မိူဝ်ႈၼႆႉ ဝၼ်းတီႈ 10 လိူၼ်မၢတ်ႉၶျ် သိုၵ်းမၢၼ်ႈၸိူဝ်းတူင်ႉၼိုင် ပၼ်ႇၵၢၼ်ၽွင်းငမ်းယူႇၼႂ်းဝဵင်းၵျွၵ်ႉမႄး ၶဝ်ႈၵႂႃႇသွၵ်ႈႁႃတီႉၺွပ်း ၵူၼ်းႁဵတ်းၵၢၼ်ၵျႃႊၽျႅၼ်ႉ ၼႂ်းဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄးသေ ၵႂႃႇၽႃႇၺႃးသႂ်ႇ သၢႆသိုၵ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) ၵႄႈၵၢင်ဝၢၼ်ႈပုင်ႇဝူဝ်း တင်း ဝၢၼ်ႈလိူဝ်ႇလွႆ ၸႄႈဝဵင်းၵျွၵ်ႉမႄး မိူင်းတႆးပွတ်းႁွင်ႇ ။
ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵၢင်ၼႂ်ၼႆႉ သဵင်ၵွင်ႈတႅၵ်ႇၵမ်းၼိုင်ႈ။ သိုၵ်းမၢၼ်ႈ တင်း ၶူဝ်းၶဵဝ် (သိုၵ်းဝၢၼ်ႈႁႆး) ၶဝ်ယိုဝ်းၵၼ် တီႈႁိမ်း ၵူတ်ႉပႃႇႁဵဝ်ႈ ဝၢၼ်ႈလိူဝ်ႇလွႆၼၼ်ႉ။ ငိၼ်းဝႃႈ သိုၵ်းမၢၼ်ႈၶဝ်ႈၵႂႃႇသွၵ်ႈတဝ်ႁႃ ၵူၼ်းႁဵတ်းၵၢၼ်ၵျႃႊၽျႅၼ်ႉၼႆ။ သဵင်ၵွင်ႈတႅၵ်ႇ ဢမ်ႇတၼ်းႁိုင်ၼင်ႇၵဝ်ႇ” ဝႃႈၼႆ။
ဢွင်ႈတီႈသိုၵ်းမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး SSPP/SSA ယိုဝ်းၵၼ်ၼၼ်ႉ မီးၸဵင်ႇၸၢၼ်းဝၼ်းဢွၵ်ႇ ဝဵင်းၵျွၵ်ႉမႄး ႁၢင်ႇၵႆၵၼ်တင်းဝဵင်းမွၵ်ႈ 17 လၵ်း ပဵၼ်ၼႂ်းၵႄႈၵၢင်ဝၢၼ်ႈပုင်ႇဝူဝ်း တင်း ဝၢၼ်ႈလိူဝ်ႇလွႆ ဢိူင်ႇပုင်ႇဝူဝ်း ၸႄႈဝဵင်းၵျွၵ်ႉမႄး။
ယွၼ်ႉသဵင်ၵွင်ႈတႅၵ်ႇသေ ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ တူၵ်းၸႂ်တိုၼ်ႇသၢၼ်ႈၵႂႃႇယူႇၵမ်းၼိုင်ႈၼႆ ၵူၼ်းမိူင်းပိုၼ်ႉတီႈလၢတ်ႈ။
လႆႈႁူႉဝႃႈ သိုၵ်းမၢၼ်ႈ တင်း သိုၵ်းတႆး SSPP/SSA ယိုဝ်းၵၼ်ၼႂ်းထုင်ႉပုင်ႇဝူဝ်းၼႆႉ ႁိုင်မွၵ်ႈ 1 ၸူဝ်ႈမူင်းသေ သိုၵ်းမၢၼ်ႈလူႉတၢႆၵႂႃႇ ၼိုင်ႈၵေႃႉၵူၺ်းဢမ်ႇၵႃး ရူတ်ႉၵႃးဢၼ်သိုၵ်းမၢၼ်ႈၶီႇမႃးၼၼ်ႉၵေႃႈ လူႉၵွႆၵႂႃႇၸွမ်း ဝႃႈၼႆ။
ၵဵဝ်ႇၵပ်းလူၺ်ႈလွင်ႈၼႆႉသေ ၾၢႆႇသိုၵ်းမၢၼ်ႈ တင်း ၾၢႆႇပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) တႄႉ ပႆႇယိုၼ်ယၼ်ပိုၼ်ၽၢဝ်ႇဢွၵ်ႇမႃးသင်။ ႁဝ်းၶႃႈၸုမ်းၶၢဝ်ႇ ၽူႈတွႆႇႁွၵ်ႈ ၵပ်းသိုပ်ႇႁႃ ၽူႈၶၢၼ်ပၢၵ်ႇတင်းသွင်ၸုမ်းယူႇၵေႃႈပႆႇလႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