လုၵ်ႈဢွၼ်ႇလဵၵ်ႉ ႁႅင်းၵၢၼ်တႆးၵူၼ်းမိူင်းၵျွၵ်ႉမႄး ၸပ်းတၢင်းပဵၼ် ၸိူဝ်ႉမႅင်းၶဝ်ႈၼႂ်းသဵၼ်ႈလိူတ်ႈ (တိတ်ႇၶျိူဝ်ႉၼႂ်းၵသႄလိူတ်ႈ- ติดเชื้อในกระแสเลือด) သေ လႆႈၶဝ်ႈယူတ်းယႃ တူဝ်ဝႆႉတီႈႁူင်းယႃလႄႈ ယၢမ်းလဵဝ်လူဝ်ႇတၢင်းၸွႆႈထႅမ်ငိုၼ်းတွင်းယူႇ ဝႃႈၼႆ။

လုၵ်ႈဢွၼ်ႇၵေႃႉၼႆႉ ၸိုဝ်ႈႁွင်ႉၼွင်ႉၼမ်ႉထိပ်း(ႁိုဝ်) ၼွင်ႉ Lisa /လီသႃႉ တိုၵ်ႉမီးဢႃယု 5 ၶူပ်ႇ ပဵၼ်တၢင်းပဵၼ် ၼမ်ႉထူမ်ႈပွတ်ႇ၊ တပ်းၵႂ်ႈသေ ထိုင်တီႈၸိူဝ်ႉမႅင်းၶဝ်ႈထိုင်ၼႂ်းသဵၼ်ႈလိူတ်ႈ။

ပဵၼ်လုၵ်ႈယိင်း ၸၢႆးၵျေႃႇတဵင်း လႄႈ ၼၢင်းၶမ်းမူၼ်း (ႁွင်ႉ ) ၼၢင်းၼူၼ်း ပဵၼ်ၵူၼ်းဝၢၼ်ႈမွၵ်ႇငႃးၸၢင်ႉ ၊ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။ ယၢမ်းလဵဝ် ပဵၼ်ႁႅင်းၵၢၼ်ယၢၼ်မိူင်း ႁဵတ်းၵၢၼ်ဝႆႉယူႇတီႈ ဝဵင်းလူင်ၵုင်းထဵပ်ႈ ၸိုင်ႈထႆး ။

ၵေႃႉပဵၼ်ပေႃႈ ၼွင်ႉ Lisa /လီသႃႉ လၢတ်ႈၽူႈတွႆႇႁွၵ်ႈဝႃႈ -“ မိူဝ်ႈၽွင်းတႄႇပဵၼ်ၼၼ်ႉ ဢမ်ႇၾၢင်ႉမႅၼ်ႈၶႃႈ ။ မၼ်းဢမ်ႇၵိၼ်ၶဝ်ႈ ၵိၼ်ၼမ်ႉ ။ ယဝ်ႉၵေႃႈၶႂ်ႈၼွၼ်း တင်းဝၼ်း တင်းဝၼ်း ၊ လႆႈၵႂႃႇၶိုၼ်ႈႁူင်းယႃ 12 ဝၼ်းၶႃႈဢေႃႈ သဵင်ႈၵႂႃႇ ငိုၼ်း 1သႅၼ်6 မိုၼ်ႇ ဝၢတ်ႇ ၊ ထုၵ်ႇၼီႈဝႆႉ တီႈႁူင်းယႃဢေႃႈ ၊ ႁဝ်းၶႃႈ ပဵၼ်ႁႅင်းၵၢၼ်ၵူၺ်းၶႃႈလႄႈ ဢမ်ႇပွင်ပဵၼ်လႆႈလႄႈ – လႆႈလူင်းႁူင်းယႃႁေယဝ်ႉဢေႃႈ ”- ဝႃႈၼႆ ။

