ဝၢႆးလင်သိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းမႃး တႄႇပီ 2021 ၼၼ်ႉ ႁူဝ်ၼပ်ႉလုၵ်ႈႁဵၼ်းၼႂ်းမိူင်းႁူမ်ႈတုမ်မၢၼ်ႈ ၸိူဝ်းၶၢႆႉၵႂႃႇၶိုၼ်ႈၸၼ်ႉၸွမ်တီႈၼႂ်းမိူင်းထႆး ၵိုင်ႉၵၢင်ႉပုင်ႈ ၶိုၼ်ႈမႃးႁႅင်းၼႆ ၽိုၼ်လိၵ်ႈ ၶူၼ်ႉၶႂႃႉ လွင်ႈႁႅင်းၵၢၼ်ယၢၼ်မိူင်းဢၼ်ၼိုင်ႈ ႁၢႆးငၢၼ်းဝႆႉၼင်ႇၼႆ။

ၼႂ်းၽိုၼ်လိၵ်ႈၶူၼ်ႉၶႂႃႉၼၼ်ႉလၢတ်ႈၼႄဝႆႉဝႃႈ – ၵွၼ်ႇၼႃႈသိုၵ်းမၢၼ်ႈ ပႆႇယိုတ်းဢႃႇၼႃႇၸိုင်ႈမိူင်းၼၼ်ႉ လုၵ်ႈႁဵၼ်းမိူင်းႁူမ်ႈတုမ်မၢၼ်ႈ ၸိူဝ်းၶဝ်ႈၵႂႃႇၶိုၼ်ႈၸၼ်ႉၸွမ် ၼႂ်းမိူင်းထႆး မီးမွၵ်ႈ 2800 ၵေႃႉၵူၺ်း၊ ၼႂ်းပီ 2024 ၼၼ်ႉ ပုင်ႈၶိုၼ်ႈသုင်မႃးထိုင် 12,000 ၵေႃႉ၊ ၶၢတ်ႈလၢမ်းဝႆႉဝႃႈ တေႃႇထိုင်ပီတေမႃးၼႆႉ ၸၢင်ႈၼမ်ၶိုၼ်ႈမႃး ထိုင် 17,000 ၵေႃႉ ဝႃႈၼႆ။

လုၵ်ႈႁဵၼ်းမိူင်းမၢၼ်ႈၼႆႉ ၵမ်ႈၼမ် တေဢွၼ်ၵၼ်ၶိုၼ်ႈၸၼ်ႉၸွမ်သုၼ်ႇလဵဝ် ၸိူဝ်းမီးဝႆႉႁိမ်းႁွမ်း ဝဵင်းလူင်ၵုင်းထဵပ်ႈ။ မိူဝ်ႈဢွၼ်တၢင်းတႄႉ ဢွၼ်ၵၼ်ၶိုၼ်ႈၸၼ်ႉၸွမ်ၸိုဝ်ႈသဵင်လိုဝ်းလင် ၶွင်လူင်ပွင်ၸိုင်ႈထႆး။

ၼႂ်းလုၵ်ႈႁဵၼ်းမိူင်းမၢၼ်ႈ ၸိူဝ်းၶၢႆႉၵႂႃႇၶိုၼ်ႈၸၼ်ႉၸွမ် ၼႂ်းမိူင်းထႆးၼၼ်ႉ မီးဝႆႉသၢမ်သႅၼ်း။ ၼိုင်ႈ – ပိူဝ်ႈတႃႇငိူင်ႉပၢႆႈလွင်ႈၵပ်ႉၵိၼ်းၵၢၼ်မိူင်း ဢၼ်ပဵၼ်မႃး ဝၢႆးလင်သိုၵ်းမၢၼ်ႈ ယိုတ်းဢႃႇၼႃႇ၊ သွင် – ယွၼ်ႉပၵ်းပိူင်ပၢႆးပၺ်ႇၺႃႇၼႂ်းမိူင်းလူႉၵွႆလႄႈ တႃႇလႆႈမီးသုၼ်ႇ သိုပ်ႇသွၼ်ႁဵၼ်းလိၵ်ႈလၢႆး၊ သၢမ် – ပိူဝ်ႈတႃႇငိူင်ႉဝႄႈ လွင်ႈသိုၵ်းမၢၼ်ႈၵဵပ်းသိုၵ်း ဝႃႈၼႆ။

လုၵ်ႈႁဵၼ်းၵမ်ႈၼမ်ၼႆႉ ပဵၼ်ၵူၼ်းၼုမ်ႇ သႅၼ်းဢႃယု မီးၼႂ်းၵႄႈ 18 ထိုင် 29 ပီ။

မိူင်းထႆးၼႆႉ ပဵၼ်မိူင်း ၵႃႈႁဵၼ်းသွၼ် လႄႈ ၵႃႈၸႂ်ႉၸၢႆႇ ထုၵ်ႇ/ပေႃး၊ ၶၵ်ႉတွၼ်ႈၵၢၼ်တၢင်ႇယိုၼ်ႈယွၼ်း ဝီႊသႃႊ ငၢႆႈလူမ်၊ လွင်ႈယူႇသဝ်းၾိင်ႈငႄႈၾိင်ႈထုင်းၸိူဝ်းၼႆႉၵေႃႈ ဢမ်ႇပေႃးမီးလွင်ႈပႅၵ်ႇပိူင်ႈၵၼ်ႁႅင်း လႄႈ လုၵ်ႈႁဵၼ်းၵူၼ်းၼုမ်ႇမိူင်းမၢၼ်ႈ ၸင်ႇဢွၼ်ၵၼ်လိူၵ်ႈမိူင်းထႆး ဝႃႈၼႆ။

ၾၢႆႇၼိုင်ႈၵေႃႈ သင်ၵူၼ်းၼုမ်ႇမိူင်းမၢၼ်ႈ ၶၢႆႉၵႂႃႇႁဵၼ်းလိၵ်ႈတၢင်ႇမိူင်း ၼမ်ၶိုၼ်ႈမႃးၸိုင် ဢဵၼ်ႁႅင်း ၽူႈလူင်ႉလႅၼ်ႇၵၢၼ်ငၢၼ်း တီႈၼႂ်းမိူင်းမၢၼ်ႈ ၸၢင်ႈယွမ်းၶၢတ်ႇၵႂႃႇၼမ်ႁႅင်းၼႆ ၸဝ်ႈႁူႉမေႃၶဝ် လၢတ်ႈပၼ်ၾၢင်ႉဝႆႉ ၼင်ႇၼႆ။