Friday, March 29, 2024

SSPP တင်း RCSS ယိုဝ်းၵၼ် ၼႂ်းၸႄႈဝဵင်းသီႇပေႃႉ ၾၢႆႇ RCSS တၢႆမၢတ်ႇၼမ်

Must read

သိုၵ်း SSPP တင်း RCSS ယိုဝ်းၵၼ် ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ႁၢဝ်ႈႁႅင်း ၾၢႆႇသိုၵ်း RCSS မီးၵူၼ်း တၢႆမၢတ်ႇ ၺႃးတီႉတူဝ်လိပ်းၵႂႃႇ လၢႆၵေႃႉ။

သိုၵ်း RCSS ဢၼ်ၺႃး SSPP တီႉ

ဝၼ်းတီႈ 16/2/2021 ၼႆႉ ႁွင်ႈၵၢၼ်ၾၢႆႇပိုၼ်ၽၢဝ်ႇ RCSS ပိုၼ်ၽၢဝ်ႇဝႃႈ မိူဝ်ႈ ဝၼ်းတီႈ 15 ယၢမ်းႁူဝ်ၶမ်ႈ 5 မူင်း သိုၵ်း SSPP ၶိုၼ်ႈလူမ်ႇယိုဝ်းတပ်ႉပၢင်သဝ်း (ၸူဝ်ႈၶၢဝ်း) ႁိမ်းဝၢၼ်ႈၵဵတ်းၽူၼ် ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ လႄႈ ၾၢႆႇ RCSS ႁႅင်းသိုၵ်း မွၵ်ႈ 20 ၼၼ်ႉ မီးလွင်ႈတၢႆမၢတ်ႇ ၺႃးတီႉၵႂႃႇလၢႆၵေႃႉ – ဝႃႈၼႆ။

- Subscription -

“သၽေႃးတြႃး ပၢင်တိုၵ်း ၼၼ်ႉ တိုၼ်းမီးၵူၼ်းတၢႆမၢတ်ႇယဝ်ႉ။ ႁဝ်းၶႃႈ ပဵၼ်မုၵ်ႉၸုမ်းယႂ်ႇ ႁဝ်းၶႃႈမီးမူႇပိူင် တႅၵ်ႇလႅင်းဢေႃႈ။ သိုၵ်းဢၼ် ယွမ်းၵၢၼ်ႉ ၼႃႈသိုၵ်းၼႆႉ ႁဝ်းၶႃႈ ဢမ်ႇလႃႈလီႁဵတ်း။ ဢၼ်တီႉလႆႈ မီးတူဝ်လိပ်း 9 ၵေႃႉ၊ တူဝ်တၢႆ 9 ၵေႃႉၶႃႈ။ ၸိူဝ်းၵိုတ်း ၸိူဝ်းၼႆႉ ႁဝ်းၶႃႈ တေမွၵ်ႇ ပေႃႈမႄႈ သင်ၶ ၵူၼ်းမိူင်း မႃးႁူပ်ႉႁၼ်ယူႇ” – ၼႆ ၽူႈၶၢၼ်ပၢၵ်ႇ တပ်ႉသိုၵ်း SSPP ၸဝ်ႈႁၢၼ် ၽူင်းႁၢၼ် လၢတ်ႈၼႄ ၼင်ႇၼႆ။

ပၼ်ႁႃ ဝူင်ႈၵၢင် သိုၵ်း RCSS တင်း SSPP ၼႆႉ – ၾၢႆႇသိုၵ်း RCSS ဝႃႈ ၼိူဝ်ၽႅၼ်ႇလိၼ် မိူင်းတႆး ၼႆႉ သိုၵ်း RCSS ၵႂႃႇမႃးလႆႈၵူႈတီႈ။ ၾၢႆႇ SSPP သမ်ႉဝႃႈ သိုၵ်း RCSS ပူၼ်ႉပႅၼ် တူင်ႉၼိုင် ၶဝ်ႈၼႂ်းပိုၼ်ႉတီႈ SSPP ၵုမ်းၵမ် – ၼႆသေ ပဵၼ်ပၼ်ႁႃ ၵၼ်မႃး ႁိမ်း 10 ပီ ၊ ဢုပ်ႇဢူဝ်းၵၼ်လၢႆၵမ်းၵေႃႈ ဢမ်ႇၶိုပ်ႈၼႃႈသင်မႃး။

သွင်ၾၢႆႇတႄႇယိုဝ်းၵၼ် မိူဝ်ႈၼႂ်းပီ 2017-18 ၊ ပီ 2019 ၵိုတ်းယဵၼ်ၵႂႃႇ ။ ထိုင်မႃး ႁၢင်ပီ 2020 တႄႇ ယိုဝ်းၵၼ်ၶိုၼ်း ၼႂ်းၸႄႈဝဵင်းၼမ်ႉတူႈ၊ သီႇပေႃႉ၊ ၵျွၵ်ႉမႄး ၸိူဝ်းၼႆႉ မႃးလၢႆလၢႆတီႈ။ သိုၵ်း SSPP ၼႆႉ ပဵၼ်ၸုမ်းဢူၺ်းလီသိုၵ်း ပွတ်းႁွင်ႇ 7 ၸုမ်း၊ သိုၵ်း RCSS သမ်ႉ ၶဝ်ႈပႃးၼႂ်း ၸုမ်း ယိပ်းၵွင်ႈၵၢင်ႇ ဢၼ်လူင်းလၢႆးမိုဝ်းၵိုတ်းတိူၵ်းတူဝ်ႈမိူင်း NCA သိပ်းၸုမ်း။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း