ၵဵဝ်ႇလူၺ်ႈလွင်ႈႁဝ်း လႆႈလူႉလႅဝ်တူၵ်းသုမ်းမႃး လၢႆသိုပ်ႇလၢႆပၢၼ်ၼႂ်းပိုၼ်းၼၼ်ႉ ၵွပ်ႈပိူဝ်ႈပဵၼ်ယွၼ်ႉ “ၼမ်ႉၽိုင်ႈတႃးၶူမ်းလႅဝ်း” “ၼိူဝ်ႉၶႅဝ်းသဵပ်ႇပၢႆႁွၵ်ႇ” ပိူၼ်ႈလႄႈမိူဝ်ႈၵွၼ်ႇၵူႈပွၵ်ႈၼႆႉ ၵူၼ်းထဝ်ႈၶဝ်သမ်ႉ ပေႃးယၢမ်ႈဝႃႈ “ၶႄႇပၼ်လၢႆ-တႆးၵိၼ်တၢႆ” ၼႆမႃးယဝ်ႉ။ ယွၼ်ႉၼၼ်ႉသေ ၸိူဝ်ႉၸၢတ်ႈၸၢဝ်းၶိူဝ်းႁဝ်းလႆႈတႅၵ်ႇယၢႆႈ ပၢႆႈၶၢႆႉယၢႆႉၼီၽၢတ်ႇၽႄၵၼ် ဢမ်ႇမီးလွင်ႈပၼ်ႈၵႅၼ်ႇမၼ်ႈၵိုမ်း- လိုမ်းႁၢင်ႈလိုမ်းတူဝ်မႃး။
ယၢမ်းလဵဝ်သမ်ႉပဵၼ်ၵၢပ်ႈပၢၼ် “မၢၼ်ႈပၼ်လၢႆ-တႆးၵိၼ်တၢႆ” မႃးထႅင်ႈ၊ ၽႂ်ပၼ်လၢႆၵေႃႈ တႆးတေၵိၼ်တၢႆတိၵ်းတိၵ်းတႄႉ တေႁဵတ်းႁိုဝ်ၸၢင်ႈၶွၼ်ႈႁႅင်းၵၼ် ပဵၼ်ၵွၼ်ႈၵႅၼ်ႇယႂ်ႇလူင်လႆႈ မိူဝ်ႈလႂ်?၊ လိူဝ်ၸႂ်ၵူၼ်းဝၢၼ်ႈၵူၼ်းမိူင်းႁဝ်းၵူၺ်းယဝ်ႉ။
ၵမ်ႈၽွင်ႈဢၼ်တိုၵ်ႉလေးလႅမ်ႉ သူတ်ႉၵိၼ်ၼမ်ႉဝၢၼ်ၼမ်ႉၸဵမ်းဢၼ်မၢၼ်ႈပၼ်လၢႆၶဝ်ၸိူဝ်းၼၼ်ႉတေဝႃႈ –“မိူဝ်ႈလိၼ်ႉၸၢင်ႉမႅပ်ႈမႃး ႁႃးလူဝ်ႇဢႃႈႁပ်ႉဢဝ်”၊ ယွၼ်ႉပိူဝ်ႈယၢမ်းပိူၼ်ႈဢႃႈၼႆႉ ႁဝ်းသမ်ႉတုပ်ႇဢမ်ႇလႆႈ ၽွင်းတိုၵ်ႉမီးတိုဝ်ႉတၢင်းမၼ်းသေ ပိူၼ်ႈဢွၼ်ၵၼ်ၵၢတ်ႇၶုတ်ႇႁွပ်ႇၶုတ်ႈဢဝ်ၼႆႉ ႁဝ်းသမ်ႉတေယူႇသူႇသူႇႁင်းၵူၺ်းၵေႃႈ ႁူႉတေႁၢမ်းဢိုပ်းယဝ်ႉလၢႆၵူၺ်း။
ဢၼ် “မၢၼ်ႈပၼ်လၢႆ” သေ တွၼ်ႈတႃႇ ႁႂ်ႈမီးၽွၼ်းလီမၼ်းၼမ်ၵေႇၵႃႈႁိုဝ်ၼၼ်ႉ မီးတီႈႁဝ်းမေႃႁဵတ်းၵူၺ်း ႁူႉတေဝႃႈၼႆယူႇ။
ပေႃးၼၼ် ဢၼ်သိုၵ်းမၢၼ်ႈၶဝ်ႁဵတ်း တၢင်းႁၢႆႉၸႃႉပဵၼ်ၽီမရၼသႂ်ႇၵူၼ်းမိူင်းႁဝ်းမိူၼ်ၼင်ႇ-
- ၺွပ်းၶျေႃးႁၢပ်ႇၶူဝ်းပေႃႉထုပ်ႉပေႉၵိၼ်လူလၢႆၼၢင်းယိင်းမိူင်းႁဝ်း။
- သိမ်းဢဝ်ႁႆႈၼႃး သူၼ်လိၼ်ႁဝ်းယဝ်ႉ သမ်ႉၸႂ်ႉ ၽုၵ်ႇသွမ်ႈလုမ်းလႃးၵဵပ်းၵဵဝ်ႇပၼ်ၶဝ်ၶိုၼ်း။
- မႃးႁႃတဵၵ်းတဵင် ၶၢၼ်းယွၼ်း ႁုပ်ႈသိမ်းဢဝ်လၢႆ ၶူဝ်းၶွင်မူၵႆႇဝူဝ်းၵႂၢႆးၵူၼ်းမိူင်းၸိူဝ်းၼႆႉ-“ၸူမ်းဝၢၼ်ၵိၼ်တၢႆ” ၶဝ်ၸုမ်းလႂ်- သမ်ႉတေၸွႆႈထႅမ်ၵႅတ်ႇၶႄႁႄႉၵင်ႈပၼ်လႆႈ?။
ယွတ်ႈၵႅၼ်ႇ
15.1.1994
မၢႆ 116 ဝၼ်းဢင်းၵၢၼ်း လိူၼ်သီႇမႂ်ႇ 4 ၶမ်ႈ ပီႊတႆး 2088
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