ၼွင်ႉ Lisa /လီသႃႉ ၼႆႉ ၾၢင်ႁၢင်ႈတၢင်းပဵၼ် ၸိူဝ်ႉမႅင်းၶဝ်ႈသဵၼ်ႈလိူတ်ႈ တႄႇဢွၵ်ႇမိူဝ်ႈ ၼႂ်းဝၼ်းတီႈ 30/4/2026 ။ ပေႃႈမႄႈဢဝ်ၵႂႃႇသူင်ႇႁူင်းယႃ- လႆႈယူတ်းယႃတူဝ်ႁိုင်ၼၢၼ်း 12 ဝၼ်း ထိုင်ဝၼ်းတီႈ 12/5/2026 ။

ယွၼ်ႉဢမ်ႇပွင်ပဵၼ်လႆႈၵႃႈယူတ်းယႃတူဝ်ယဝ်ႉလႄႈ ၸင်ႇယွၼ်းဢွၵ်ႇႁူင်းယႃသေ ပွၵ်ႈယူႇၶိုၼ်းႁိူၼ်း ၵိၼ်ယႃႈယႃဝႆႉၵူၺ်း ဝႃႈၼႆ။

ပေႃႈၼွင်ႉ Lisa /လီသႃႉ သိုပ်ႇလၢတ်ႈထႅင်ႈဝႃႈ -“ယႃမၼ်းၼႆႉတႃႇ 6 ပွၵ်ႈၼႆႉ မႅၼ်ႈယူႇ 54000 ဝၢတ်ႇ ၊ လႆႈသႂ်ႇယႃႁႅင်းၼႃႇၶႃႈ ၊ ယႃဢၼ်လႆႈၵိၼ်ၸိူဝ်းၼႆႉၵေႃႈႁႅင်းၼႃႇ ၊ ယွၼ်ႉဢမ်ႇမီးငိုၼ်းလႄႈ လႆႈလူင်းႁူင်းယႃဝႆႉဢေႃႈ ၊ မေႃယႃၶဝ်တႄႉပႆႇၶႂ်ႈပၼ်လူင်း ၊ လူဝ်ႇပႂ်ႉတူၺ်းငဝ်းလၢႆးတၢင်းပဵၼ်ၼႆဢေႃႈ ၊တၢင်းပဵၼ် တပ်းၼႆႉ ပႆႇႁၢႆၼႆဢေႃႈ။ ၵူၺ်းၵႃႈပေႃးယူႇတီႈႁူင်းယႃ တေလႆႈသဵင်ႈငိုၼ်း ၼိုင်ႈဝၼ်း 3 ႁဵင်ဝၢတ်ႇ ၊ သမ်ႉဢမ်ႇပၼ်လႆႈၵႃႈၸႂ်ႉၸၢႆမၼ်း”- ဝႃႈၼႆ ။

သင်ဝႃႈၽူႈမီးၸေႇတၼႃႇသႂ် ၼမ်ႉၸႂ်လီ ၶႂ်ႈၵမ်ႉၸွႆႈငိုၼ်းတွင်းတႃႇယူတ်းယႃ ၼွင်ႉ Lisa ၸိုင် ၵပ်းသိုပ်ႇလႆႈတွင်ႈထၢမ်လႆႈတီႈပေႃႈမႄႈလုၵ်ႈဢွၼ်ႇ မၢႆၾူၼ်း – 0634437198 သေ ဢုပ်ႇၵုမ်လၢတ်ႈတေႃႇၵမ်ႉၸွႆႈလႆႈၵမ်းသိုဝ်ႈ ဝႃႈၼႆၶႃႈဢေႃႈ ။

တၢင်းပဵၼ်ၸိူဝ်ႉမႅၼ်းၶဝ်ႈသဵၼ်ႈလိူတ်ႈဢၼ်ဝႃႈၼႆႉ တၢင်းၾၢႆႇပၢႆးယူႇလီႁွင်ႉဝႃႈ “ Sepsis” ။ ၾၢႆႇပၢႆးယူႇလီ မၵ်းမၼ်ႈဝႆႉပဵၼ်တၢင်းပဵၼ်ဢၼ်လီမႆႈၸႂ် ဢၼ်တၢႆငၢႆႈဢၼ်ၼိုင်ႈ (သင်ဝႃႈဢမ်ႇလႆႈႁပ်ႉလွင်ႈယူတ်းယႃတူဝ်ၵမ်းလဵဝ်)။

