ဢိင်ၼိူဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ်၊ သိုၵ်းၸၢဝ်းၶိူဝ်းလႄႈ သိုၵ်းမၢၼ်ႈ ပိုတ်းယိုဝ်းၵၼ်ႁၢဝ်ႈႁႅင်း ၼႂ်းမိူင်းတႆးပွတ်းႁွင်ႇ 3 ၸႄႈဝဵင်းသေ ယၢမ်းလဵဝ် ၵူၼ်းမိူင်းပိုၼ်ႉတီႈ လႆႈပၢႆႈၽေးသိုၵ်း ဢမ်ႇယွမ်းႁဵင်ယဝ်ႉဝႃႈၼႆ။

တႄႇဢဝ်ႁူဝ်လိူၼ်ၾႅပ်ႊၿိဝ်ႊရီႊၼႆႉမႃး တေႃႇထိုင်ယၢမ်းလဵဝ် ၸုမ်းဢူၺ်းလီ ပွတ်းႁွင်ႇ TNLA, SSPP သိုၵ်းမၢၼ်ႈလႄႈ RCSS ပဵၼ်ပၢင်တိုၵ်းၵၼ် တၢင်းၸႄႈဝဵင်းၵျွၵ်ႉမႄး၊ ၸႄႈဝဵင်းသီႇပေႃႉ လႄႈ ၸႄႈဝဵင်းၼမ်ႉတူႈ ၼႂ်းၸိုင်ႈတႆးပွတ်းႁွင်ႇ 3 ၸႄႈဝဵင်းၼႆႉသေ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ လႆႈဢွၼ်ၵၼ်ပၢႆႈယၢၼ်ႁိူၼ်းယေး တီႈယူႇတၼ်းသဝ်းၵၼ် ဢမ်ႇယွမ်း ႁဵင် ၼႆယဝ်ႉ။

လုင်းပႃႉၺၢၼ်ႇ ၵႅမ်ႁူဝ်ပဝ်ႈ ၶွမ်ႊမတီႊၸွႆႈထႅမ်ၵူၼ်းပၢႆႈၽေးသိုၵ်း တီႈၼမ်ႉတူႈ လၢတ်ႈဝႃႈ – “ယၢမ်းလဵဝ် တီႈၼမ်ႉတူႈ ႁဝ်းၶႃႈၼႆႉ တီႈၵျွင်းႁွင်ႇမၢၼ်ႈၸၢမ် တင်း ဝတ်ႉပူပ်ႉပႃႇရူင်ႇ သွင်တီႈႁူမ်ႈၵၼ် တေမီး 340 ပၢႆၼႆႉ”- ဝႃႈၼႆ။

တီႈၵူၼ်းပၢႆႈၽေးသိုၵ်း တီႈဝတ်ႉပုပ်ႉပႃႇရူင်ႇတႄႉ ယၢမ်းလဵဝ် လူဝ်ႇတၢင်း ၸွႆႈထႅမ် လွင်ႈၵိၼ်ယႅမ်ႉ ႁၢဝ်ႈႁႅင်း ယွၼ်ႉဝႃႈ ၶွင် ၵိၼ်ယႅမ်ႉတႃႇတေ လဵင်ႉၵၼ်ၵႂႃႇၵူႈဝၼ်းၼၼ်ႉ ဢမ်ႇပေႃးၵိုတ်းလိူဝ်သင်ၼမ်လႆႈႁူႉၼင်ႇၼႆ။

