ဝၼ်းတီႈ 20/01/2026 ၶၢဝ်းယၢမ်း 11 မူင်းၶိုင်ႈ ၼႆႉ ၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ မႃးၼမ်းပိုတ်ႇ ၶူဝ်မႂ်ႇ တီႈတႃႈသၢင်း ဢၼ်ၵၢႆႇၸူးမိူင်းတႆးပွတ်းၸၢၼ်းလႄႈပွတ်းဢွၵ်ႇ။

ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈၼႆႉ မီးၶႃႈႁၢပ်ႇၵၢၼ်ၶုၼ် လႄႈ ၵူၼ်းမိူင်း ၼႂ်းမိူင်းတူၼ် မိူင်းသၢတ်ႇလႄႈ မိူင်းပၼ်ႇ မိူင်းၼၢႆး လၢင်းၶိူဝ်းၸိူဝ်းၼႆႉ မႃးၶဝ်ႈႁူမ်ႈၸွမ်း ၼပ်ႉႁူဝ်ပၢၵ်ႇ ။ ယဝ်ႉၵေႃႈ မီးၸၢဝ်းၶိူဝ်းၼႂ်းပိုၼ်ႉတီႈမႃးၶဝ်ႈႁူမ်ႈ မိူၼ်ၼင်ႇ လႃးႁူႇ လီးသေႃး တႆး မၢၼ်ႈ ၸိူဝ်းၼႆႉ ” – ဝႃႈၼႆ။

တႃႇပဵၼ်မႃး ၶူဝ်မႂ်ႇၼႆႉ မိူဝ်ႈ 6 ပီပူၼ်ႉမႃး  ဝၼ်းတီႈ 6/2/2019 ၼၼ်ႉ ယူႇတီႈ တေႃႇဢွင်ႇသၢၼ်းၸူႉၵျီႇ ၽူႈၵိူဝ်းၵုမ်ၸိုင်ႈမိူင်း ႁွတ်ႈထိုင်တႃႈသၢင်းသေ တွၵ်ႇလၵ်း ပိုတ်ႇၶူင်းၵၢၼ် တႃႇႁဵတ်းထႅင်ႈၶူဝ်လင်မႂ်ႇ ၾၢႆႇတႂ်ႈၶူဝ် ၵဝ်ႇယၢမ်းလဵဝ်။

ၵူၺ်းၵႃႈ ၽွင်းမၼ်းၼၢင်းတိုၵ်ႉတူၵ်းၶွၵ်ႈၵၢၼ်မိူင်းယူႇၼႆႉၵူၺ်း သိုၵ်းမၢၼ်ႈ မႃးၼမ်းပိုတ်ႇၶူဝ်မႂ်ႇယဝ်ႉၼႆ – ၽူႈၶဝ်ႈႁူမ်ႈပၢင်ပိုတ်ႇၶူဝ်ၵေႃႉၼိုင်ႈလၢတ်ႈ ။

ၶူဝ်ၼႆႉ ပဵၼ်ၶူဝ်ဢၼ် ၵၢႆႇၸူး ၵပ်းသိုပ်ႇပၼ် သဵၼ်ႈတႃႈသၢႆတၢင်း မိူင်းတႆးပွတ်းဢွၵ်ႇ – ပွတ်းၸၢၼ်း မိူၼ်ၼင်ႇ  မိူင်းသၢတ်ႇ မိူင်းတူၼ် လႄႈ မိူင်းပၼ်ႇ မိူင်းၼၢႆး လၢင်းၶိူဝ်း ၼမ်ႉၸၢင် ၸိူဝ်းၼႆႉ။

