ၸွမ်ၸိုင်ႈမိူင်းဢီႊရၼ်ႊ ပိုၼ်ၽၢဝ်ႇဝႃႈ – သင်ၶႂ်ႈႁႂ်ႈၵိုတ်းပၢင်တိုၵ်းဢၼ်ပဵၼ်ယူႇယၢမ်းလဵဝ်ၼႆႉၸိုင် လူဝ်ႇလႆႈႁဵတ်း ၸွမ်းၼင်ႇၶေႃႈတုၵ်းယွၼ်း ၾၢႆႇလူင်ပွင်ၸိုင်ႈမိူင်းဢီႊရၼ်ႊမီးဝႆႉ 3 ၶေႃႈ ဢိၵ်ႇပႃး ငိုၼ်းၵႃႈသၢႆႈတႅၼ်းသိုၵ်း ဝႃႈၼႆ။

လွင်ႈၼႆႉ ၸွမ်ၸိုင်ႈမိူင်းဢီႊရၼ်ႊ တႅမ်ႈတၢင်ႇဝႆႉတီႈၼိူဝ် သိုဝ်ႇတူင်ႇဝူင်း X မၼ်းၸၢႆး ၼႂ်းဝၼ်းတီႈ 12 လိူၼ်မၢတ်ႉၶျ်ၼႆႉ။

မၼ်းၸၢႆးတႅမ်ႈဝႆႉဝႃႈ – သင်ၶႂ်ႈႁႂ်ႈပၢင်တိုၵ်းၵိုတ်းၵႂႃႇ လူၺ်ႈဢဝ်လၢႆးတၢင်းဢုပ်ႇဢူဝ်းၵၼ်ၸိုင် ဢမေႊရိၵၼ်ႊ လႄႈတင်း ဢိတ်ႉသ်ရေႊ တေလႆႈၼပ်ႉယမ်သုၼ်ႇလႆႈလွင်ႈဢုပ်ႇပိူင်ႇ ၽွင်းငမ်း ၶွင်မိူင်းဢီႊရၼ်ႊ၊ တေလႆႈပၼ်ငိုၼ်းသၢႆႈတႅၼ်းသိုၵ်း လႄႈ တေလႆႈပၼ်ၶေႃႈႁပ်ႉႁွင်း ဢၼ်ၵူႈမိူင်းမိူင်းယုမ်ႇယမ် တမ်းၸႂ်လႆႈဝႃႈ တေဢမ်ႇပူၼ်ႉပႅၼ်ၶဝ်ႈတိုၵ်းၸိူင်ႉၼႆထႅင်ႈ – ၸဵမ်ၸိူဝ်းၼႆႉ။

လိူဝ်ၼၼ်ႉ ၵဵဝ်ႇလူၺ်ႈငဝ်းလၢႆးပၢင်တိုၵ်းယၢမ်းလဵဝ်သေ လႆႈဢုပ်ႇၵုမ်ၵၼ်တင်း ၽူႈဢွၼ်ႁူဝ် မိူင်းရတ်ႉသျႃႊ လႄႈ မိူင်းပႃႊၵိတ်ႊသတၼ်ႊဝႆႉယူႇ ဝႃႈၼႆ။

ၼႂ်းဝၼ်းတီႈ 28 လိူၼ်ၾႅပ်ႉပိဝ်ႊရီႊပူၼ်ႉမႃးၼၼ်ႉ ဢမေႊရိၵၼ်ႊ တင်း ဢိတ်ႉသ်ရေႊ ႁူမ်ႈၵၼ်ၶဝ်ႈတိုၵ်း မိူင်းဢီႊရၼ်ႊ ၾၢႆႇသဵၼ်ႈတၢင်းၵၢင်ႁၢဝ်။ ၽူႈဢွၼ်ႁူဝ်သုင်သုတ်း၊ ၽူႈမီးၸၼ်ႉသုင် ၼႂ်းၸုမ်းလူင်ပွင်ၸိုင်ႈ လႄႈ ၾၢႆႇၵၢၼ်သိုၵ်း မိူင်းဢီႊရၼ်ႊ လူႉတၢႆၵႂႃႇတင်းၼမ်။

ၾၢႆႇမိူင်းဢီႊရၼ်ႊၵေႃႈ ၸႂ်ႉမၢၵ်ႇၼူၾႆး၊ ၶိူင်ႈတရူၼ်းၸိူဝ်းၼႆႉ တင်းၼမ်သေ ယိုဝ်းသႂ်ႇတီႈတပ်ႉပၢင်သဝ်းသိုၵ်း ဢမေႊရိၵၼ်ႊ ၼႂ်းပိုၼ်ႉတီႈ တႃဝၼ်းဢွၵ်ႇၵၢင်လႄႈ ၼႂ်းပိုၼ်ႉတီႈ ၼႃႈလိၼ် မိူင်းဢိတ်ႉသ်ရေႊ။ ဝၢႆးၼၼ်ႉ ႁဵတ်းႁႂ်ႈပၢင်တိုၵ်း ယႂ်ႇၵႂၢင်ႈမႃးႁႅင်း။

ဢမေႊရိၵၼ်ႊ တင်း ဢိတ်ႉသ်ရေႊ လၢတ်ႈဝႃႈ လႆႈတိုၵ်းတေႃးယႃႉလႅဝ်ပႅတ်ႈ ဢဵၼ်ႁႅင်း ၾၢႆႇတပ်ႉၼမ်ႉ၊ တပ်ႉၵၢင်ႁၢဝ် လႄႈ ၶိူင်ႈမၢၵ်ႇၼူၾႆး မိူင်းဢီႊရၼ်ႊ တင်းၼမ်ၼႆသေတႃႉ တေႃႇထိုင်ယၢမ်းလဵဝ် ဢီႊရၼ်ႊ ၵေႃႈ တိုၵ်ႉသိုပ်ႇတိုၵ်းတေႃး တုမ်ႉတွပ်ႇဝႆႉၶိုၼ်းယူႇ ၵူႈဝၼ်း။

ၽူႈမီးပုၼ်ႈၽွၼ်း မိူင်းဢီႊရၼ်ႊၶဝ် ပိုၼ်ၽၢဝ်ႇဝႃႈ – တႄႇၸဵမ်မိူဝ်ႈပဵၼ်ပၢင်တိုၵ်းမႃး တီႈမိူင်းဢီႊရၼ်ႊ မီးၵူၼ်းလူႉတၢႆ 1200 ပၢႆ၊ မၢတ်ႇၸဵပ်း 1 မိုၼ်ႇပၢႆ ဝႃႈၼႆ။