ပဵၼ်ယွၼ်ႉၸိူဝ်ႈမႅင်း ပႅတ်ႊထီႊရီႊယႃႊ ၊ မႅင်းဝၢႆႊရၢတ်ႉသ် လႄႈမႅင်းသႃး ဢၼ်မီးၼႂ်းတူဝ်ၼႂ်းၶိင်းသေတီႈတီႈ လၢမ်းၶဝ်ႈၵႂႃႇၸူးၼႂ်းသဵၼ်ႈလိူတ်ႈသေ လႆႈဝဵၼ်းၸွမ်းလိူတ်ႈ။ မႅင်း ဢၼ်ၼႆႉၵမ်ႈၼမ်တေလုၵ်ႉမႃးတီႈ တၢင်းပဵၼ် ပွတ်ႇၸဵပ်း၊ ႁူင်းယဵဝ်ႈၸဵပ်း ၊ သႆႈၸဵပ်း ဢမ်ႇၼၼ် ၸဵပ်းၼွၵ်ႈတူဝ်သေတီႈတီႈ ယႃဢမ်ႇႁၢႆၸိူဝ်းၼၼ်ႉ ။

ၾၢင်ႁၢင်ႈတၢင်းပဵၼ် တႄႉမိူၼ်ၼင်ႇ- ႁႅင်းလူမ်းမႆႈၼႂ်းတူဝ် တေသုင်ႁႅင်း ဢမ်ႇၼၼ် တႅမ်ႇႁႅင်း။ ႁူဝ်ၸႂ်တဵၼ်ႈဝႆး တဵၼ်ႈႁႅင်း (ၼမ်လိူဝ် 90 ၵမ်းတေႃႇၼိုင်ႈမိၼိတ်ႉ)၊ ႁိူဝ်ႉမွႆႈလိူဝ်ႁႅင်း၊ ၸႂ်ၶေႃးဢမ်ႇလီ – ၸႂ်လႅၵ်ႈလၢႆႈဝႆး ငဝ်မိုင် ဝူၼ်ႉၵႂင် လိုမ်းၼႃႈလိုမ်းလင် ဢမ်ႇၶႂ်ႈႁူႉတူဝ် သၼ်ႇသၼ်ႇသၢႆသၢႆ။ ႁႅင်းလိူတ်ႈတူၵ်းတႅမ်ႇ- မဝ်း တႃလပ်းသိင်ႇ ပဵၼ်လူမ်း။ ၼိူဝ်ႉၼင်ႁႅင်ႈ ၽိူၵ်ႇၸိူၼ်းပိူၼ်း ဢမ်ႇၼၼ် မီးမဵတ်ႉလႅင်လႅင်ဢွၵ်ႇမႃးၸွမ်းတူဝ် – ၶူမ်းၶူမ်းၵၢႆးၵၢႆး ။ ယဵဝ်ႈဢွၵ်ႇဢေႇႁႅင်း ၸဵမ်ၸိူဝ်းၼႆႉ။

ပေႃးပဵၼ်ၾၢင်ႁၢင်ႈၸိူဝ်းၼႆႉမႃး ႁႂ်ႈဢဝ်ၵႂႃႇႁႃမေႃယႃဝႆးဝႆး။ မေႃယႃတေလုတ်ႇဢဝ်လိူတ်ႈၵူၼ်းပဵၼ်ၵႂႃႇၵူတ်ႇထတ်းဝႃႈမၼ်းပဵၼ်မႅင်းပႅတ်ႊထီႊရီႊယႃႊသင်တႄႉတႄႉ ၼႆသေ ၸင်ႇပၼ်ယႃႈယႃမႃးၵိၼ်။

ၼင်ႇႁိုဝ်တေဢမ်ႇပဵၼ်တၢင်းပဵၼ်ဢၼ်ၼႆႉ လူဝ်ႇၵႆႉၵႆႉသုၵ်ႉလၢင်ႉမိုဝ်းႁႂ်ႈမူတ်းသႂ်၊ လုမ်းလႃးႁွႆးၸဵပ်းႁွႆးယဵၼ်း လီလီ – ဝႃႈၼႆ။