ လေႃႇတိုၵ်းပိုတ်းယိုဝ်းၵၼ် တၢင်းထုင်ႉလွႆႁၢင်း ပွတ်းဢိူင်ႇ ပၢင်ၶႅမ်၊ မၢၼ်ႈၸၢမ်၊ လွႆတေး၊ တင်း ဢိူင်ႇၼမ်ႉတွင်ႈၵူင်း လႄႈ ႁဵတ်းႁႂ်ႈၵူၼ်းဝၢၼ်ႈ ၵူၼ်းမိူင်းလႆႈပၢႆႈယၢၼ်ႁိူၼ်းယေးတီႈယူႇ။

“ပၢင်တိုၵ်းၼႆႉလႅပ်ႈတေပဵၼ် ထႅင်ႈယူႇၶႃႈ ၊ တင်းၾၢႆႇလႂ်ၵေႃႈ ဢမ်ႇထွႆ ဢမ်ႇထွၼ်၊ တိုၵ်ႉထႅမ်ႁႅင်း သိုၵ်းတေႃႇ ၵၼ်ယူႇဢေႃႈ” –  ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈၽႅဝ်ဝႆႉတီႈၼမ်ႉတူႈ လၢတ်ႈၼႄၼင်ႇၼႆ။

ယၢမ်းလဵဝ် တီႈၵျွၵ်ႉမႄး မီးၵူၼ်း ပၢႆႈၽေးသိုၵ်း ဢမ်ႇယွမ်း 800 ၵေႃႉ၊ တီႈၸႄႈဝဵင်းသီႇပေႃႉ ဢမ်ႇယွမ်း 200 ၵေႃႉ။  ပေႃးႁူမ်ႈၵၼ်တင်းမူတ်း ပႃးၼႂ်းၸႄႈဝဵင်းၼမ်ႉတူႈ ၸိုင် ၵူၼ်းမိူင်း မွၵ်ႈ 1,500 ၵေႃႉၼႆႉ လႆႈပၢႆႈၽေး တပ်ႉသိုၵ်း ၼႂ်းမိူင်းတႆး ၼင်ႇၵၼ်ယိုဝ်းၵၼ်။