ၶူဝ်တႃႈသၢင်းလင်ၵဝ်ႇၼႆႉ ႁပ်ႉလႆႈၼမ်ႉၼၵ်း 16 တၼ်ႊ၊ သဝ်ၾင်ၸိူၵ်ႈ ၾင်ႇတင်းဢွၵ်ႇၶူင်းသမ်ႉ ၵူၼ်ႇပင်း ၵမ်းၼိုင်ႈ မိူဝ်ႈႁၢင်ပီ 2017 ၊ ၽွင်းၼၼ်ႉၵၢၼ်ၸႂ်ႉၶူဝ်လႆႈၵိုတ်းၵႂႃႇ 2-3 ဝၼ်း၊ ၶူဝ်ၵဝ်ႇၵေႃႈဢမ်ႇပေႃးၶႂ်ႈလီ၊ လူင်ပွင်ၸိုင်ႈသမ်ႉမီးၽႅၼ်ၵၢၼ် တႃႇၶႂၢၵ်ႈပဵၼ် သဵၼ်ႈတၢင်းလူင် ဢေႊသျိူဝ်ႊ လႄႈ ၸင်ႇတေႁဵတ်းထႅင်ႈၶူဝ်လင်မႂ်ႇ- ၼႆ ၵူၼ်းပိုၼ်ႉတီႈလၢတ်ႈ။

မၼ်းမီးလွင်ႈၶွင်ႈၶမ်လၢႆလွင်ႈလႄႈ ယူႇတီႈ လူင်ပွင်ၸိုင်ႈဢၼ်ၵူၼ်းမိူင်းလိူၵ်ႈတင်ႈဝႆႉ ယၢမ်း 2019 ၼၼ်ႉ ၸင်ႇတႄႇၶူင်းၵၢၼ်သၢင်ႈၶူဝ်မႂ်ႇမႃး။ မိူဝ်ႈလဵဝ် တၢင်းယၢဝ်းၶူဝ်မီး 876 ထတ်း သေ တၢင်ႇၼၵ်းလႆႈထိုင် 60 တၼ်ႊ လႆႈႁူႉၼင်ႇၼႆ။

ၶူဝ်တႃႈသၢင်းၼႆႉ မိူဝ်ႈဢွၼ်တၢင်း မီးၸိုဝ်ႈဝႃႈ ၶူဝ်တႃႈၸၢင်ႉ ဢိင်ၼိူဝ် တႆးသူင်မိုတ်ႈ လၢတ်ႈၵႂၢမ်းပိူၼ်ႈလႄႈ ဢဝ်သဵင်ယဵၼ်းၵႂႃႇပဵၼ်တႃႈသၢင်း၊ ၵူၼ်းဢႃႇယု 80 ၶဝ်ၸဝ်ႈၵမ်ႈၽွင်ႈ ယင်းတိုၵ်ႉႁွင်ႉဝႃႈ ၶူဝ်တႃႈၸၢင်ႉယူႇ။ ၾၢႆႇတၢင်းဢွၵ်ႇၶူင်း ပဵၼ်တပ်ႉၵွင် တႂ်ႈတိူင်းသိုၵ်းသၢမ်ၸဵင်ႇၵဵင်းတုင် ၵုမ်းၵမ်ဢဝ်ႁူမ်ႇလူမ်ႈဝႆႉသေ ၾၢႆႇတၢင်းတူၵ်း ၶူင်းသမ်ႉ မီးတပ်ႉ တႂ်ႈၸၵၶ 17 မိူင်းပၼ်ႇ တႂ်ႈတိူင်းသိုၵ်း ယလၶ ၶူဝ်လမ် ဢဝ်ႁူမ်ႇလူမ်ႈ။

ပိုၼ်ႉတီႈ တႃႈသၢင်းၼႆႉ ပဵၼ်ၼႃႈတီႈဢၼ် ၶွင်ႇသီႇဢဝ်ၶိုၼ်းၸိုင်ႈတႆး – တပ်ႉသိုၵ်းၸိုင်ႈတႆး RCSS/SSA တူင်ႉၼိုင်သေတႃႉ ပၢင်ပိုတ်ႇၶူဝ်မႂ်ႇတႃႈသၢင်းၼႆႉ ဢမ်ႇမီးတူဝ်တႅၼ်းၶဝ်ႈႁူမ်ႈ ၼႆ ၵူၼ်းပိုၼ်ႉတီႈလၢတ်ႈ ။