“ယၢမ်းလဵဝ် တီႈၵူၼ်းပၢႆႈၽေးႁဝ်းၶႃႈ ဝတ်ႉပူပ်ႉပႃႇရူင်ႇၼႆႉ လူဝ်ႇတၢင်းၸွႆႈထႅမ် တင်းၼမ်ၶႃႈယဝ်ႉ။ မိူဝ်ႈလဵဝ် ၵိုတ်းဝႆႉ ၶဝ်ႈ သၢၼ် ထႅင်ႈ 7 ထူင် ၵႃႈၼႆႉၵူၺ်း ၼိုင်ႈဝၼ်းသမ်ႉ လႆႈႁုင် 1 ထူင်ပၢႆ ယဝ်ႉၵေႃႈ ၼမ်ႉမၼ်း၊ ႁူဝ်မီႇလႅင်၊ ႁူဝ်မီႇၶၢဝ်၊ ၵိူဝ်၊ ၽွင်ဝၢၼ် ၸိူဝ်းၼႆႉၵေႃႈ တေမူတ်းယဝ်ႉ လူဝ်ႇတၢင်းၸွႆႈထႅမ်ၼမ်ၶႃႈဢေႃႈ။ ပေႃးၶၢဝ်းတၢင်း 2-3 ဝၼ်းတႄႉ တေလဵင်ႉ ၵၼ် ၵုမ်ႇထူၼ်ႈယူႇ ပေႃးလိူဝ်ၼၼ်ႉၵႂႃႇတႄႉ တေဢမ်ႇၵုမ်းၵၼ်လႆႈယဝ်ႉ၊ တီႈမၢၼ်ႈၸၢမ်တႄႉ ယွၼ်ႉမီးဝႆႉတၢင်း ၵိၼ်ဢၼ် ၵဝ်ႇယူႇလႄႈ တီႈၼၼ်ႈတႄႉ ဢမ်ႇပေႃးမႆႈၸႂ်ၶႃႈ”- လုင်းပႃႉၺၢၼ်ႇ သိုပ်ႇလၢတ်ႈၼႄၼင်ႇၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃး တီႈၵျွင်းႁွင်ႇမၢၼ်ႈၸၢမ်သမ်ႉ ပဵၼ်ၵူၼ်းဝၢၼ်ႈ ၼမ်ႉပၢႆႇ လင်ႁိူၼ်း 12 လင် ၸၢႆး 15 ၵေႃႉ၊ ယိင်း 21 ၵေႃႉ။ ဝၢၼ်ႈၵုၼ်ၵျွင်း လင်ႁိူၼ်း 4 လင်၊ ၸၢႆး 5 ၵေႃႉ ယိင်း 11 ၵေႃႉ။ ဝၢၼ်ႈၼႃးၵေး ၸၢႆး 24 ၵေႃႉ ယိင်း 10 ၵေႃႉ လင်ႁိူၼ်း 15 လင်။ ဝဵင်းပဵင်းလူင် လင်ႁိူၼ်း 12 လင် ၸၢႆး 24 ၵေႃႉ ယိင်း 40 ၵေႃႉလႄႈ ဝၢၼ်ႈၼႃးၵႅင်းသမ်ႉ လင်ႁိူၼ်း 28 လင် ၸၢႆး 30 ၵေႃႉ ယိင်း 56 ၵေႃႉ ၼႆယဝ်ႉ။

တီႈဝတ်ႉပူပ်ႉပႃႇရူင်ႇသမ်ႉ ပဵၼ်ၵူၼ်းဝၢၼ်ႈဝႃႈ လင်ႁိူၼ်း 19 လင် ၸၢႆး 25 ၵေႃႉ၊ ယိင်း 30 ၵေႃႉ။ ဝၢၼ်ႈၼမ်ႉတွင်ႇၵုင်း ၸၢႆး 28 ၵေႃႉ၊ ယိင်း 30 ၵေႃႉလႄႈ ဝၢၼ်ႈလွႆဝဵင်း လင်ႁိူၼ်း 30 လင်၊ ၸၢႆး 28 ၵေႃႉ ယိင်း 30 ၵေႃႉ ၼႆယဝ်ႉ။

ၼွၵ်ႈလိူဝ်ၼၼ်ႉ တီႈၸႄႈဝဵင်းသီႇပေႃႉၵေႃႈ ၵူၼ်းပၢႆႈၽေးသိုၵ်း ဢမ်ႇယွမ်း 200 ၵေႃႉ လႆႈဢွၼ်ၵၼ်ပၢႆႈၽေးသိုၵ်းဝႆႉ။

