ပၢင်တိုၵ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ပိုတ်းယိုဝ်းၵၼ် ႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄး ၵူၼ်းမိူင်းၺႃးၸၢၵ်ႇ ၸွမ်း ၼႂ်းပၢင်တိုၵ်း တၢႆ 4 မၢတ်ႇ 9 ၵေႃႉ ဝႃႈၼႆ။
တႄႇဢဝ် ဝၼ်းတီႈ 13/2/2021 ၼၼ်ႉမႃး တေႃႇထိုင် ဝၼ်းတီႈ 16/2/2021 သိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ TNLA, SSPP ပဵၼ်ပၢင်တိုၵ်းၵၼ် ႁၢဝ်ႈႁႅင်း တၢင်းပွတ်းဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူၼ်းမိူင်း ပိုၼ်ႉတီႈ ၺႃးၸၢၵ်ႇၸွမ်း ၼႂ်းပၢင်တိုၵ်း ။
ၽူႈၸွႆႈထႅမ်ၶႅၵ်ႇလီပၢင်ၸႃႉ ၼႂ်းၵျွၵ်ႉမႄး လၢတ်ႈဝႃႈ – “ၼႂ်းၸူဝ်ႈပၢင်တိုၵ်းႁၢဝ်ႈႁႅင်းမႃးၼႆႉ ၵူၼ်းမိူင်း ၺႃးၸၢၵ်ႇၸွမ်း ၼႂ်း ပၢင်တိုၵ်း လူႉတၢႆ 4 ၵေႃႉ၊ မၢတ်ႇၸဵပ်း 9 ၵေႃႉ။ ၵူၼ်းလူႉတၢႆ 4 ၵေႃႉၼၼ်ႉ ပဵၼ် မႄႈယိင်း 2 ၵေႃႉၵူၼ်းၸၢႆး 2 ၵေႃႉ၊ ပႃးမႄႈမၢၼ်း 1 ၵေႃႉ ပဵၼ်ၵူၼ်းဝၢၼ်ႈၵွင်းလွင်းဝွင်း”- ဝႃႈၼႆ။
လိူဝ်ၼၼ်ႉ ၼႂ်းဢိူင်ႇတေႃႉသၢင်ႇၼႆႉၵူၺ်း ၵူၼ်းမိူင်းၺႃးၸၢၵ်ႇမၢၵ်ႇ မီးလွင်ႈမၢတ်ႇၸဵပ်း တင်းမူတ်း 9 ၵေႃႉ ဝႃႈၼႆ။
“ၼႂ်းၵူၼ်းမၢတ်ႇၸဵပ်း 9 ၵေႃႉၼၼ်ႉ တႃႇ 4 ၵေႃႉ မၢတ်ႇၸဵပ်းႁၢဝ်ႈႁႅင်း တိုၵ်ႉသိုပ်ႇယူတ်းယႃတူဝ်ဝႆႉတီႈ ဢိူင်ႇတေႃႉသၢင်ႇ ဝႆႉ။ တႃႇ 5 ၵေႃႉၼၼ်ႉသမ်ႉ မၢတ်ႇၸဵပ်း ဢိတ်းဢွတ်း ၵႂႃႇလႆႈ ပႆလႆႈ သိၵ်ႈတိူဝ်ႉဢွၵ်ႇလိူတ်ႈယၢင် ဢိတ်းဢွတ်းၵူၺ်း”- ဝႃႈ ၼႆ။
ၼႂ်းၵူၼ်းမိူင်း မၢတ်ႇၸဵပ်းၸွမ်း ပၢင်တိုၵ်းၼၼ်ႉ ပဵၼ်ၵူၼ်းဝၢၼ်ႈၵွင်းလွင်းဝွင်း၊ ဝၢၼ်ႈတွင်ႇပလူဝ်ႉလႄႈ ဝၢၼ်ႈပႃႇၶႃး ၸိူဝ်းၼႆႉ။
လိူဝ်ၼၼ်ႉ တီႈၸႄႈဝဵင်းၼမ်ႉတူႈၵေႃႈ မိူဝ်ႈဝၼ်းတီႈ 14/2/2021 ၼၼ်ႉ ၸၢႆးၼၼ်ႇတေႃး ဢႃယု 33 ပီ ၵူၼ်းဝၢၼ်ႈပဵင်း လူင် ဢိူင်ႇဝၢၼ်ႈၸၢမ် ၸႄႈဝဵင်းၼမ်ႉတူႈ တိူဝ်ႉၺႃးမၢၵ်ႇၵွင်ႈ တီႈတုမ်ႇၵူၼ်ႈ လႆႈသူင်ႇယူတ်းယႃတီႈလႃႈသဵဝ်ႈ ဝႃႈၼႆ။
ပၢင်တိုၵ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼင်ႇၵၼ်လႄႈသင် ၸၢဝ်းၶိူဝ်းတင်း သိုၵ်းမၢၼ်ႈ ၸိူဝ်းၼႆႉလႄႈသင် ဢၼ်ပဵၼ် တၢင်း ပွတ်းၵျွၵ်ႉမႄး သီႇပေႃႉ ၼမ်ႉတူႈ ၸိူဝ်းၼႆႉ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ လႆႈပၢႆႈယၢၼ်ႁိူၼ်း ဢမ်ႇယွမ်းႁဵင်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