မိူဝ်ႈၼႆႉ ဝၼ်းတီႈ 15/2/2021 ယၢမ်းဝၢႆးဝၼ်း မွၵ်ႈ 1 မူင်းပၢႆ မၢၵ်ႇလူင်တူၵ်းသႂ်ႇႁိူၼ်း ပႃႈသူၺ်ႇပု ဝၢၼ်ႈၵွင်းလွင်းဝွင်း ဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တိူဝ်ႉၺႃး ၵူၼ်းၼႂ်းႁိူၼ်း မၢတ်ႇၸဵပ်းလူႉတၢႆ ၊ တၢႆၵူမ်ၵေႃႉၼိုင်ႈ။
ၵူၼ်းဝၢၼ်ႈ တေႃႉသၢင်ႇ လၢတ်ႈဝႃႈ – “တပ်ႉပွင်းၸူႉသမ်ႉ လုၵ်ႉတၢင်းၸၢၼ်းႁိူၼ်းပႃႈသူၺ်ႇပုၶဝ်(ဝၢၼ်ႈၵွင်းလွင်းဝွင်း) သေ ယိုဝ်းၵႂႃႇတၢင်းယၢၼ်ႇ ၵိၼ်းတွင်ႇ။ မၢၵ်ႇၶဝ်ဢမ်ႇပူၼ်ႉသေ တူၵ်းသႂ်ႇၼႂ်းႁိူၼ်းပႃႈသူၺ်ႇပု ၶဝ်။ တိူဝ်ႉၺႃးၵူၼ်းဝၢၼ်ႈဢၼ်မီးၼႂ်းႁိူၼ်းၼၼ်ႉ 6 ၵေႃႉ မၢတ်ႇၸဵပ်း 4 ၵေႃႉ တၢႆ 2 ၵေႃႉ တၢႆၵူမ်ၵေႃႉၼိုင်ႈ ။ ”- ဝႃႈၼႆ။
ၵူၼ်းမၢတ်ႇၸဵပ်း 4 ၵေႃႉ တီႈဝၢၼ်ႈၵွင်းလွင်းဝွင်းၼၼ်ႉတႄႉ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈဝၢၼ်ႈတေႃႉသၢင်ႇ ဝႃႈ ၼႆ။
“ယၢမ်းလဵဝ် တီႈတေႃႉသၢင်ႇၼႆႉ မီးၵူၼ်းပဵၼ်ဝႆႉ 5 ၵေႃႉ။ မိူဝ်ႈဝႃး ၵူၼ်းပႃႇၶႃးၵေႃႉၼိုင်ႈ မၢၵ်ႇလူင်တူၵ်းသႂ်ႇႁိူၼ်းယေး ၺႃး ၸၢၵ်ႇမၢၵ်ႇ ၶႂ်ႈဝႃႈလိူဝ်ႁႅင်းဝႆႉ ယဝ်ႉၵေႃႈ ၵူၼ်းပဵၼ်ထႅင်ႈမိူဝ်ႈၼႆႉ 4 ၵေႃႉ ႁူမ်ႈၵၼ်ပဵၼ် 5 ၵေႃႉ။ ၶမ်ဝႆႉတီႈၼၼ်ႈ ဢမ်ႇ ၸၢင်ႈဢွၵ်ႇမႃး”- ၵူၼ်းပွတ်းတေႃႉသၢင်ႇလၢတ်ႈၼႄၼင်ႇၼႆ။
ၼၢင်းယိင်းၵူၼ်းဝၢၼ်ႈတွင်ႇပလူဝ်ႉ ၵေႃႉၼိုင်ႈၵေႃႈၸၢၵ်ႇမၢၵ်ႇ တိူဝ်ႉၺႃး တီႈႁူဝ်ၶဝ်ႇမၼ်းၼၢင်းသေ လႆႈ ယူတ်း ယႃဝႆႉတီႈၼႂ်းဝၢၼ်ႈၵူၺ်း။ယွၼ်ႉပၢင်တိုၵ်းလႄႈ ပႆႇၸၢင်ႈတေႃႉဢွၵ်ႇမႃး ၼင်ႇၵဝ်ႇ ဝႃႈၼႆ။
“ယၢမ်းလဵဝ် ပေႃးသွၼ်ႇပႃး တီႈဝၢၼ်ႈတွင်ႇပလူဝ်ႉၵေႃႉၼိုင်ႈသေ ၵူၼ်းမၢတ်ႇၸဵပ်း တေမီး 6 ၵေႃႉၶႃႈယဝ်ႉ ။ ၶမ်ဝႆႉ ဢမ်ႇၸၢင်ႈတေႃႉ ဢွၵ်ႇမႃး ယွၼ်ႉသိုၵ်းလွႆ ပိၵ်ႉဢိုတ်းတၢင်း ဢမ်ႇပၼ် ၸုမ်းတူင်ႉဝူင်းၵူၼ်းၶဝ်ႈၵႂႃႇတေႃႉဢွၵ်ႇမႃးၶႃႈ ”- ၵူၼ်းပွတ်း တေႃႉသၢင်ႇ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 13/2/2021 ပူၼ်ႉမႃးၼႆႉ သိုၵ်း RCSS တင်း ၸုမ်းဢူၺ်းလီ ပွတ်းႁွင်ႇ TNLA ႁူမ်ႈၵၼ် SSPP ပဵၼ်ပၢင် တိုၵ်းၵၼ် တင်းၸႄႈဝဵင်းၵျွၵ်ႉမႄးမႃး တေႃႇထိုင် ယၢမ်းလဵဝ် တိုၵ်ႉပိုတ်းယိုဝ်းၵၼ် ၶဵင်ႈၶႅင်ၵၼ် ၸိူဝ်းၼႆႉယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