ၵူဝ်ႇမဵဝ်း ၽူႈၸွႆႈထႅမ်တူင်ႇဝူင်းၵူၼ်း သီႇပေႃႉ လၢတ်ႈဝႃႈ – “တီႈဝတ်ႉၼွင်ၵေႃႈ ႁဝ်း ၶႃႈတႄႉ ယၢမ်းလဵဝ် ၵူၼ်းပၢႆႈၽေး သိုၵ်း မီး 147 ၵေႃႉဝႆႉ။ တိုၵ်ႉပၢႆႈမႃး ၼႂ်းဝၼ်းသွင် ဝၼ်းၼႆႉ”- ဝႃႈၼႆ။

မိူဝ်ႈဝၼ်းတီႈ 9 -10/2/2021 ၼၼ်ႉၵေႃႈ ယွၼ်ႉသိုၵ်း RCSS တင်း SSPP သွင်ၸုမ်း ပိုတ်းယိုဝ်းၵၼ်သေ ၵူၼ်းဝၢၼ်ႈပၢင် ၶႃး၊ ၼႃးယၢဝ် ႁူဝ်ၵူၼ်း 100 ပၢႆ လႆႈဢွၼ်ၵၼ် ပၢႆႈမႃးတၢင်းၼႂ်းဢိူင်ႇမိူင်းတုင် ၼႆယဝ်ႉ။

တၢင်းၸႄႈဝဵင်းၵျွၵ်ႉမႄးၵေႃႈ မိူၼ်ၵၼ် ယၢမ်းလဵဝ် မီးၵူၼ်းပၢႆႈၽေးသိုၵ်း ဢမ်ႇ ယွမ်း 500 ၵေႃႉယဝ်ႉ ဝႃႈၼႆ။

ၽူႈၸွႆႈထႅမ် ၸုမ်းတူင်ႇဝူင်းတႆး ၶႅၵ်ႇလီပၢင်ၸႃႉ တီႈၵျွၵ်ႉမႄး ၵေႃႉၼိုင်ႈလၢတ်ႈဝႃႈ -“ မိူဝ်ႈၼႆႉ ပၢင်တိုၵ်းပဵၼ်ႁႅင်းၶႃႈဢေႃႈ ပဵၼ်ႁိမ်းဝၢၼ်ႈ ၼႂ်းဢိူင်ႇတေႃႉသၢင်ႇၵူၺ်းၶႃႈ ယၢမ်းလဵဝ် ၵူၼ်းပၢႆႈၽေး ပၢႆႈဢွၵ်ႇမႃး တင်းၼမ်ၶႃႈဢေႃႈ ၵမ်ႈၼမ် ပဵၼ် ၵူၼ်းထဝ်ႈ မိူဝ်ႈလဵဝ် တီႈၵျွၵ်ႉမႄး ႁဝ်းၶႃႈၼႆႉ ႁူဝ်ၵူၼ်း ဢမ်ႇယွမ်း 500 ၵေႃႉၼႆႉယဝ်ႉ”- ဝႃႈ ၼႆ။ ၵူၼ်းပၢႆႈၽေး တီႈၸႄႈဝဵင်းၵျွၵ်ႉမႄးၼႆႉ ၵမ်ႈၼမ် တေပၢႆႈမႃးသွၼ်ႈဝႆႉတီႈ ၵျွင်းပၢင်ၸၢမ်၊ၵျွင်း ၵၢင်ႉၵၢင် ၵမ်ႈၽွင်ႈ ၸိူဝ်းမီးပီႈၼွင်ႉၼႂ်းဝဵင်းသမ်ႉ ပၢႆႈၶဝ်ႈဝဵင်း ၵေႃႈမီးတင်းၼမ် ၼႆယဝ်ႉ။